মোবাইল ফোন ব্যৱহাৰকাৰীসকলৰ বাবে ডাঙৰ খবৰ। মোবাইল কোম্পানীসমূহে এতিয়াৰে পৰা ৩০ দিনীয়া ৰিচাৰ্জ প্লেন প্ৰস্তুত কৰিব লাগিব। ৩০ দিনৰ বৈধতাৰ সৈতে নতুন প্ৰিপেইড প্লেনৰ ৰিচাৰ্জ কৰিব লাগিব গ্ৰাহকসকলে। টেলিকম ৰেগুলেটৰী অথৰিটী অৱ ইণ্ডিয়াই সকলো টেলিকম কোম্পানীৰ বাবে নতুন নিৰ্দেশনা জাৰি কৰিছে। আজি জাৰি কৰা কেইবাটাও গুৰুত্বপূৰ্ণ সিদ্ধান্তৰ ভিতৰত আছে সম্পূৰ্ণ মাহৰ শুল্ক আঁচনিও। ট্ৰাইৰ নিৰ্দেশ অনুসৰি সকলো টেলিকম কোম্পানীয়ে ৩০ দিনৰ বৈধতাসহ বিশেষ টেৰিফ ভাউচাৰ আৰু কম্বো ভাউচাৰৰ সৈতে প্লেন ভাউচাৰ আগবঢ়াব লাগিব। কোম্পানীবোৰে কমেও এনে এটা প্লেন ভাউচাৰ, এটা বিশেষ টেৰিফ ভাউচাৰ আৰু এটা কম্বো ভাউচাৰ আগবঢ়াব লাগিব যাক প্ৰতি মাহে একে তাৰিখতে গ্ৰাহকে নবীকৰণ কৰিব পাৰে। টেলিকম শুল্কৰ ক্ষেত্ৰত ৬৬সংখ্যক সংশোধনীমৰ্মে মোবাইল ফোন ব্যৱহাৰকাৰীসকলে বহুতো ৰিচাৰ্জ প্লেনৰ বিকল্প লাভ কৰিব। ব্যৱহাৰকাৰী বা গ্ৰাহকসকলে সম্পূৰ্ণ ৩০ দিনৰ বৈধতাৰ বিকল্পও পাব।
উল্লেখ্য যে, টেলিকম কোম্পানীবোৰে সাধাৰণতে ২৮ আৰু ২৪ দিনৰ ৰিচাৰ্জ আগবঢ়ায়। বহু গ্ৰাহকে অভিযোগ কৰিছিল যে টেলিকম কোম্পানীবোৰে এমাহৰ বাবে সম্পূৰ্ণ ৰিচাৰ্জ নিদিয়ে। এইটোৱে গ্ৰাহকৰ বহুতো সমস্যাৰ সৃষ্টি কৰে। একে সময়তে টকাও অধিক খৰচ কৰা হয়। ইতিমধ্যে গ্ৰাহকসকলৰ পৰা বহু অভিযোগ পাইছে যে মাহিলী প্লেনিঙৰ বাবে বছৰত ১৩ বাৰ ৰিচাৰ্জ কৰিবলগীয়া হয় আৰু ইয়াৰ জৰিয়তে তেওঁলোকে প্ৰতাৰিত অনুভৱ কৰে। নতুন পৰিৱৰ্তনে গ্ৰাহকসকলক যথেষ্ট লাভান্বিত কৰিব আৰু নিজৰ সুবিধা অনুসৰি সঠিক বৈধতাৰ সৈতে আঁচনিৰ অধিক বিকল্পও লাভ কৰিব।
