গুৱাহাটী, ১০ জুন, NKTV:লংকাৰ কাকীত তিনি হাজাৰ বিঘাৰ ৰবৰ বাগানৰ উচ্ছেদিত পৰিয়ালৰ খবৰ ল’বলৈ গৈ উচ্ছেদিতৰ ক্ষোভৰ সন্মুখীন হ’ল সাংসদ প্ৰদ্যুৎ বৰদলৈ। যোৱা ৬ জুনত হোজাই জিলা প্ৰশাসনে লংকাৰ কাকীত তিনি হাজাৰ বিঘাৰ ৰবৰ বাগানত উচ্ছেদ অভিযান চলায়। ইয়াৰ পাছত আজি উচ্ছেদিত লোকসকলৰ অৱস্থাৰ বুজ লবলৈ লংকাত উপস্থিত হয় নগাঁওৰ সাংসদ প্ৰদ্যুৎ বৰদলৈ। কিন্ত অঞ্চলটোত উপস্থিত হোৱাৰ পাছতে একাংশ লোকৰ ৰোষৰ সন্মুখীন হয় সাংসদ প্ৰদ্যুৎ বৰদলৈ। জানিব পৰা মতে, সাংসদগৰাকীয়ে উপস্থিত হৈ লোকসকলৰ অৱস্থাৰ বুজ লয় যদিও একাংশ উচ্ছেদিত লোকে সাংসদজনক ৰবৰ বাগানখন পৰিদৰ্শনৰ অনুৰোধ জনাইছিল। কিন্তু সাংসদগৰাকীয়ে “সময় নাই” বুলি মন্তব্য কৰাত ক্ষুণ্ণ হৈ পৰে লোকসকল। লোকসকলে সাংসদগৰাকীৰ এনে আচৰণত ক্ষোভিত হৈ প্ৰদ্যুৎ বৰদলৈ গ’ বেক’ ধ্বনি দিয়ে। এনে পৰিস্থিতিৰ সৃষ্টি হোৱাৰ লগে-লগেই সাংসদজনে সেই স্থান ত্যাগ কৰে। আনহাতে নগাঁও সমষ্টিৰ সাংসদজনে একাংশ উচ্ছেদিত লোকৰ ক্ষোভৰ বলি হ’ব লগা হোৱা ঘটনাটোক কেন্দ্ৰ কৰি স্বাভাৱিকতেই প্ৰতিক্ৰিয়াৰ সৃষ্টি কৰিছে।
