জীৱিকাৰ বাবে কোনো কামেই সৰু নহয়। কামৰ প্ৰতি সন্মান, আত্মনিৰ্ভৰশীলতাৰ মানসিকতা আৰু নিজৰ ভৰিত নিজে থিয় হোৱাৰ ইচ্ছাই মানুহক সফলতাৰ পথ দেখুৱায়। এই কথাকে যেন বাস্তৱ জীৱনত প্ৰতিফলিত কৰিছে মঙলদৈৰ এগৰাকী উচ্চ শিক্ষিতা যুৱতী নিবেদিতা বৰুৱাই।
উচ্চ শিক্ষা গ্ৰহণ কৰাৰ পাছতো কেৱল পৰম্পৰাগত চাকৰিৰ আশাত বহি নাথাকি নিজৰ দৈনন্দিন খৰচ উলিয়াবলৈ সামগ্ৰী ডেলিভাৰীৰ দৰে কামকো পেছা হিচাপে গ্ৰহণ কৰিছে নিবেদিতাই। বৰ্তমান তেওঁ E-Cart-ৰ ডেলিভাৰী গাৰ্ল হিচাপে কাম কৰি পুৱা বৃহৎ ডেলিভাৰী বেগটো পিঠিত লৈ গ্ৰাহকৰ পদূলিয়ে পদূলিয়ে গৈ সামগ্ৰী যোগান ধৰি আহিছে।
নিবেদিতাৰ এই যাত্ৰা বিশেষভাৱে চৰ্চাৰ বিষয় হৈ পৰিছে তেওঁৰ শিক্ষাগত আৰু সাংস্কৃতিক পৰিচয়ৰ বাবেই। সংস্কৃত বিষয়ত স্নাতকোত্তৰ ডিগ্ৰী লাভ কৰাৰ লগতে ডিব্ৰুগড় বিশ্ববিদ্যালয়ৰ পৰা Theatre Art বিষয়তো স্নাতকোত্তৰ ডিগ্ৰী অৰ্জন কৰিছে তেওঁ। অৰ্থাৎ দুটা বিষয়ত স্নাতকোত্তৰ ডিগ্ৰী লাভ কৰাৰ লগতে ছিক্কিমস্থিত ৰাষ্ট্ৰীয় নাট্য বিদ্যালয় (NSD)-ৰ পৰাও নাট্যকলাৰ প্ৰশিক্ষণ লৈ সুখ্যাতিৰে উত্তীৰ্ণ হৈছে নিবেদিতা।
শিক্ষা আৰু সংস্কৃতিৰ সৈতে গভীৰভাৱে জড়িত হৈ থকাৰ পাছতো জীৱিকাৰ বাবে কোনো কামকে হীন বুলি গণ্য নকৰা নিবেদিতাৰ এই মানসিকতাই বিশেষ তাৎপৰ্য বহন কৰিছে। মহিলা বা যুৱতী বুলি কোনো কাম কৰিব নোৱাৰে বুলি থকা ধাৰণাক আঁতৰাই নিজৰ সামৰ্থ্য আৰু আত্মবিশ্বাসেৰে আগুৱাই গৈছে তেওঁ।
প্ৰতিদিনে পুৱাই E-Cart-ৰ বৃহৎ বেগটো পিঠিত লৈ ওলাই যায় নিবেদিতা। গ্ৰাহকৰ ঠিকনা বিচাৰি তেওঁ নিজেই সামগ্ৰীসমূহ নিৰাপদে ঘৰে ঘৰে গৈ যোগান ধৰে। এই কাম কৰি থকা সময়ত কোনো ধৰণৰ ভয়, সংকোচ বা হীনমন্যতাক প্ৰশ্ৰয় নিদিয়ে তেওঁ। বৰঞ্চ দায়িত্বশীলভাৱে নিজৰ কৰ্তব্য পালন কৰি গৈছে।
নিবেদিতাৰ এই কৰ্মজীৱনত পৰিয়ালৰ ভূমিকাও গুৰুত্বপূৰ্ণ। তেওঁৰ এই সিদ্ধান্তত পৰিয়ালৰ পৰা লাভ কৰিছে যথেষ্ট সঁহাৰি। পৰিয়ালৰ সমৰ্থন আৰু নিজৰ দৃঢ় মনোবলৰ বাবেই উচ্চ শিক্ষাৰ লগতে নিজৰ জীৱিকাৰ পথো নিজে নিৰ্মাণ কৰিবলৈ সক্ষম হৈছে তেওঁ।
অৱশ্যে ডেলিভাৰী কৰ্মীয়েই নিবেদিতাৰ একমাত্ৰ পৰিচয় নহয়। নাটকৰ প্ৰতি তেওঁৰ আছে গভীৰ অনুৰাগ। সৰুৰে পৰা নাটকৰ সৈতে জড়িত নিবেদিতাই আজিও সময় পালেই নাট্যচৰ্চাত ব্যস্ত হৈ পৰে। অভিনয়ৰ লগতে গান গোৱাতো পাৰদৰ্শী নিবেদিতাই সুন্দৰ গীত পৰিৱেশন কৰিও বহুজনৰ মন জয় কৰিছে।
এফালে পিঠিত ডেলিভাৰী বেগ, আনফালে মঞ্চত অভিনয়—দুয়োটা সম্পূৰ্ণ পৃথক ক্ষেত্ৰক একেলগে আগুৱাই নিয়াৰ চেষ্টা কৰিছে নিবেদিতাই। নিজৰ খৰচ নিজে উলিয়াবলৈ ডেলিভাৰীৰ কাম কৰাৰ লগতে সুযোগ পালেই নাট্যচৰ্চাত অংশগ্ৰহণ কৰি তেওঁ দেখুৱাইছে যে কৰ্মজীৱন আৰু সৃষ্টিশীলতাৰ মাজত সামঞ্জস্য ৰক্ষা কৰাটো সম্ভৱ।
নিবেদিতাৰ এই যাত্ৰাই বিশেষকৈ যুৱ প্ৰজন্মৰ বাবে এক ইতিবাচক বাৰ্তা কঢ়িয়াই আনিছে। উচ্চ শিক্ষিত হ’লেই কেৱল নিৰ্দিষ্ট ধৰণৰ চাকৰিয়েই কৰিব লাগিব বা কোনো কাম সামাজিকভাৱে সৰু বুলি ভাবিব লাগিব—এনে মানসিকতাৰ বিপৰীতে আত্মনিৰ্ভৰশীলতাৰ এক ব্যতিক্ৰমী উদাহৰণ দাঙি ধৰিছে তেওঁ।
নিজৰ সামৰ্থ্যক বিশ্বাস কৰি যিকোনো সন্মানজনক কামক সন্মানেৰে গ্ৰহণ কৰিয়েই আগুৱাই যোৱা নিবেদিতা বৰুৱা এতিয়া মঙলদৈৰ আন বহু যুৱতীৰ বাবেও অনুপ্ৰেৰণাৰ উৎস হৈ পৰিছে। তেওঁৰ জীৱনযাত্ৰাই যেন এটা কথাই স্পষ্ট কৰি দিয়ে। কামৰ সৰু-বৰ নাই; সৰু-বৰ হয় মানুহৰ মানসিকতা।
