বাৰ্মিজ চুপাৰিৰ বিৰুদ্ধে কাছাৰ আৰক্ষীৰ অপৰেচন অলআউট অব্যাহত থকাৰ সময়তে কাছাৰৰ লায়লাপুৰত জব্দ এখন চুপাৰিভৰ্তি ট্ৰাক ৷ আৰক্ষীয়ে চুপাৰি মালিক গুৱাহাটীৰ বিজেপি নেতাসহ ৩জনক গ্ৰেপ্তাৰ কৰিছে৷ কাছাৰৰ ধলাই আৰক্ষীয়ে গ্ৰেপ্তাৰ কৰে ৩জনক৷
মিজোৰাম-ম্যানমাৰ সীমান্তৰ পৰা চুপাৰি ভৰ্তি কৰি কাছাৰৰ মাজেদি লৈ যোৱাৰ সময়তে আৰক্ষীয়ে আটক কৰিছিল AS- 01NC- 4189 ৰ নম্বৰৰ ট্ৰাকখন৷ তাৎপৰ্যপূৰ্ণভাবে ট্ৰাকখন আটক কৰাৰ পাছত ধলাই থানাত উপস্থিত হৈ চুপাৰিসমূহ বৈধ বুলি দাবী কৰে মালিক গুৱাহাটীৰ প্ৰবীৰ পালে৷
কিন্তু আৰক্ষীয়ে দীৰ্ঘসময় থানাত আটক কৰি ৰখাৰ পাছত প্ৰবীৰক গ্ৰেপ্তাৰ কৰে৷ চুপাৰিৰ নথি সমূহ পৰীক্ষাৰ পাছত ভুৱা বুলি জনাই আৰক্ষীয়ে৷ সেয়েহে বাৰ্মিজ চুপাৰি সৰবৰাহৰ অভিযোগত প্ৰবীৰ পালসহ হোজাইৰ সুব্ৰত দে আৰু কাছাৰৰ ছনম উদ্দিন খানক গ্ৰেপ্তাৰ কৰে আৰক্ষীয়ে৷
ট্ৰাকখনত ১০ টন বাৰ্মিজ চুপাৰি মজুত আছিল৷ ইপিনে, গুৱাহাটীৰ কালাপাহাৰৰ বাসিন্দা প্ৰবীৰ পাল বিজেপিৰ কিষান মৰ্চাৰ গুৱাহাটী সমিতিৰ সম্পাদক বুলি জানিব পৰা গৈছে৷
অবৈধ বাৰ্মিজ চিগাৰেট সৰবৰাহৰ অভিযোগত প্ৰবীৰৰ বিৰুদ্ধে পূৰ্বেও শুল্ক বিভাগে গোচৰ কৰিছিল৷