নতুন দিল্লীত অনুষ্ঠিত ১৮সংখ্যক BRICS সন্মিলনত শনিবাৰে সৰ্বসন্মতিক্ৰমে গ্ৰহণ কৰা হয় ‘নতুন দিল্লী ঘোষণা ২০২৬’। সন্মিলনৰ প্ৰথম দিনটোতে প্ৰধানমন্ত্ৰী নৰেন্দ্ৰ মোদীয়ে যৌথ ঘোষণাখনত সকলো সদস্য ৰাষ্ট্ৰৰ সহমত থকাৰ কথা ঘোষণা কৰে।
প্ৰধানমন্ত্ৰী মোদীয়ে কয় যে কোনো সদস্য ৰাষ্ট্ৰই যৌথ ঘোষণাখনৰ বিৰুদ্ধে আপত্তি উত্থাপন কৰা নাই। এই সৰ্বসন্মতিয়ে ভাৰতৰ BRICS অধ্যক্ষতাৰ বাবে এক গুৰুত্বপূৰ্ণ কূটনৈতিক সাফল্য হিচাপে বিবেচিত হৈছে।
ঘোষণাখনত বহুপাক্ষিক প্ৰতিষ্ঠানসমূহৰ সংস্কাৰৰ ওপৰত গুৰুত্ব আৰোপ কৰাৰ লগতে ৰাষ্ট্ৰসংঘৰ নিৰাপত্তা পৰিষদৰ গাঁথনিগত সংস্কাৰৰ আহ্বান জনোৱা হৈছে। ইয়াৰ উপৰি ‘একপক্ষীয় যুদ্ধ’ৰ দৰে কাৰ্যকলাপৰ বিৰোধিতা কৰাৰ লগতে মধ্যপ্ৰাচ্যৰ সামৰিক উত্তেজনাৰ পৰিপ্ৰেক্ষিতত সাগৰীয় যাতায়াত আৰু বাণিজ্যিক জাহাজৰ সুৰক্ষা নিশ্চিত কৰাৰ ওপৰতো গুৰুত্ব দিয়া হৈছে।
বিভিন্ন ভূ-ৰাজনৈতিক বিষয়ত সদস্য দেশসমূহৰ মাজত মতভেদ থকাৰ পাছতো এইদৰে সৰ্বসন্মতিক্ৰমে ঘোষণা গ্ৰহণে BRICS-ৰ ভিতৰত ঐক্য আৰু কূটনৈতিক সমন্বয়ৰ এক গুৰুত্বপূৰ্ণ বাৰ্তা বহন কৰিছে।
