স্বাধীনতা দিৱসত লালকিল্লাৰ পৰা দেশক উদ্দেশ্যি দিয়া ভাষণত প্ৰধানমন্ত্ৰী নৰেন্দ্ৰ মোদীয়ে আকৌ এবাৰ কেন্দ্ৰীয় চৰকাৰৰ অৱস্থান স্পষ্ট কৰিছে। শুকুৰবাৰে মোদীয়ে দৃঢ়তাৰে ঘোষণা কৰিছে যে, দেশৰ কৃষক আৰু মৎস্যজীৱীৰ স্বাৰ্থ ৰক্ষাৰ বাবে তেওঁ দেৱাল হৈ থিয় দিছে। আমেৰিকাৰ নাম পোনপটীয়াকৈ নল’লেও, মোদীৰ লক্ষ্যত আছিল ড’নাল্ড ট্ৰাম্পৰ চৰকাৰ।
ভাৰত আৰু আমেৰিকাৰ মাজত বাণিজ্য চুক্তিৰ জঁট এতিয়াও ঠিক হোৱা নাই। কেন্দ্ৰীয় সূত্ৰৰ পৰা জানিব পৰা গৈছে যে, ভাৰত-আমেৰিকা বাণিজ্য চুক্তিৰ ক্ষেত্ৰত মূল বাধা হৈছে কৃষি আৰু দুগ্ধজাত দ্ৰব্যৰ বিষয়ত দুয়োখন দেশ একমত নোহোৱা। আমেৰিকাই বিচাৰে ভাৰতে কৃষিপণ্য, গাখীৰ আৰু দুগ্ধজাত পণ্যৰ বজাৰ তেওঁলোকৰ বাবে সম্পূৰ্ণৰূপে মুকলি কৰি দিয়ক। কিন্তু নতুন দিল্লী তাত সন্মত নহয়। বাণিজ্য চুক্তিৰ বিষয়ে নতুন দিল্লী আৰু ৱাশ্বিংটনৰ মাজত আলোচনা চলি থাকিলেও, ট্ৰাম্পে ইতিমধ্যে ভাৰতৰ ওপৰত মুঠ ৫০ শতাংশ শুল্ক আৰোপৰ কথা ঘোষণা কৰিছে। তেওঁ এইটোও জনাইছে যে, শুল্কৰ বিষয়ে আলোচনা নোহোৱাৰ পৰ্যন্ত বাণিজ্য চুক্তিৰ কোনো কথা হ’ব নোৱাৰে। কিন্তু শুকুৰবাৰে মোদীয়ে পুনৰ স্পষ্ট কৰিছে যে, ভাৰত এই ভাবুকিৰ সন্মুখত মূৰ দোৱাব নোৱাৰে।
লালকিল্লাৰ পৰা ভাষণত মোদীয়ে কৈছে, “স্বাধীনতাৰ পিছত সকলোৰে বাবে খাদ্য নিশ্চিত কৰাটো এটা ডাঙৰ প্ৰত্যাহ্বান আছিল। কিন্তু আমাৰ কৃষকসকলে আমাক স্বাৱলম্বী কৰি তুলিছে। সেয়েহে ভাৰত চৰকাৰে কৃষকৰ স্বাৰ্থৰ সৈতে কোনো আপোচ নকৰে। মোদী দেৱাল হৈ থিয় দিব।”
‘আত্মনিৰ্ভৰ ভাৰত’ৰ সফলতাৰ কথা উল্লেখ কৰি প্ৰধানমন্ত্ৰীয়ে কৈছে, “অন্য দেশৰ ওপৰত নিৰ্ভৰশীল হোৱাটো বিপৰ্যয়ৰ এটা ডাঙৰ কাৰণ। আমাৰ স্বাৰ্থ ৰক্ষাৰ বাবে আমি স্বনিৰ্ভৰশীল হ’বই লাগিব।” একবিংশ শতিকাক ‘প্ৰযুক্তি-চালিত শতিকা’ বুলি উল্লেখ কৰি মোদীয়ে জনাইছে যে, তেওঁৰ চৰকাৰে সৌৰ, হাইড্ৰ’জেন আৰু পাৰমাণৱিক খণ্ডত কেইবাটাও প্ৰকল্প গ্ৰহণ কৰিছে। তেওঁ কয়, “আমাৰ ইন্ধনৰ চাহিদা পূৰণৰ বাবে আমি বহু দেশৰ ওপৰত নিৰ্ভৰশীল। কিন্তু প্ৰকৃত অৰ্থত আত্মনিৰ্ভৰ ভাৰত গঢ়িবলৈ হ’লে ইন্ধনৰ ক্ষেত্ৰত স্বাধীনতা লাভ কৰিব লাগিব।”
মোদীৰ মতে, “এতিয়া ইতিহাস ৰচনাৰ সময়। বিশ্ববজাৰক আমি শাসন কৰিব লাগিব।” স্বাধীনতা দিৱসত তেওঁ নতুন মন্ত্ৰ দিছে—‘কম দাম, উচ্চ মান’। এই মন্ত্ৰ সকলোৰে লক্ষ্য হ’ব লাগে বুলি তেওঁ কৈছে। মোদীয়ে আৰু কয়, “বিশ্বজুৰি অৰ্থনৈতিক স্বাৰ্থপৰতা বাঢ়িছে। এতিয়া আমাৰ আগবাঢ়ি যোৱা আৰু লক্ষ্য অৰ্জনৰ সময়।” প্ৰধানমন্ত্ৰীয়ে কৈছে, “অন্যক সৰু কৰি আমাৰ শক্তি নষ্ট কৰা উচিত নহয়। আমাৰ শক্তি কেনেকৈ বৃদ্ধি কৰিব পাৰি, তাৰ ওপৰত মনোযোগ দিয়া উচিত। আমাৰ বৃহৎ লক্ষ্যৰ ওপৰত মনোনিৱেশ কৰিব লাগিব। আমি বিচাৰো, আমাৰ দেশৰ ব্যৱসায়ীসকলে স্বদেশী পণ্যৰ ওপৰত গুৰুত্ব দিয়ক। যদি চৰকাৰী নীতিত কোনো পৰিৱৰ্তনৰ প্ৰয়োজন হয়, তেন্তে মোক জনাওক।”
