ভাৰত আৰু পাকিস্তানে মঙলবাৰে দিল্লী আৰু ইছলামাবাদত কূটনৈতিক মাধ্যমেৰে পৰস্পৰৰ মাজত বন্দীৰ তালিকা বিনিময় কৰিছে। ভাৰতীয় বিদেশ মন্ত্ৰণালয়ে এই কথা এক বিবৃতিৰ জৰিয়তে জনাইছে। ২০০৮ চনত দুয়োখন দেশৰ মাজত হোৱা এখন চুক্তি অনুসৰি, প্ৰতি বছৰে ১ জানুৱাৰী আৰু ১ জুলাইত দুয়োখন দেশে এই তালিকাৰ বিনিময় কৰে।
ভাৰতীয় বিদেশ মন্ত্ৰণালয়ৰ বিবৃতি অনুসৰি, নতুন দিল্লীয়ে ৩৮২জন অসামৰিক বন্দী আৰু ৮১ জন মৎস্যজীৱীৰ নাম পাকিস্তানক প্ৰদান কৰিছে। এই ব্যক্তিসকলৰ কিছুমান পাকিস্তানৰ নাগৰিক, আৰু কিছুমানক পাকিস্তানৰ নাগৰিক বুলি ধাৰণা কৰা হৈছে। এতিয়া তেওঁলোক সকলো ভাৰতৰ জিম্মাত আছে। ইয়াৰ বিপৰীতে, পাকিস্তানে ৫৩জন অসামৰিক বন্দী আৰু ১৯৩জন মৎস্যজীৱীৰ নাম নতুন দিল্লীলৈ পঠিয়াইছে। এই ব্যক্তিসকল হয় ভাৰতৰ নাগৰিক, নহয় পাকিস্তানে তেওঁলোকক ভাৰতৰ নাগৰিক বুলি ধাৰণা কৰিছে।
নতুন দিল্লীয়ে পাকিস্তানৰ কাৰাগাৰত থকা ১৫৯জন ভাৰতীয় বন্দীক মুক্ত কৰি পঠিয়াবলৈ আগতেই অনুৰোধ জনাইছে। তেওঁলোকে জনোৱা মতে, এই বন্দীসকলৰ শাস্তি ইতিমধ্যে সম্পূৰ্ণ হৈছে, আৰু তেওঁলোকৰ ভিতৰত কিছুমান মৎস্যজীৱীও আছে। ইয়াৰ উপৰিও, ভাৰতীয় বুলি ধাৰণা কৰা ২৬জন বন্দীয়ে যাতে ভাৰতীয় দূতাবাসৰ সহায় লাভ কৰে, তাৰ ব্যৱস্থা কৰিবলৈ কোৱা হৈছে। কাৰাগাৰত থকা আৰু মুক্তিৰ পিছত ভাৰতীয় বন্দীসকলৰ নিৰাপত্তা নিশ্চিত কৰিবলৈও নতুন দিল্লীয়ে অনুৰোধ জনাইছে। লগতে, ভাৰতত বন্দী ৮০জন ব্যক্তি, যাক পাকিস্তানৰ নাগৰিক বুলি ধাৰণা কৰা হৈছে, তেওঁলোকৰ পৰিচয় শীঘ্ৰে ইছলামাবাদক নিশ্চিত কৰিবলৈও কোৱা হৈছে।
উল্লেখযোগ্য যে, ২০১৪ চনৰ পৰা এতিয়ালৈকে ভাৰতীয় বিদেশ মন্ত্ৰণালয়ে পাকিস্তানৰ পৰা ২,৬৬২জন মৎস্যজীৱী আৰু ৭১জন অসামৰিক বন্দীক দেশলৈ ঘূৰাই আনিছে। ২০২৩চনৰ পৰা ২০২৫চনৰ ভিতৰত ৫০০জন মৎস্যজীৱী আৰু ১৩জন অসামৰিক বন্দীক পাকিস্তানৰ পৰা ভাৰতলৈ অনা হৈছে।
