ভাৰতত থকা ইৰানৰ দূতাবাসে (Embassy of Iran) দেশখনৰ প্ৰয়াত সৰ্বোচ্চ নেতা আয়াতুল্লাহ আলী খামেনেইৰ (Ayatollah Ali Khamenei) অন্ত্যেষ্টিক্ৰিয়াত অংশগ্ৰহণ কৰাৰ বাবে ভাৰত চৰকাৰ, ৰাজনৈতিক নেতা, আৰু নাগৰিকসকলৰ প্ৰতি গভীৰ কৃতজ্ঞতা প্ৰকাশ কৰিছে। ছ’চিয়েল মিডিয়া প্লেটফৰ্ম এক্সত (X) প্ৰকাশ কৰা এক বিবৃতিত দূতাবাসে উল্লেখ কৰে যে টেহৰাণত অনুষ্ঠিত অন্ত্যেষ্টিক্ৰিয়া অনুষ্ঠানত ভাৰতৰ উপস্থিতি আছিল পাৰস্পৰিক সন্মানৰ প্ৰতীক আৰু দুয়োখন দেশৰ মাজত থকা দীৰ্ঘদিনীয়া সম্পৰ্কৰ প্ৰতিফলন।
বিবৃতিটোত ইৰানৰ দূতাবাসে অন্ত্যেষ্টিক্ৰিয়াত দেশখনক প্ৰতিনিধিত্ব কৰা ভাৰতীয় প্ৰতিনিধি দলটোক ধন্যবাদ জ্ঞাপন কৰে। ৰাষ্ট্ৰীয় শোকৰ এই কঠিন সময়ত ইৰানৰ কাষত থিয় দিয়াৰ বাবে তেওঁলোকে ভাৰত চৰকাৰ আৰু দেশবাসীক কৃতজ্ঞতা জনায়।
দূতাবাসে লিখিছে:
“ভাৰত গণৰাজ্যত থকা ইৰানৰ ইছলামিক গণৰাজ্যৰ দূতাবাসে ইৰানৰ ইছলামিক গণৰাজ্যৰ শ্বহীদ নেতা, মহামহিম আয়াতুল্লাহ চৈয়দ আলী খামেনেইৰ অন্ত্যেষ্টিক্ৰিয়া অনুষ্ঠানত অংশগ্ৰহণ কৰি শ্ৰদ্ধাঞ্জলি জ্ঞাপন কৰাৰ বাবে বন্ধুভাবাপন্ন ভাৰত চৰকাৰ আৰু জনসাধাৰণক, বিশেষকৈ চৰকাৰ আৰু জনসাধাৰণৰ হৈ উপস্থিত থকা চৰকাৰী প্ৰতিনিধি দলটোক আন্তৰিক কৃতজ্ঞতা আৰু ধন্যবাদ জ্ঞাপন কৰিছে।”
দূতাবাসৰ বিবৃতিত আৰু কোৱা হৈছে যে আলী খামেনেইৰ ছয়দিনীয়া অন্ত্যেষ্টিক্ৰিয়াত ভাৰতৰ অংশগ্ৰহণ কেৱল চৰকাৰী কূটনৈতিক প্ৰতিনিধিত্বতে আৱদ্ধ নাছিল। ইয়াত ভাৰতৰ বিভিন্ন ৰাজনৈতিক নেতা, সাংসদ, বিশিষ্ট পণ্ডিত, বুদ্ধিজীৱী আৰু বিভিন্ন ধৰ্মীয় সম্প্ৰদায়ৰ প্ৰতিনিধিৰ উপস্থিতিয়ে দুয়োখন দেশৰ মাজৰ সম্পৰ্কৰ গভীৰতা প্ৰমাণ কৰিছে। এয়া কেৱল কূটনৈতিক পদক্ষেপ নহয়, বৰঞ্চ ভাৰত আৰু ইৰানৰ মাজত থকা ঐতিহাসিক, সাংস্কৃতিক আৰু পাৰস্পৰিক মানৱীয় সম্পৰ্কৰো এক প্ৰতিফলন।
ভাৰত-ইৰানৰ বন্ধুত্বক প্ৰশংসা ইৰানৰ:
ইৰানৰ দূতাবাসে সদৰী কৰা মতে, ভাৰতৰ এই পদক্ষেপক ইৰানৰ জনসাধাৰণে বন্ধুত্ব আৰু সহানুভূতিৰ এক গুৰুত্বপূৰ্ণ প্ৰতীক হিচাপে সদায় মনত ৰাখিব। এই শোকৰ সময়ত ভাৰতে আগবঢ়োৱা সমৰ্থনে আগন্তুক বছৰবোৰত দ্বিপাক্ষিক সম্পৰ্ক অধিক সুদৃঢ় কৰাৰ ক্ষেত্ৰত এক শক্তিশালী ভেটি হিচাপে কাম কৰিব।
প্ৰেছ বিজ্ঞপ্তিখনৰ শেষৰ অংশত দূতাবাসে পুনৰবাৰ কয়:
“ইৰানৰ জনসাধাৰণে বন্ধুত্ব, সহানুভূতি আৰু আন্তৰিক সন্মানৰ এই প্ৰদৰ্শন কেতিয়াও পাহৰি নাযায়। তেওঁলোকে ইয়াক ইৰান আৰু ভাৰতৰ মাজৰ স্থায়ী সম্পৰ্কৰ এক অমূল্য প্ৰমাণ আৰু সুদীৰ্ঘদিনীয়া বন্ধুত্বক অধিক শক্তিশালী কৰাৰ এক গুৰুত্বপূৰ্ণ আধাৰ হিচাপে গণ্য কৰে।”
বাৰ্তাৰ সামৰণিত দূতাবাসে খামেনেইৰ বিয়োগত সমবেদনা জ্ঞাপন কৰা আৰু ইৰানৰ জনসাধাৰণৰ লগত সংহতি প্ৰকাশ কৰা সকলো ভাৰতীয় বিষয়া, বিশিষ্ট ব্যক্তি আৰু সৰ্বসাধাৰণ ৰাইজক ধন্যবাদ জ্ঞাপন কৰে।
