আন্তঃৰাষ্ট্ৰীয় ক্ৰিকেট কাউন্সিলৰ (ICC) শেহতীয়া পুৰুষৰ খেলুৱৈ ৰেংকিঙত ভাৰতীয় ক্ৰিকেট দলৰ অভিষেক শৰ্মাই পুনৰ টি-২০ আন্তঃৰাষ্ট্ৰীয় ক্ৰিকেটৰ বেটছমেনৰ তালিকাত শীৰ্ষস্থান দখল কৰিছে। আনহাতে, দক্ষিণ আফ্ৰিকাৰ অলৰাউণ্ডাৰ মাৰ্কো ইয়ানছেনে টেষ্ট ক্ৰিকেটৰ বলাৰ আৰু অলৰাউণ্ডাৰৰ দুয়োটা শাখাতে বিশ্বৰ এক নম্বৰ স্থান লাভ কৰিছে।
নিউজিলেণ্ডৰ বিৰুদ্ধে তৃতীয়খন টি-২০ আন্তঃৰাষ্ট্ৰীয় মেচত বিস্ফোৰক বেটিঙেৰে অভিষেক শৰ্মাই মাত্ৰ ৩৫টা বলতে শতৰান সম্পূৰ্ণ কৰিছিল। তেওঁ ৩৮টা বলত ১১৩ ৰান সংগ্ৰহ কৰি ভাৰতক ছয় উইকেটত জয়ী কৰাত গুৰুত্বপূৰ্ণ ভূমিকা পালন কৰে। এই প্ৰদৰ্শনৰ সুবাদত তেওঁ সতীৰ্থ ঈশান কিষাণক অতিক্ৰম কৰি পুনৰ টি-২০ বেটছমেনৰ বিশ্ব ৰেংকিঙৰ শীৰ্ষস্থানলৈ উভতি আহে।
ইফালে, দক্ষিণ আফ্ৰিকাৰ বাঁওহতীয়া বেগী বলাৰ মাৰ্কো ইয়ানছেনে অষ্ট্ৰেলিয়াৰ বিৰুদ্ধে দ্বিতীয়খন টেষ্টত দুৰ্দান্ত প্ৰদৰ্শন আগবঢ়ায়। তেওঁ বেটিঙত ৮৫ ৰান সংগ্ৰহ কৰাৰ লগতে অষ্ট্ৰেলিয়াৰ প্ৰথম ইনিংছত পাঁচটা উইকেট দখল কৰে। এই প্ৰদৰ্শনৰ ফলত তেওঁ টেষ্ট বলাৰৰ ৰেংকিঙত অষ্ট্ৰেলিয়াৰ মিচেল ষ্টাৰ্কক অতিক্ৰম কৰি শীৰ্ষস্থান লাভ কৰে। লগতে ভাৰতৰ ৰবীন্দ্ৰ জাদেজাক অতিক্ৰম কৰি টেষ্ট অলৰাউণ্ডাৰৰ তালিকাৰো এক নম্বৰ স্থান দখল কৰে।
উল্লেখযোগ্য যে, ৰবীন্দ্ৰ জাদেজাই চাৰি বছৰতকৈও অধিক সময় ধৰি টেষ্ট অলৰাউণ্ডাৰৰ ৰেংকিঙত শীৰ্ষস্থান দখল কৰি আছিল। ২৬ বছৰীয়া ইয়ানছেনে প্ৰথমবাৰৰ বাবে একেলগে টেষ্ট বলাৰ আৰু অলৰাউণ্ডাৰৰ দুয়োটা শাখাতে শীৰ্ষস্থান লাভ কৰি নিজৰ কেৰিয়াৰত এক উল্লেখযোগ্য কৃতিত্ব অৰ্জন কৰিছে।
এই শেহতীয়া ৰেংকিঙে ভাৰতীয় ক্ৰিকেটৰ বাবে এক সুখবৰ কঢ়িয়াই অনাৰ লগতে আন্তঃৰাষ্ট্ৰীয় ক্ৰিকেটত মাৰ্কো ইয়ানছেনৰ ক্ৰমবৰ্ধমান প্ৰভাৱো প্ৰতিফলিত কৰিছে।
