গুৱাহাটীৰ আইটিএ মাছখোৱা (ITA Machkhowa) প্ৰেক্ষাগৃহত জাকজমকতাৰে অনুষ্ঠিত হৈ গ’ল ‘এছিয়ানেট এৱাৰ্ডছ ২০২৬’ (Asianet Awards 2026) আৰু ‘ৰাণৱে উইক’ (Runway Week)। গ্লেমাৰ, সৃষ্টিশীলতা আৰু সফলতাৰ এই বিশেষ অনুষ্ঠানটিত মুখ্য অতিথি হিচাপে উপস্থিত থাকি বলীউডৰ জনপ্ৰিয় অভিনেত্ৰী প্ৰীতি ঝাংগিয়ানীয়ে উদ্ভাষিত কৰি তোলে।
এই ভব্য অনুষ্ঠানটিৰ অন্যতম আকৰ্ষণ আছিল অসম তথা উত্তৰ-পূৰ্বাঞ্চলৰ প্ৰখ্যাত ফেশ্বন ডিজাইনাৰ দীপাংকৰ কাশ্যপক জনোৱা সন্মান। সৃষ্টিশীলতা আৰু ফেশ্বন জগতলৈ আগবঢ়োৱা অসাধাৰণ অৱদানৰ বাবে তেওঁক সন্মানীয় ‘৭ম এছিয়ানেট পাথ ব্ৰেকিং ডাইৰেক্টৰ বঁটা’ (7th Asianet Path Breaking Director Award)-ৰে বিভূষিত কৰা হয়।
ফেশ্বন, চিনেমা, কলা আৰু সংবাদ জগতৰ কেইবাগৰাকীও বিশিষ্ট ব্যক্তি একত্ৰিত হোৱা এই সমাৰোহে উত্তৰ-পূব ভাৰতৰ নব্য উদ্ভাৱন, শৈল্পিক উৎকৃষ্টতা আৰু ৰাষ্ট্ৰীয় সাংস্কৃতিক ক্ষেত্ৰত এই অঞ্চলটোৰ বৰ্ধিত প্ৰভাৱক পুনৰবাৰ প্ৰমাণ কৰিলে।
