কামত বেয়া, দায়িত্ব নুবুজে…
ডাঙৰীয়া আপোনাৰ দৰমহা বন্ধ
খঙত অগ্নিশৰ্মা উপায়ুক্ত কীৰ্তি জল্লী
কাপোৰ ঠোকোচা দি ঠুকুচি পেলালেহে। মাত হেৰাল বিষয়াৰ। মাতনো দিব কি! নিজৰ কৰ্মকাণ্ড নিজেই জানে যেতিয়া গালিখিনি তেওঁৰ প্ৰাপ্তি বুলিয়ে ধৰি ল’লে। প্ৰথমে উপায়ুক্তগৰাকীয়ে মাতি আহোতেও পলমকৈ আহিল বিষয়াজন। ৰৈ থাকিবলগীয়া হ’ল DCসহ আন বিষয়াসকল। বিষয়াজন আহোতেই অন কেমেৰা গৰজি উঠিল জিলা উপায়ুক্ত কীৰ্তি জল্লী। তাৰ পিছত আহি পালে পানী ফিল্টাৰৰ কাষ। লেতেৰা, কৰ্দযময় পৰিৱেশ। আকৌ এপৰাল পৰিল বিষয়াৰ ওপৰত।
এইবোৰ ব্যৱস্থা ঠিক নোহোৱালৈকে দৰমহা বন্ধ। বিষয়াক কৈ দিলে উপায়ুক্ত কীৰ্তি জল্লীয়ে। এই যে জিলা উপায়ুক্তৰ ধাৰাষাৰ গালি খাই আছে এওঁ পিছে কম নহয়। চাওক খন্তেক সময়ৰ পূৰ্বে কীৰ্তি জল্লীৰ সৈতে একেলগে ডাইচত বহি আছিল লোকজন। কীৰ্তি জল্লীৰ ভাষণত হাত-তালিও দিছিল।
পিছে পিছত এই গতি হ’ল লোকজনক। এই ঘটনা ঘটিল কামৰূপৰ শিঙিমাৰীত আদৰ্শ চিকিৎসালয়ত অতিৰিক্ত বিনামূলীয়া কিডনী ডায়েলাইচিছ সেৱা মুকলি অনুষ্ঠানত। ডায়েলাইচিছ সেৱা মুকলি কৰে কামৰূপ জিলা উপায়ুক্ত কীৰ্তি জল্লীয়ে। কামৰূপ জিলা প্ৰশাসনৰ উদ্যোগত হিন্দুস্থান কোকা-কোলা প্ৰতিষ্ঠানৰ অৰ্থ সাহাৰ্যত অতিৰিক্তভাৱে এই ডায়েলাইচিছ সেৱা মুকলি কৰা হয়। লগতে সোমবাৰৰ পৰা চিকিৎসালয়খনত প্ৰসূতি বিভাগ আৰম্ভ হ’ব বুলি উপায়ুক্ত গৰাকীয়ে ঘোষণা কৰে। পিছে প্ৰসূতি বিভাগ মুকলিৰ পূৰ্বে মুখ্যমন্ত্ৰীৰ সমষ্টিৰ চিকিৎসালয়খন চাব খুজিলে কীৰ্তি জল্লীয়ে। তাতেই লাগিল কেনা। চিকিৎসালয়খন কিছুমান ব্যৱস্থাই খৰ্গহস্ত কৰিলে জল্লীক। গতিকে, তুলাধুনা দিলে চিকিৎসালয়খনৰ সহকাৰী অধীক্ষক ডা° মনোমোহন মড়লক। শাস্তি হিচাপে চলিত মাহৰ দৰমহা বন্ধ কৰা হ’ব বুলি ধমক দিলে। অহা ৬ মাহৰ ভিতৰত বিসংগতি দূৰ নকৰিলে ৬ মাহলৈ দৰমহা বন্ধ ৰখা হ’ব বুলি চিকিৎসকজনক সকীয়নি দিলে।