সামাজিক মাধ্যমৰ জৰিয়তে তালিবানৰ পাশৱিক আৰু অমানৱীয় কাণ্ডৰ সমৰ্থনত পোষ্ট দি ৰঙা ঘৰলৈ এজন ছাত্ৰ। তেজপুৰ চিকিৎসা মহাবিদ্যালয়ৰ MBBSৰ তৃতীয় বৰ্ষৰ ছাত্ৰ নাডিম আখটাৰক শুকুৰবাৰে হাইলাকান্দি জিলাৰ নিজা বাসগৃহৰ পৰা অসম আৰক্ষীয়ে গ্ৰেপ্তাৰ কৰিছে। ইতিমধ্যে, হাইলাকান্দি থানাত পঞ্জীয়নভূক্ত গোচৰৰ বিপৰীতে ধৃত নাডিমৰ ওপৰত তদন্ত আৰম্ভ কৰিছে বুলি শোণিতপুৰৰ আৰক্ষী অধীক্ষক ধনঞ্জয় ঘনাৱটে আজি সাংবাদিকৰ আগত সদৰি কৰিছে।
ইফালে, শোণিতপুৰ আৰক্ষীয়ে আফ্ৰিকা আৰু আমেৰিকাৰ আন্তঃৰাষ্ট্ৰীয় ভুৱা টেলিফোন নম্বৰ ব্যৱহাৰ কৰি ঢেকিয়াজুলিৰ এগৰাকী যুৱতীলৈ অশ্লীল ফটো প্ৰেৰণ কৰি যুৱতী গৰাকীক ব্লেক মেইল কৰাৰ অভিযোগত ওৱাহিদ আলম নামৰ এজন যুৱকক গ্ৰেপ্তাৰ কৰিছে।
