চীনে নিজৰ কনিষ্ঠ মহাকাশচাৰীক মহাকাশলৈ পঠিওৱাৰ কথা ঘোষণা কৰিছে। চীনৰ পৰৱৰ্তী মানৱ সম্পন্ন মহাকাশ অভিযান শ্বেনঝৌ-২১ক শুকুৰবাৰে নিশা উৎক্ষেপণ কৰা হ’ব। চীনৰ টিয়াংগং মহাকাশ কেন্দ্ৰলৈ প্ৰেৰণ কৰা হ’ব মহাকাশচাৰীকেইজনক। ইয়াত তিনিজন মহাকাশচাৰী আৰু চাৰিটা লেব মাউছ থাকিব।
মিছন কমাণ্ডাৰ হ’ব ৪৮ বছৰীয়া জাং লু, যিয়ে পূৰ্বে শ্বেনঝৌ-১৫ মিছনত উৰা মাৰিছিল। তেওঁৰ সৈতে পেলোড বিশেষজ্ঞ হিচাপে জাং হংজাং আৰু বিমান অভিযন্তা হিচাপে ৱু ফেইয়ে যোগ দিব। ৩২ বছৰীয়া ৱু ফেই হ’ব চীনৰ আটাইতকৈ কম বয়সীয়া মহাকাশচাৰী। ১৮ বছৰ বয়সত মহাকাশ ভ্ৰমণ কৰা আটাইতকৈ কম বয়সীয়া ব্যক্তি অলিভাৰ ডেমেন। ২০০২ চনৰ ২০ আগষ্টত জন্মগ্ৰহণ কৰা অলিভাৰে ২০২১ চনৰ ২০ জুলাইত ব্লু অৰিজিনৰ এন এছ-১৬ বিমানত মহাকাশলৈ উৰা মাৰিছিল।
কেতিয়া আৰু ক’ত আৰম্ভ হ’ব এই অভিযান?
চীন মানৱ সম্পন্ন মহাকাশ সংস্থা (চিএমএছএ)ৰ মতে, চীনৰ জিউকুৱান উপগ্ৰহ উৎক্ষেপণ কেন্দ্ৰৰ পৰা ১১:৪৪ বজাত এই অভিযান আৰম্ভ হ’ব। (স্থানীয় সময়) শুকুৰবাৰে। প্ৰতি ছমাহৰ মূৰে মূৰে তিনিজন নতুন মহাকাশচাৰীক টিয়াংগং মহাকাশ কেন্দ্ৰলৈ প্ৰেৰণ কৰা হয়, পূৰ্বৰ ক্ৰুৰ ঠাইত।
প্ৰথমবাৰৰ বাবে মহাকাশলৈ নিগনি প্ৰেৰণ কৰিব চীনে
এই অভিযানত চাৰিটা নিগনি (দুটা মতা আৰু দুটা মাইকী)ও অন্তৰ্ভুক্ত কৰা হৈছে। বিজ্ঞানীসকলে শূন্য-মাধ্যাকৰ্ষণ শক্তিয়ে শৰীৰৰ ওপৰত কি প্ৰভাৱ পেলাব সেয়া পৰীক্ষা কৰিব।
ছোভিয়েট ইউনিয়নে প্ৰথমে ১৯৫৭ চনত পৃথিৱীৰ কক্ষপথলৈ এটা লাইকা নামৰ এটা কুকুৰ পঠিয়াইছিল। আমেৰিকা আৰু ফ্ৰান্সে ১৯৪০ আৰু ১৯৬০ চনত বান্দৰ আৰু অন্যান্য প্ৰাণী প্ৰেৰণ কৰিছিল। বেং, মাছ, পোক-পৰুৱা, শহাপহু আদি সৰু সৰু জীৱকো জৈৱিক আৰু বিৱৰ্তনৰ অধ্যয়নৰ বাবে প্ৰেৰণ কৰা হৈছে।
এই কাৰ্যসূচী চীনৰ মহাকাশ পৰিকল্পনাৰ অংশ, যিয়ে আমেৰিকা আৰু ৰাছিয়াৰ সৈতে খোজ মিলাবলৈ কোটি কোটি ডলাৰ বিনিয়োগ কৰিছে। ইতিমধ্যে চীনে মংগল আৰু চন্দ্ৰত ৰবটিক ৰ’ভাৰ অৱতৰণ কৰিছে। এতিয়া ইয়াৰ লক্ষ্য হৈছে ২০৩০ চনৰ ভিতৰত চন্দ্ৰলৈ মানুহ পঠিয়াই তাত ঘাটি স্থাপন কৰা।
