স্পেইনত দুখন দ্ৰুতবেগী ৰে’লৰ সংঘৰ্ষৰ ফলত ভয়ংকৰ দুৰ্ঘটনা সংঘটিত হৈছে। বুধবাৰে সংঘটিত এই দুৰ্ঘটনাত প্ৰাথমিকভাৱে ১০জন লোকৰ মৃত্যু হোৱা বুলি প্ৰকাশ পোৱাৰ পিছত শেহতীয়া তথ্য অনুসৰি নিহতৰ সংখ্যা ৩০লৈ বৃদ্ধি পাইছে। দুৰ্ঘটনাটোৰ ফলত কেইবাজনো লোক আহত হৈছে আৰু নিহতৰ সংখ্যা অধিক বৃদ্ধি পোৱাৰ আশংকা কৰা হৈছে।
প্ৰাপ্ত তথ্য অনুসৰি, স্পেইনৰ টলেডো প্ৰদেশৰ উৰ্দা অঞ্চলৰ সমীপত মাদ্ৰিদৰ পৰা ছেভিল অভিমুখী ৰে’লপথত এই দুৰ্ঘটনা সংঘটিত হয়। দুখন দ্ৰুতবেগী ৰে’লৰ সংঘৰ্ষৰ ফলত কেইবাটাও দবা ৰে’লপথৰ পৰা বাগৰি পৰে। কিছুমান দবা ৰে’লপথৰ কাষৰ ঢালত পৰি যোৱাৰ ফলত দুৰ্ঘটনাস্থলীত ব্যাপক ক্ষয়-ক্ষতিৰ সৃষ্টি হয়।
দুৰ্ঘটনাৰ খবৰ লাভ কৰাৰ লগে লগে উদ্ধাৰকাৰী দল, অগ্নিনিৰ্বাপক বাহিনী, আৰক্ষী আৰু চিকিৎসাকৰ্মী ঘটনাস্থলীত উপস্থিত হয়। আহতসকলক উদ্ধাৰ কৰি চিকিৎসালয়লৈ প্ৰেৰণ কৰাৰ লগতে ধ্বংসাৱশেষৰ মাজত আৱদ্ধ হৈ থকা লোকসকলক উদ্ধাৰৰ অভিযান অব্যাহত ৰখা হৈছে।
ইফালে, এই দুৰ্ঘটনাৰ ফলত মাদ্ৰিদ আৰু দক্ষিণ স্পেইনৰ আন্দালুছিয়া অঞ্চলৰ মাজৰ দ্ৰুতবেগী ৰে’ল সেৱা সাময়িকভাৱে বন্ধ কৰি দিয়া হৈছে। দুৰ্ঘটনাটোৰ প্ৰকৃত কাৰণ এতিয়াও নিশ্চিত হোৱা নাই।
উল্লেখযোগ্য যে, চলিত বৰ্ষৰ জানুৱাৰী মাহতো স্পেইনত দ্ৰুতবেগী ৰে’লৰ আন এক ভয়ংকৰ দুৰ্ঘটনা সংঘটিত হৈছিল। সেই দুৰ্ঘটনাত ৪৬জন লোকৰ মৃত্যু হৈছিল বুলি শেহতীয়া প্ৰতিবেদনত উল্লেখ কৰা হৈছে। একেটা ৰে’লপথত পুনৰ এনে দুৰ্ঘটনা সংঘটিত হোৱাক লৈ দেশখনৰ ৰে’ল সুৰক্ষা ব্যৱস্থাক লৈ উদ্বেগ বৃদ্ধি পাইছে।
