ফুটবল ফ’ৰ চেঞ্জ দলে ছিলঙত অনুষ্ঠিত হোৱা ১৭ বছৰ অনুৰ্ধ ৰাষ্ট্ৰীয় ফুটবল প্ৰতিযোগিতাৰ ছিলং লেগৰ চেম্পিয়ন ট্ৰফী লাভ কৰিছে৷ উল্লেখ্য যে ড্ৰিম স্প’ৰ্টছ ফাউণ্ডেশ্যনৰ উদ্যোগত আৰু অল ইণ্ডিয়া ফুটবল ফেডাৰেচন [এআইএফএফ]ৰ সহযোগত অনুষ্ঠিত হোৱা প্ৰতিভা সন্ধানী প্ৰতিযোগিতাখনৰ আজি অনুষ্ঠিত হোৱা ফাইনেলত ফুটবল ফ’ৰ চেঞ্জ দলে টাইব্ৰেকাৰৰ জড়িয়তে লাহ বেট এফ চিক ৬-৫ গলৰ ব্যৱধানত পৰাস্ত কৰি খিতাপ জয়ৰ লগতে উত্তৰ-পূৱৰ পৰা ৰাষ্ট্ৰীয় ফাইনেল ৰাউণ্ডলৈ অগ্ৰসৰ হয়৷ নিৰ্ধাৰিত সময়ত খেলখন গলশূন্যভাবে সমাপ্ত হৈছিল৷ উল্লেখ্য যে অসম ৰাইফলছৰ খেলপথাৰত প্ৰথমবাৰৰ বাবে অনুষ্ঠিত হোৱা ড্ৰিম স্প’ৰ্টছ চেম্পিয়নশ্বিপ [ডি এছ চি]ৰ শ্বিলং লেগৰ খেলত মুঠ ছটা দলে অংশগ্ৰহণ কৰিছিল৷ অংশগ্ৰহণকাৰী দলসমূহ হ’ল ঃ শ্বিলং লাজং এফ চি, লাহ বেট এফ চি, গোল্ডেন লায়ন্স ফুটবল কোচিং চেণ্টাৰ, ৰংদাজীদ ইউনাইটেড এফ চি, ফুটবল ফ’ৰ চেঞ্জ আৰু এন আৰ এল ফুটবল একাডেমী৷ দলসমূহক দুটা গ্ৰুপত ভাগ কৰাৰ পাছত প্ৰতিটো গ্ৰুপৰ শীৰ্ষ দল দুটাই ফাইনেলত অংশ লয়৷ স্মৰ্তব্য যে একমাত্ৰ এআইএফএফৰ স্বীকৃতিপ্ৰাপ্ত ক্লাব আৰু একাডেমীসমূহেহে এই প্ৰতিযোগিতাত অংশগ্ৰহণৰ যোগ্যতা অৰ্জন কৰিছে৷ ভাৰতৰ আগশাৰীৰ ক্ৰীড়া প্ৰযুক্তি কোম্পানী ড্ৰিম স্প’ৰ্টছৰ দানশীল শাখা ড্ৰিম স্প’ৰ্টছ ফাউণ্ডেশ্যনে আৰম্ভ কৰা ড্ৰিম স্প’ৰ্টছ চেম্পিয়নশ্বিপ দেশৰ এতিয়ালৈকে দ্বিতীয়খন প্ৰতিভা সন্ধানী ১৭ বছৰ অনুৰ্ধ ফুটবল প্ৰতিযোগিতা৷ এই প্ৰতিযোগিতাৰ লক্ষ্য হৈছে উচ্ছাকাংক্ষী ফুটবল চেম্পিয়নসকলক নিজৰ দক্ষতাক উচ্ছতম পৰ্যায়ত প্ৰদৰ্শনৰ বাবে এখন উপযুক্ত মঞ্চ প্ৰদান কৰা লগতে ভাৰতীয় ফুটবলত যুৱক-যুৱতী ভিত্তিক প্ৰতিযোগিতাসমূহক অধিক পেছাদাৰী আৰু উন্নত কৰা৷ দেশৰ সকলো প্ৰান্ততে এই প্ৰতিযোগিতা আয়োজন কৰা হৈছে৷ মুম্বাই, কলকাতা আৰু শ্বিলং লেগৰ খেল সমাপ্ত হোৱাৰ পাছত এতিয়া দিল্লী, বেংগালুৰু আৰু গোৱাত এই প্ৰতিযোগিতা অনুষ্ঠিত হৈছে৷ অহা ১৮ এপ্ৰিলত আঞ্চলিক ৰাউণ্ডৰ পৰ্যায় সম্পূৰ্ণ হ’ব৷ তাৰ পিছত অহা মে’ মাহত মুম্বাইত অনুষ্ঠিত হ’বলগীয়া ৰাষ্ট্ৰীয় ফাইনেল প্ৰতিযোগিতাত শীৰ্ষ আঠটা দলে অংশগ্ৰহণ কৰিব৷ ইফালে, এআইএফএফৰ দ্বাৰা নিয়োগ কৰা নিৰ্বাচকে এই প্ৰতিযোগিতাৰ পৰাই প্ৰতিভাবান খেলুৱৈসকলক বাছনি কৰি জুনত অনুষ্ঠিত হ’বলগীয়া ৰাষ্ট্ৰীয় শিবিৰলৈ যুৱ প্ৰতিভা নিৰ্বাচন কৰিব৷
