হাইলাকান্দিত জব্দ ৫৫০ বস্তা ইউৰিয়া সাৰ। অসমৰ কৃষকৰ বাবে আবণ্টিত ৰসায়নিক সাৰ সৰবৰাহ হৈছে বহিঃৰাজ্যলৈ। অসমৰ পৰা মিজোৰামলৈ অবৈধভাবে সৰবৰাহ কৰি থকা অৱস্থাত হাইলাকান্দিত জব্দ ৫৫০ বস্তা ইউৰিয়া সাৰ। শুকুৰবাৰে নিশা হাইলাকান্দি আৰক্ষীয়ে জিলাখনৰ জামিৰা এলেকাত এখন ট্ৰাকৰ পৰা জব্দ কৰে এই বৃহৎ পৰিমাণ সাৰখিনি। গোপন সূত্ৰৰ পম খেদি জামিৰাত আৰক্ষীয়ে WB 75 6760 নম্বৰৰ ট্ৰাকখন নিয়মীয়া তালাচীত ১৫৪ নং ৰাষ্ট্ৰীয় ঘাইপথত জব্দ কৰে। গাড়ীৰ চালকৰ লগতে এই সাৰ সৰবৰাহৰ কোনো বৈধ নথি নথকাৰ বাবে আৰক্ষী চালক জনক গ্ৰেপ্তাৰ কৰি সোধা-পোছা আৰম্ভ কৰে। বৰ্তমানে এই সাৰ সৰবৰাহ ব্যবসায়ৰ আৰত থকা চক্ৰৰ সন্ধানত আৰক্ষীয়ে অভিযান অব্যাহত ৰাখিছে।
