ধেমাজি জিলাৰ ৬ নং ৱাৰ্ডৰ কুলাপথাৰ পানীগাঁও নিবাসী তথা ডায়েট ধেমাজিৰ জ্যেষ্ঠ প্ৰৱক্তা ইন্দ্ৰজিৎ গামক সমাজসেৱা আৰু জনকল্যাণমূলক ক্ষেত্ৰত আগবঢ়োৱা সুদীৰ্ঘ আৰু উল্লেখযোগ্য অৱদানৰ স্বীকৃতি স্বৰূপে আমেৰিকা যুক্তৰাষ্ট্ৰৰ United American University for Leadership and Excellence-এ সন্মানীয় ডক্টৰেট (Honoris Causa) ডিগ্ৰী প্ৰদান কৰিছে।
যোৱা ১৭ বছৰতকৈও অধিক সময় ধৰি তেওঁ মহিলা সৱলীকৰণ, দুৰ্যোগ বিপদাশংকা হ্ৰাস, গ্ৰামোন্নয়ন, স্বাস্থ্যসেৱা, জীৱিকাৰ উন্নয়ন, শিক্ষা আৰু শিক্ষক প্ৰশিক্ষণ আদি ক্ষেত্ৰত নিষ্ঠাৰে কাম কৰি আহিছে। কৰ্মজীৱনৰ আৰম্ভণিতে তেওঁ IGSSS, RGVN (NE) MFL, ৰাষ্ট্ৰীয় গ্ৰাম্য স্বাস্থ্য অভিযান (NRHM) আৰু নেহৰু যুৱ কেন্দ্ৰ (NYK)-ৰ জৰিয়তে বিভিন্ন উন্নয়নমূলক কাৰ্যসূচীত নেতৃত্ব প্ৰদান কৰিছিল।
পিছলৈ প্ৰধানমন্ত্ৰীৰ গ্ৰাম্য উন্নয়ন ফেল’শ্বিপ (PMRDF)-ৰ অধীনত দূৰ্গম অঞ্চলত আদৰ্শ গাঁও উন্নয়ন, পথ সংযোগ, জনঅভিযোগ নিষ্পত্তি আৰু বৃত্তিমূলক শিক্ষাৰ ক্ষেত্ৰত উল্লেখযোগ্য ভূমিকা পালন কৰে। ইয়াৰ উপৰিও DAY-NRLM আৰু DAY-NULM-ৰ অধীনত জিলা আৰু নগৰ জীৱিকা অভিযানৰ দায়িত্ব সফলভাৱে সম্পাদন কৰে।
বৰ্তমান তেওঁ ডায়েট ধেমাজিত জ্যেষ্ঠ প্ৰৱক্তা হিচাপে কৰ্মৰত হৈ শিক্ষক প্ৰশিক্ষণ আৰু শৈক্ষিক মানোন্নয়নৰ ক্ষেত্ৰত সেৱা আগবঢ়াই আছে। তেওঁ ৰাজ্য, জিলা আৰু খণ্ড পৰ্যায়ৰ মাষ্টাৰ ট্ৰেইনাৰ হিচাপেও বহু প্ৰশিক্ষণ কাৰ্যসূচী পৰিচালনা কৰিছে। শিক্ষাৰ বহনক্ষম উন্নয়ন (ESD) বিষয়ক NCERT-ৰ ৰাষ্ট্ৰীয় পৰামৰ্শ বৈঠকতো অসমৰ প্ৰতিনিধিত্ব কৰাৰ লগতে বিভিন্ন শৈক্ষিক মঞ্চত সক্ৰিয় ভূমিকা গ্ৰহণ কৰিছে।
সংগঠনমূলক ক্ষেত্ৰতো তেওঁ উল্লেখযোগ্য ভূমিকা পালন কৰি আহিছে। বৰ্তমান তেওঁ সদৌ অসম ডায়েট বিষয়া সন্থা (AADOA)-ৰ ৰাজ্যিক সভাপতি (২০২৫–২০২৭) হিচাপে দায়িত্ব পালন কৰি শিক্ষক শিক্ষা ব্যৱস্থাৰ উন্নয়ন আৰু বিষয়া সকলৰ স্বাৰ্থ সুৰক্ষাৰ ক্ষেত্ৰত নেতৃত্ব প্ৰদান কৰি আছে।
ইন্দ্ৰজিৎ গামৰ এই সন্মানীয় ডক্টৰেট ডিগ্ৰী লাভে ধেমাজি জিলাৰ লগতে সমগ্ৰ অসমৰ বাবে গৌৰৱৰ বিষয় বুলি বিভিন্ন মহলে মত প্ৰকাশ কৰিছে।
