‘লক্ষ্মীনাথ বেজবৰুৱাৰ পিছতে অসমে জন্ম দিয়া এগৰাকী অন্যতম উত্তৰসুৰী হোমেন বৰগোহাঞি’

হোমেন বৰগোহাঞিৰ ৯২সংখ্যক জন্ম দিৱস আৰু সাহিত্যিক পেঞ্চন প্রদান অনুষ্ঠানত মুখ্যমন্ত্ৰীৰ অংশগ্রহণ
অসমীয়া সাহিত্যৰ মূল্যৱান গ্রন্থৰাজি ভাৰতৰ অন্য ভাষালৈ অনুবাদ কৰাৰ বাবে ৰাজ্য চৰকাৰে প্ৰয়াস চলাইছে: মুখ্যমন্ত্রী
জনজাতীয় ভাষাৰ মাধ্যমেৰে প্ৰাথমিক বিদ্যালয়ত শিক্ষা প্ৰদানৰ বাবে ৰাজ্য চৰকাৰে পদক্ষেপ গ্রহণ কৰিছে : মুখ্যমন্ত্রী
লক্ষ্মীনাথ বেজবৰুৱাৰ পিছতে অসমে জন্ম দিয়া এগৰাকী অন্যতম উত্তৰসুৰী আছিল হোমেন বৰগোহাঞি: মুখ্যমন্ত্রী

বিশিষ্ট সাহিত্যিক হোমেন বৰগোহাঞিৰ ৯২ সংখ্যক জন্ম দিৱস আৰু ২০২৩ বৰ্ষৰ সাহিত্যিক পেঞ্চন প্রদান উপলক্ষে আজি ৰাজ্য চৰকাৰৰ উচ্চ শিক্ষা বিভাগে জনতা ভৱন পৰিসৰৰ লোক সেৱা ভৱনত আয়োজন কৰা অনুষ্ঠানত মুখ্যমন্ত্রী ড০ হিমন্ত বিশ্ব শর্মাই অংশগ্রহণ কৰে। অনুষ্ঠানত মুখ্যমন্ত্রীয়ে কথাশিল্পীগৰাকীলৈ শ্ৰদ্ধাঞ্জলি জ্ঞাপনৰ লগতে ২৩ গৰাকী সাহিত্যিকলৈ আনুষ্ঠানিকভাবে সাহিত্য পেঞ্চন আগবঢ়ায়। উল্লেখ্য যে, ২০২৩ বৰ্ষৰ সাহিত্যিক পেঞ্চনপ্রাপক সাহিত্যিকসকল হ’ল- সীতাৰাম বসুমতাৰী (বাক্সা), জয়া দেব (কাছাৰ), চম্পালাল সিনহা (কাছাৰ), বগেন গগৈ (ধেমাজি), অনুপমা নাইদিং (ডিমা হাছাও), ড০ পৰিতোষ চক্রবর্তী (গোৱালপাৰা), ড০ মলিনা ৰাভা (গোৱালপাৰা), জুলা শৰ্মা (গোলাঘাট), চেনিৰাম গগৈ (গোলাঘাট), ড০ মালিনী (যোৰহাট), ড০ অংকণ চন্দ্ৰ শইকীয়া (যোৰহাট), বিনন্দ শর্মা পূজাৰী (যোৰহাট), ৰাজলক্ষ্মী খাউণ্ড (কামৰূপ মহানগৰ), অনিল কুমাৰ বৰুৱা (কামৰূপ মহানগৰ), ড০ নন্দিতা দেৱী (কামৰূপ মহানগৰ), জয়ন্ত মাধৱ বৰা (কামৰূপ মহানগৰ), বেণুকা বিশ্বাস (কামৰূপ মহানগৰ), প্রতিমা নন্দী নাৰ্জাৰী (কোকৰাঝাৰ), বিজয় ববি দাস (শিৱসাগৰ), দিলীপ কুমাৰ বৰুৱা (শোণিতপুৰ), জ্ঞান বাহাদুৰ ছেত্রী (শোণিতপুৰ), সুমিত্রা গোস্বামী (কামৰূপ মহানগৰ) আৰু মোহন সোণোবাল (ডিব্রুগড়)।

অনুষ্ঠানত ভাষণ প্রদান কৰি মুখ্যমন্ত্রী ড০ শর্মাই কয় যে, ৰাজ্যখনৰ ভাষা, সাহিত্যৰ বিকাশ সাধনত প্রতিটো জাতি-জনগোষ্ঠীৰে অনবদ্য অৰিহণা আছে। সেইবাবে অসম চৰকাৰে বৰাক উপত্যকাকে ধৰি অসমৰ জনজাতীয় সাহিত্যিকসকলক প্ৰেৰণা যোগোৱাৰ বাবে সাহিত্যিৰ ক্ষেত্ৰলৈ উল্লেখযোগ্য অৱদান আগবঢ়োৱা সাহিত্যিকক পেঞ্চন আগবঢ়াইছে যাতে জনগোষ্ঠীয় সাহিত্যৰাজিৰ বিকাশ সাধন হয়। মুখ্যমন্ত্রীয়ে কয় যে অহা শিক্ষা বৰ্ষৰ পৰা ৰাষ্ট্ৰীয় শিক্ষা নীতি অনুসৰণ কৰি কিছু জনজাতীয় ভাষাৰ মাধ্যমেৰে প্ৰাথমিক বিদ্যালয়ত শিক্ষা প্রদানৰ বাবে ৰাজ্য চৰকাৰে পদক্ষেপ গ্রহণ কৰিছে। তিনিটা বছৰৰ ৰোড মেপ সন্মুখত ৰাখি অহা বৰ্ষৰ এপ্রিল মাহৰ পৰা কিছু সংখ্যক নির্বাচিত বিদ্যালয়ত এইদৰে শিক্ষা প্রদান কৰা হ’ব বুলিও তেওঁ মন্তব্য কৰে।

অসম চৰকাৰে সাহিত্যৰ ক্ষেত্ৰখনক সমৃদ্ধ কৰাৰ বাবে পদক্ষেপ গ্রহণ কৰিছে বুলি উল্লেখ কৰি মুখ্যমন্ত্রীয়ে কয় যে, অসম প্রকাশন পৰিষদৰ উদ্যোগত ৰাজ্যখনৰ বিভিন্ন ঠাইত গ্রন্থমেলা আয়োজন কৰাৰ লগতে গ্রন্থ অধ্যয়নৰ বাবে এটা আন্দোলন সূচনা কৰাত চৰকাৰে গুৰুত্ব আৰোপ কৰিছে। মুখ্যমন্ত্রীয়ে কয় যে অসমীয়া ভাষাৰ মূল্যৱান গ্রন্থ ভাৰতৰ বিভিন্ন ভাষালৈ অনুবাদ কৰাৰ বাবেও ৰাজ্য চৰকাৰে এক প্রচেষ্টা আৰম্ভ কৰিব বিচাৰিছে। ‘ৰংমিলিৰ হাঁহি’ব দৰে উচ্চমান বিশিষ্ট উপন্যাস তথা বিভিন্ন মননশীল গদ্য, পদ্য অসমৰ চাৰিসীমাৰ ভিতৰতে সীমাবদ্ধ কৰি ৰখা হৈছে বুলি মন্তব্য কৰি তেওঁ কয় যে অসমীয়া গ্রন্থসমূহৰ মানদণ্ড ভাৰতবৰ্ষৰ অন্য ভাষাৰ সমপর্যায়ৰ। অসমীয়া মানবিশিষ্ট সাহিত্যৰ বিষয়ে ভাৰতৰ আন ৰাজ্যৰ পাঠক সমাজেও জনাৰ প্রয়োজনীয়তা আছে বুলি তেওঁ কয়। মুখ্যমন্ত্রীয়ে কয় যে অসমৰ গ্রন্থসমূহ ভাৰতৰ আন ভাষালৈ অনুবাদিত হ’লে দেশৰ বৌদ্ধিক মহলে অসমৰ বৌদ্ধিক চিন্তাধাৰা, সৃষ্টিশীলতাৰ বিষয়ে অৱগত হ’ব পাৰিব। অসম প্রকাশন পৰিষদক প্রতি বছবে কমেও দহখনকৈ অসমীয়া ভাষাৰ গ্রন্থ হিন্দী আৰু অন্যান্য ভাৰতীয় ভাষালৈ অনুবাদ কৰাৰ বাবে প্রচেষ্টা ল’বলৈ মুখ্যমন্ত্রীয়ে আহ্বান জনায় যাতে এই অনুবাদকাৰ্যৰ জৰিয়তে অসমীয়া ভাষা-সাহিত্যৰ উচ্চমান সন্দৰ্ভত সমগ্র দেশে ভালদৰে অৱগত হ’ব পাৰে। মহাবীৰ লাচিত বৰফুকনৰ জীৱনভিত্তিক গ্রন্থ এখন প্রণয়নৰ কাম বর্তমান পূর্ণগতিত চলি আছে বুলি সদৰি কৰি মুখ্যমন্ত্ৰীয়ে কয় যে আগন্তুক কেইটামান মাহৰ ভিতৰতে ভাৰতবৰ্ষৰ বিভিন্ন ভাষাত এই গ্রন্থ আনুষ্ঠানিকভাবে প্রকাশ কৰা হ’ব আৰু সমগ্র দেশৰ প্ৰায় দহ হাজাৰ মহাবিদ্যালয়ৰ গ্রন্থাগাবলৈ এই গ্রন্থ প্ৰেৰণ কৰা হ’ব। অসমীয়া ভাষা-সাহিত্য তথা জনগোষ্ঠীয় ভাষা-সাহিত্যক ৰাজ্য চৰকাৰে এক নতুন দিগন্তলৈ লৈ যোৱাৰ প্ৰয়াস চলাইছে বুলিও মুখ্যমন্ত্রীয়ে কয়।

আনহাতে, প্রয়াত কথাশিল্পী হোমেন বৰগোহাঞি অসমৰ বৌদ্ধিক আকাশৰ এজন শক্তিশালী লেখক বুলি মন্তব্য কৰি মুখ্যমন্ত্রীয়ে কয় যে লক্ষ্মীনাথ বেজবৰুৱাৰ পিছতে অসমে জন্ম দিয়া যিকেইগৰাকী বিৰল সাহিত্যিক আছিল সেইসকলৰ ভিতৰত এগৰাকী অন্যতম উত্তৰসুৰী আছিল হোমেন বৰগোহাঞি। সাহিত্যিক আৰু সাংবাদিক হিচাপে অসমীয়া জাতীয় জীৱনলৈ হোমেন বৰগোহাঞিৰ প্ৰচুৰ অৱদান আছে। মুখ্যমন্ত্রীয়ে কয় যে বৰগোহাঞিৰ অনন্য গদ্যৰ স্বাদ যিয়ে এবাৰ লৈ পাইছে তেওঁ তাক আজীবন পাহৰিব নোৱাৰে। অত্যন্ত সচেতনভাৱে কৰা শব্দচয়ন আৰু নির্মেদ গদ্যৰে বৰগোহাঞিয়ে অসমীয়া সাহিত্যলৈ যি অৱদান আগবঢ়াই গ’ল সেয়া জাতিটোৱে সদায়ে কৃতজ্ঞতাৰে স্মৰণ কৰি থাকিব। তেওঁ কয় যে সাহিত্যৰ ক্ষেত্ৰখনৰ সমান্তৰালকৈ হোমেন বৰগোহাঞিয়ে সুদীর্ঘ অর্ধশতিকাজুৰি সাংবাদিকতাৰ ক্ষেত্ৰখনৰ সৈতেও জড়িত হৈ থাকি অসমীয়া সাংবাদিকতাৰ এক নতুন পৰিভাষাৰ সৃষ্টি কৰিছিল। সকলো কামকেই পৰকাস্তা স্তৰলৈ লৈ যোৱা বৰগোহাঞিয়ে অসমৰ সাংবাদিকতাকো এক অন্য স্তৰলৈ লৈ গৈছিল।

আজিৰ এই অনুষ্ঠানত শিক্ষা আদি বিভাগৰ মন্ত্রী ডাঃ ৰণোজ পেণ্ড, জনস্বাস্থ্য কাৰিকৰী আদি বিভাগৰ মন্ত্ৰী জয়ন্ত মল্লবৰুৱা, অসম চৰকাৰৰ শিক্ষা উপদেষ্টা ড০ ননী গোপাল মহন্ত, অতিৰিক্ত মুখ্য সচিব বিশ্ব ৰঞ্জন চামাল প্রমুখ্যে গণ্য-মান্য ব্যক্তিসকল উপস্থিত থাকে।