অসম আৰু মেঘালয়ৰ পৰ্যটক টেক্সী চালকসকলৰ মাজত শেহতীয়াকৈ সৃষ্টি হোৱা বিবাদে মীমাংসাৰ দিশে আগবাঢ়িছে। মঙলবাৰে শ্বিলঙত দুই ৰাজ্য চৰকাৰ আৰু পৰিবহণ সংগঠনসমূহৰ মাজত অনুষ্ঠিত হয় এক উচ্চস্তৰীয় বৈঠক।
মেঘালয়ৰ উপ-মুখ্যমন্ত্ৰী এছ. ধৰ আৰু অসমৰ মন্ত্ৰী অতুল বৰাৰ উপস্থিতিত অনুষ্ঠিত বৈঠকখনত অসমৰ সাতটা আৰু মেঘালয়ৰ পাঁচটা পৰিবহণ সংগঠনৰ প্ৰতিনিধিয়ে অংশগ্ৰহণ কৰে।
যোৱা ১৯ আগষ্টত শ্বিলঙত সংঘটিত এক ঘটনাৰ পিছতে অসমৰ পঞ্জীয়নভুক্ত পৰ্যটক বাহনক কেন্দ্ৰ কৰি দুই ৰাজ্যৰ পৰিবহণ সংগঠনৰ মাজত উত্তেজনাৰ সৃষ্টি হৈছিল। পৰিস্থিতি স্বাভাৱিক কৰাৰ উদ্দেশ্যে ইয়াৰ পূৰ্বে ২২ আগষ্টত গুৱাহাটীত দুই ৰাজ্যৰ চৰকাৰৰ মাজত দ্বিপাক্ষিক আলোচনা অনুষ্ঠিত হৈছিল।
মঙলবাৰৰ বৈঠকত পৰিবহণ সংগঠনসমূহে উত্থাপন কৰা বিভিন্ন সমস্যাৰ বিষয়ে আলোচনা কৰা হয়। বিমানবন্দৰত পৰ্যটক বাহনৰ বাবে পাৰ্কিংৰ সুবিধা আৰু উন্নত শৌচাগাৰৰ ব্যৱস্থা কৰাৰ দাবীও আলোচনাত স্থান পায়। মেঘালয় চৰকাৰে সংগঠনসমূহৰ কেইবাটাও দাবী গ্ৰহণ কৰি সেইসমূহ সমাধানৰ বাবে পদক্ষেপ লোৱাৰ আশ্বাস দিয়ে।
ইফালে বাহন তালাচীৰ সময়ত চালকসকল যাতে কোনো ধৰণৰ অসুবিধাৰ সন্মুখীন নহয়, তাৰ বাবে দুই ৰাজ্যৰ আৰক্ষীৰ মাজত অধিক সমন্বয়ৰ ওপৰতো গুৰুত্ব আৰোপ কৰা হয়। ভৱিষ্যতে পৰ্যটক বাহনৰ চলাচলক লৈ কোনো সমস্যাৰ সৃষ্টি হ’লে তাৎক্ষণিকভাৱে সমাধানৰ বাবে দুই ৰাজ্যৰ পৰিবহণ আয়ুক্তক লৈ এখন উপ-সমিতি গঠনৰ সিদ্ধান্ত লোৱা হৈছে।
মন্ত্ৰী অতুল বৰাই কয় যে আগষ্টৰ ঘটনাৰ পিছতে মুখ্যমন্ত্ৰী হিমন্ত বিশ্ব শৰ্মাৰ নিৰ্দেশত তেওঁ বিষয়টোত হস্তক্ষেপ কৰিছিল। গুৱাহাটীত অনুষ্ঠিত প্ৰথমখন বৈঠকৰ পিছত প্ৰতিবাদ প্ৰত্যাহাৰ কৰা হৈছিল আৰু মঙলবাৰৰ বৈঠকখন মেঘালয়ৰ পৰিবহণ সংগঠনসমূহৰ অনুৰোধত অনুষ্ঠিত হয়।
বৰাই জানিবলৈ দিয়ে যে সংগঠনসমূহে আলোচনাত গ্ৰহণ কৰা সিদ্ধান্তসমূহ ৰূপায়ণৰ কাম আগবাঢ়িছে আৰু বৰ্তমান পৰিস্থিতি স্বাভাৱিক হৈ আছে। দুই ৰাজ্যৰ চৰকাৰে নাগৰিকৰ সুৰক্ষা, নিৰাপত্তা আৰু পৰ্যটক বাহনৰ মুক্ত চলাচল নিশ্চিত কৰাৰ লগতে ভৱিষ্যতে ভুল বুজাবুজিৰ পৰা যাতে নতুন কোনো সংঘাতৰ সৃষ্টি নহয়, সেই বিষয়তো গুৰুত্ব আৰোপ কৰিছে।
