গাৰো জনগোষ্ঠীৰ পৰম্পৰা, সংস্কৃতি আৰু ঐতিহ্য সংৰক্ষণৰ আহ্বান মুখ্যমন্ত্ৰীৰ
মেঘালয়ৰ পশ্চিম গাৰো পাহাৰ জিলাৰ গাৰো হেৰিটেজ ভিলেজত আয়োজিত গাৰো জনগোষ্ঠীৰ পৰম্পৰাগত ‘ৱাংগালা’ উৎসৱৰ সোণালী জয়ন্তী উদযাপন কাৰ্যসূচীত মুখ্য অতিথি হিচাপে অংশগ্ৰহণ কৰে অসমৰ মুখ্যমন্ত্ৰী ড০ হিমন্ত বিশ্ব শৰ্মাই।
উল্লেখ্য যে, গাৰো জনগোষ্ঠীৰ অন্যতম প্ৰধান উৎসৱ হৈছে ৱাংগালা। কৃষি আৰু শস্য চপোৱাৰ সৈতে গভীৰভাৱে সম্পৰ্কিত এই উৎসৱক ‘হাণ্ড্ৰেড ড্ৰাম ফেষ্টিভেল’ বুলিও জনা যায়। উৎসৱৰ অংশ হিচাপে গাৰো জনগোষ্ঠীৰ শিল্পীসকলে পৰম্পৰাগত সাজ-পোছাক পৰিধান কৰি বিভিন্ন লোকনৃত্য আৰু সংগীত পৰিৱেশন কৰে। এই উৎসৱে গাৰো জনগোষ্ঠীৰ চহকী সাংস্কৃতিক পৰিচয়, পৰম্পৰা আৰু আধ্যাত্মিক বিশ্বাসক প্ৰতিফলিত কৰে।
অনুষ্ঠানত ভাষণ প্ৰদান কৰি মুখ্যমন্ত্ৰী ড০ হিমন্ত বিশ্ব শৰ্মাই কয় যে, ৱাংগালা কেৱল এটা উৎসৱ নহয়, বৰঞ্চ ই ভাৰতৰ জ্ঞান, সভ্যতা আৰু সাংস্কৃতিক ঐতিহ্যৰ এক অমূল্য প্ৰতিফলন। এই উৎসৱে মানুহ আৰু প্ৰকৃতিৰ মাজত থকা প্ৰাচীন সম্পৰ্কৰ লগতে সৰ্বশক্তিমান ভগৱানৰ প্ৰতি থকা অটল বিশ্বাস আৰু কৃতজ্ঞতাৰ মনোভাৱ সুন্দৰভাৱে প্ৰকাশ কৰে।
তেওঁ উল্লেখ কৰে যে, ১৯৭৫ চনত তুৰাৰ চানমাৰি খেলপথাৰত মাত্ৰ দহখন গাঁৱৰ অংশগ্ৰহণেৰে এই উৎসৱৰ আনুষ্ঠানিক যাত্ৰা আৰম্ভ হৈছিল। মেঘালয়ৰ তদানীন্তন মুখ্যমন্ত্ৰী কেপ্টেইন উইলিয়ামছনৰ পৰামৰ্শক্ৰমে আৰম্ভ হোৱা এই উৎসৱে আজি এক বিশাল সাংস্কৃতিক পৰিসৰ লাভ কৰিছে। বৰ্তমান প্ৰায় এহেজাৰখন গাঁও আৰু দুহেজাৰতকৈও অধিক নৃত্যশিল্পীৰ অংশগ্ৰহণেৰে ৱাংগালাই এক অনন্য সাংস্কৃতিক উৎসৱৰ ৰূপ পৰিগ্ৰহ কৰিছে।
মুখ্যমন্ত্ৰীগৰাকীয়ে লগতে কয় যে, ৱাংগালা উৎসৱৰ সৈতে কৃষি, শস্য উৎপাদন আৰু প্ৰকৃতিৰ প্ৰতি কৃতজ্ঞতাৰ এক নিবিড় সম্পৰ্ক আছে। শস্য চপোৱাৰ পিছত প্ৰথম ফচল আৰু চাউলৰ সুৰা সৰ্বশক্তিমান ঈশ্বৰৰ ওচৰত অৰ্পণ কৰাৰ পৰম্পৰাই মানুহক প্ৰকৃতিৰ পৰা লাভ কৰা আশীৰ্বাদৰ প্ৰতি বিনম্ৰ আৰু কৃতজ্ঞ হ’বলৈ শিকায়।
প্ৰধানমন্ত্ৰী নৰেন্দ্ৰ মোদীৰ দূৰদৰ্শী নেতৃত্বৰ কথা উল্লেখ কৰি মুখ্যমন্ত্ৰীয়ে কয় যে, দেশৰ জনজাতীয় জনগোষ্ঠীসমূহৰ ঐতিহ্য আৰু অৱদানক নতুন গুৰুত্ব প্ৰদান কৰা হৈছে। ভগৱান বীৰছা মুণ্ডাৰ জন্মজয়ন্তী উপলক্ষে ‘জনজাতীয় গৌৰৱ দিৱস’ উদযাপন ইয়াৰ এক উল্লেখযোগ্য নিদৰ্শন। অসমৰ চৰকাৰেও জনজাতীয় জনগোষ্ঠীসমূহৰ ভাষা, সংস্কৃতি আৰু পৰম্পৰা সংৰক্ষণৰ বাবে বিশেষ পদক্ষেপ গ্ৰহণ কৰিছে বুলি তেওঁ উল্লেখ কৰে।
তেওঁ যুৱ প্ৰজন্মক নিজৰ মাতৃভাষা, পৰম্পৰা আৰু সাংস্কৃতিক পৰিচয়ক লৈ গৌৰৱবোধ কৰিবলৈ আহ্বান জনায়। আধুনিক শিক্ষা আৰু প্ৰযুক্তিৰ সৈতে আগবাঢ়ি যোৱাৰ সমান্তৰালভাৱে নিজৰ শিপা আৰু ঐতিহ্যৰ সৈতে সংযুক্ত হৈ থকাৰ ওপৰতো তেওঁ গুৰুত্ব আৰোপ কৰে।
অসম আৰু মেঘালয়ৰ মাজৰ সম্পৰ্ক কেৱল ভৌগোলিক সীমাৰ মাজতে আৱদ্ধ নহয়, বৰঞ্চ ই ঐতিহাসিক, সাংস্কৃতিক আৰু আৱেগিক সম্পৰ্কৰ আধাৰত গঢ় লৈ উঠিছে বুলি মন্তব্য কৰে মুখ্যমন্ত্ৰীগৰাকীয়ে। ৱাংগালা উৎসৱে দুয়োখন ৰাজ্যৰ জনসাধাৰণৰ মাজত সাংস্কৃতিক আদান-প্ৰদান আৰু পাৰস্পৰিক সম্পৰ্ক অধিক সুদৃঢ় কৰিব বুলি তেওঁ আশা প্ৰকাশ কৰে।
অনুষ্ঠানত মেঘালয় চৰকাৰৰ কৃষি আৰু কৃষক কল্যাণ বিভাগৰ মন্ত্ৰী টিমোথি ডি চিৰা, ৱাংগালা উৎসৱ উদযাপন সমিতিৰ সভাপতি ৰোনাল্ড ৰিকমেন চাংমাকে ধৰি বহু গণ্য-মান্য ব্যক্তি উপস্থিত থাকে।
উৎসৱৰ সোণালী জয়ন্তী উপলক্ষে মুখ্যমন্ত্ৰী ড০ হিমন্ত বিশ্ব শৰ্মাই মেঘালয় চৰকাৰ, আয়োজক সমিতি আৰু সমগ্ৰ গাৰো জনগোষ্ঠীলৈ আন্তৰিক অভিনন্দন জ্ঞাপন কৰে। ৫০ বছৰীয়া এই সাংস্কৃতিক যাত্ৰাই ভৱিষ্যৎ প্ৰজন্মক নিজৰ ঐতিহ্য, সংস্কৃতি আৰু প্ৰকৃতিৰ প্ৰতি শ্ৰদ্ধাশীল হ’বলৈ অনুপ্ৰাণিত কৰিব বুলিও তেওঁ আশা প্ৰকাশ কৰে।
