টাইৱানৰ আশে-পাশে চীনে আৰম্ভ কৰিছে এতিয়ালৈকে সৰ্ববৃহৎ সামৰিক অনুশীলন। জাষ্টিচ মিছন ২০২৫ নামেৰে নামকৰণ কৰা এই অনুশীলন সোমবাৰৰ পৰা আৰম্ভ হয়। লক্ষ্য হৈছে যে, ভৱিষ্যতে সংঘাতৰ সৃষ্টি হ’লে চীনে টাইৱানক বাহিৰৰ জগতৰ পৰা সম্পূৰ্ণৰূপে বিচ্ছিন্ন কৰি চাৰিওফালৰ পৰা ঘেৰি ৰাখিব পাৰে। চীনৰ ইষ্টাৰ্ণ থিয়েটাৰ কমাণ্ডৰ মতে, এই অনুশীলনত সেনা, নৌসেনা আৰু বায়ুসেনা জড়িত হৈ আছে।
চীনে বৃহৎ সংখ্যক সৈন্য, যুদ্ধজাহাজ, যুঁজাৰু বিমান, আৰ্টিলাৰী, মিছাইল ব্যৱস্থা আদি নিয়োগ কৰিছে। অনুশীলনৰ সময়ত স্থল আৰু সাগৰীয় লক্ষ্যত গুলীচালনা কৰা হৈছে, আৰু টাইৱানৰ মূল বন্দৰসমূহ অৱৰোধ কৰাৰ কৌশল অভ্যাস কৰা হৈছে। টাইৱানৰ প্ৰতিৰক্ষা মন্ত্ৰালয়ে জনোৱা মতে, সোমবাৰে দ্বীপটোৰ চাৰিওফালে ৮৯খন চীনৰ বিমান, ১৪খন জাহাজ আৰু ১৪খন ক’ষ্ট গাৰ্ডৰ নাও চলি থকাৰ বিপৰীতে পশ্চিম প্ৰশান্ত মহাসাগৰীয় অঞ্চলতো আৰু চাৰিখন যুদ্ধজাহাজ দেখা গৈছে।
চীনৰ সামুদ্ৰিক সুৰক্ষা প্ৰশাসনে টাইৱানৰ আশে-পাশে থকা ৭টা সাগৰীয় অঞ্চলক অনুশীলনৰ অঞ্চল হিচাপে নিৰ্ধাৰণ কৰিছে। মঙলবাৰলৈকে এই অঞ্চলসমূহত ফায়াৰিং অব্যাহত থাকিব। এই অনুশীলনক আজিলৈকে আটাইতকৈ ডাঙৰ বুলি গণ্য কৰা হৈছে, কিয়নো ই পূৰ্বতকৈ বৃহৎ অঞ্চল সামৰি লৈছে আৰু বিশেষকৈ ই টাইৱানৰ ওচৰত। প্ৰথম অৱস্থাত মাত্ৰ পাঁচটা অঞ্চলত গুলীচালনা হ’ব বুলি খবৰ ওলাইছিল যদিও পিছত ইয়াক ৭টালৈ বৃদ্ধি কৰা হয়।
এই সামৰিক অনুশীলনে জনসাধাৰণকো প্ৰভাৱিত কৰিছে। চীনৰ পৰিবহণ মন্ত্ৰালয়ৰ তথ্য অনুসৰি মঙলবাৰৰ অনুশীলনৰ ফলত এক লাখৰো অধিক আন্তঃৰাষ্ট্ৰীয় যাত্ৰীৰ বিমান যাত্ৰাত প্ৰভাৱ পৰিব। ইয়াৰ উপৰিও প্ৰায় ৮০খন ঘৰুৱা বিমান বাতিল কৰা হৈছে।
২০২২ চনৰ পিছত এইটো চীনৰ ষষ্ঠটো বৃহৎ সামৰিক অনুশীলন। ২০২২চনত চীনে তেতিয়াৰ আমেৰিকাৰ সদনৰ অধ্যক্ষ নেন্সি পেলোছিৰ টাইৱান ভ্ৰমণৰ পিছতো বৃহৎ পৰিসৰৰ সামৰিক অনুশীলন চলাইছিল। বৰ্তমানৰ অনুশীলনসমূহ এনে সময়তে চলি আছে যেতিয়া জাপানৰ প্ৰধানমন্ত্ৰী ছানাই তাকাইচিয়ে কয় যে, চীনে টাইৱানক আক্ৰমণ কৰিলে জাপানে সামৰিক সঁহাৰি দিব পাৰে।
টাইৱানে টাইৱানক নিজৰ ভূখণ্ডৰ অংশ বুলি চীনৰ দাবীক কঠোৰভাৱে নাকচ কৰিছে। টাইৱানে কয় যে, দ্বীপটোৰ ভৱিষ্যত কেৱল ইয়াৰ জনসাধাৰণে নিৰ্ধাৰণ কৰিব। টাইৱানৰ প্ৰতিৰক্ষা মন্ত্ৰালয়ে প্ৰকাশ কৰিছে যে, চীনৰ গুলীচালনাই টাইৱানৰ ওপৰত সামৰিক হেঁচা প্ৰয়োগ কৰাই নহয় সমগ্ৰ অঞ্চল আৰু চুবুৰীয়া দেশসমূহৰ প্ৰতি ভাবুকি বৃদ্ধি কৰিছে।
টাইৱানৰ বাবে আমেৰিকাই ১১.১ বিলিয়ন ডলাৰৰ অস্ত্ৰ পেকেজ ঘোষণা কৰাৰ মাত্ৰ ১১ দিনৰ পিছতে এই অনুশীলনসমূহ আৰম্ভ হৈছিল। চীনে ইয়াক বাহ্যিক হস্তক্ষেপ বুলি অভিহিত কৰি ইয়াৰ বাবে ৰঙা ৰেখা বুলি উল্লেখ কৰিছে। বিশেষজ্ঞসকলৰ মতে, চীনে এই অনুশীলনৰ জৰিয়তে আমেৰিকা আৰু ইয়াৰ মিত্ৰ দেশসমূহলৈ এক শক্তিশালী বাৰ্তা প্ৰেৰণ কৰাৰ লক্ষ্য লৈছে। এইবাৰ চীনে অনুশীলনৰ সময়ত নতুন আৰু ভৱিষ্যতৰ প্ৰযুক্তিও প্ৰদৰ্শন কৰে। ইয়াৰ ভিতৰত আছে মানৱৰূপী ৰবট, মাইক্ৰ’ ড্ৰ’ন, আৰু অস্ত্ৰধাৰী ৰবটিক কুকুৰ, যিবোৰক টাইৱানত আক্ৰমণৰ দৃশ্য হিচাপে দেখুওৱা হৈছিল। টাইৱানে এই অনুশীলনসমূহক তীব্ৰ গৰিহণা দিছে। হাই এলাৰ্টত আছে টাইৱানৰ সেনাবাহিনী। টাইৱানেও আমেৰিকাৰ পৰা লাভ কৰা HIMARS ৰকেট ব্যৱস্থাকে ধৰি নিজৰ অস্ত্ৰ-শস্ত্ৰ প্ৰদৰ্শন কৰিছে। এই ৰকেটসমূহে চীনৰ উপকূলীয় অঞ্চলত আঘাত কৰিব পাৰে।
