অসমৰ একমাত্ৰ বৰ্ষাৰণ্য দিহিং পাটকাই ৰাষ্ট্ৰীয় উদ্যানৰ পৰা আহিছে এক অতি সুখবৰ। উদ্যানখনত প্ৰথমবাৰৰ বাবে বৈজ্ঞানিকভাৱে এটা মতা বাঘৰ উপস্থিতি নিশ্চিত কৰা হৈছে। জুলজিকেল ছাৰ্ভে অৱ ইণ্ডিয়া (ZSI) আৰু ডিগবৈ বন সংমণ্ডলৰ অন্তৰ্গত মাৰ্ঘেৰিটা পশ্চিম বন ৰেঞ্জৰ যৌথ কেমেৰা ট্ৰেপিং নিৰীক্ষণৰ সময়ত এই বাঘটোৰ ছবি বন্দী হয়।
ইয়াৰ পূৰ্বে বন বিভাগৰ বিষয়া-কৰ্মীসকলে অঞ্চলটোত বাঘৰ খোজ (Pug marks) প্ৰত্যক্ষ কৰি ইয়াৰ উপস্থিতিৰ সন্দেহ প্ৰকাশ কৰিছিল। শেহতীয়াকৈ কেমেৰা ট্ৰেপত ধৰা পৰা এই আলোকচিত্ৰই সেই সন্দেহক সম্পূৰ্ণ বৈজ্ঞানিক ভিত্তি প্ৰদান কৰিলে।
অসমৰ বৰ্ষাৰণ্যৰ জৈৱ-বৈচিত্ৰ্য আৰু পৰিৱেশ তন্ত্ৰৰ সমৃদ্ধিৰ দিশৰ পৰা এইটো এক বিৰল তথা অত্যন্ত তাৎপৰ্যপূৰ্ণ সফলতা। বন বিভাগৰ বিষয়া আৰু বনকৰ্মীসকলৰ নিৰন্তৰ তহল, নিৰীক্ষণ আৰু নীৰৱ সতৰ্কতাৰ ফলতেই এই ঐতিহাসিক সফলতা লাভ কৰাটো সম্ভৱ হৈ উঠিছে। দিহিং পাটকাইৰ বুকুত বাঘৰ এই উপস্থিতিয়ে অসমৰ বন বিভাগৰ বাবে এক গৌৰৱময় ক্ষণ কঢ়িয়াই অনাৰ লগতে উদ্যানখনৰ সমৃদ্ধ পৰিৱেশিক স্বৰূপ পুনৰবাৰ প্ৰতিপন্ন কৰিছে।
