দেশৰ আভ্যন্তৰীণ নিৰাপত্তাৰ ক্ষেত্ৰত এক উল্লেখযোগ্য সফলতা অৰ্জন কৰিছে কেন্দ্ৰীয় সংৰক্ষিত আৰক্ষী বাহিনী (CRPF)-এ। সুদীৰ্ঘ ৪৭ বছৰৰ মূৰত বাহিনীটোৱে গঢ়িবলৈ সক্ষম হৈছে এক বিৰল অভিলেখ। একেৰাহে ১২ মাহ ধৰি বিভিন্ন অভিযানত নিয়োজিত হৈ থকাৰ পাছতো কোনো এজন জোৱানে অপাৰেচনেল ডিউটিত প্ৰাণ হেৰুওৱা নাই। ১৯৭৯ চনৰ পাছত প্ৰথমবাৰৰ বাবে CRPFৰ ইতিহাসত এনে সফলতা লাভ কৰা হৈছে।
বাহিনীটোৰ সঞ্চালক প্ৰধান (DG) জ্ঞানেন্দ্ৰ প্ৰতাপ সিঙে সামাজিক মাধ্যমযোগে এই ঐতিহাসিক সাফল্যৰ কথা সদৰী কৰিছে। তেওঁৰ প্ৰকাশ কৰা তথ্য অনুসৰি, ২০২৫ চনৰ ৩০ অক্টোবৰত অভিযানত শেষবাৰৰ বাবে এজন CRPF জোৱান শ্বহীদ হৈছিল। তাৰ পাছৰে পৰা ২০২৬ চনৰ ৩০ অক্টোবৰলৈকে একেৰাহে ১২ মাহ কোনো জোৱানে অপাৰেচনেল অভিযানত প্ৰাণ হেৰুওৱা নাই।
নিজৰ এক্স হেণ্ডেলত এই সাফল্যৰ কথা উল্লেখ কৰি DG জ্ঞানেন্দ্ৰ প্ৰতাপ সিঙে ইয়াক CRPFৰ ইতিহাসৰ এক গুৰুত্বপূৰ্ণ মাইলৰ খুঁটি বুলি অভিহিত কৰে। তেওঁৰ মতে, ৪৭ বছৰৰ পাছত পুনৰ এনে এক সফলতা লাভ কৰাটো বাহিনীটোৰ বাবে বিশেষ তাৎপৰ্যপূৰ্ণ।
এই উল্লেখযোগ্য সফলতাৰ আঁৰত কেইবাটাও গুৰুত্বপূৰ্ণ কাৰক আছে বুলি উল্লেখ কৰিছে CRPFৰ সঞ্চালক প্ৰধানগৰাকীয়ে। বিশেষকৈ তিনিটা দিশে জোৱানসকলৰ সুৰক্ষা নিশ্চিত কৰাত গুৰুত্বপূৰ্ণ ভূমিকা গ্ৰহণ কৰিছে।
প্ৰথমতে, জোৱানসকলক আধুনিক অস্ত্ৰ-শস্ত্ৰ, উন্নত প্ৰযুক্তি আৰু অধিক সুৰক্ষিত বাহনেৰে সজ্জিত কৰা হৈছে। ইয়াৰ ফলত অভিযানৰ সময়ত সম্ভাৱ্য বিপদৰ সন্মুখীন হোৱাৰ আশংকা হ্ৰাস পাইছে।
দ্বিতীয়তে, উন্নত প্ৰশিক্ষণ আৰু নিখুঁত কৌশলগত পৰিকল্পনাই অভিযানসমূহ অধিক সুৰক্ষিত আৰু ফলপ্ৰসূ কৰি তুলিছে। স্থল পৰ্যায়ত পৰিস্থিতিৰ সৈতে খাপ খুৱাই পৰিকল্পনা গ্ৰহণ কৰাৰ ফলত বিপদৰ আশংকা হ্ৰাস কৰাটো সম্ভৱ হৈছে।
তৃতীয়তে, আহত জোৱানসকলৰ বাবে উন্নত চিকিৎসা আৰু দ্ৰুত উদ্ধাৰ প্ৰক্ৰিয়া ব্যৱস্থাই বিশেষ ভূমিকা পালন কৰিছে। সংঘৰ্ষ বা কোনো অপ্ৰীতিকৰ ঘটনা সংঘটিত হোৱাৰ পাছতে আহত জোৱানসকলক এয়াৰ এম্বুলেঞ্চৰ জৰিয়তে কম সময়ৰ ভিতৰতে উন্নত চিকিৎসালয়লৈ স্থানান্তৰ কৰাৰ ব্যৱস্থা কৰা হৈছে। ইয়াৰ ফলত বহু জোৱানৰ জীৱন ৰক্ষা কৰাত সহায় হৈছে।
বিশেষভাৱে উল্লেখযোগ্য যে CRPFৰ এই অভিলেখ কোনো শান্তিপূৰ্ণ পৰিৱেশত গঢ়া হোৱা নাই। দেশৰ অতি স্পৰ্শকাতৰ আৰু প্ৰত্যাহ্বানমূলক অঞ্চলসমূহত সক্ৰিয়ভাৱে কৰ্তব্য পালন কৰি থকাৰ সময়তে এই সফলতা অৰ্জন কৰিছে বাহিনীটোৱে।
বৰ্তমান ছত্তীশগড়ত নক্সালবিৰোধী অভিযান, জম্মু-কাশ্মীৰত সন্ত্ৰাসবাদবিৰোধী অভিযান আৰু উত্তৰ-পূৰ্বাঞ্চলত আইন-শৃংখলা পৰিস্থিতি নিয়ন্ত্ৰণৰ ক্ষেত্ৰত CRPFৰ জোৱানসকল নিয়োজিত হৈ আছে। দেশৰ বিভিন্ন প্ৰান্তত দিন-ৰাতি একাকাৰ কৰি কৰ্তব্য পালন কৰি আহিছে বাহিনীটোৰ সদস্যসকলে। ইতিমধ্যে এই অভিযান ক্ষেত্ৰসমূহত কেইবাটাও গুৰুত্বপূৰ্ণ আৰু নিৰ্ণায়ক অভিযান সম্পন্ন কৰিছে CRPF-এ।
এই ঐতিহাসিক সফলতাই বাহিনীটোৰ আধুনিকীকৰণ, প্ৰশিক্ষণ আৰু জোৱানৰ সুৰক্ষাৰ ক্ষেত্ৰত গ্ৰহণ কৰা পদক্ষেপৰ গুৰুত্ব পুনৰ প্ৰতিপন্ন কৰিছে। একেৰাহে এবছৰ কোনো অপাৰেচনেল শ্বহীদ নোহোৱাকৈ অভিযান চলাবলৈ সক্ষম হোৱাটো CRPFৰ বাবে এক উল্লেখযোগ্য সাফল্য।
দেশৰ আভ্যন্তৰীণ নিৰাপত্তা সুনিশ্চিত কৰাৰ লগতে দেশবাসীক সুৰক্ষিত আৰু শান্তিপূৰ্ণ পৰিৱেশ প্ৰদানৰ বাবে CRPF সদায় প্ৰতিশ্ৰুতিবদ্ধ বুলি পুনৰ স্পষ্ট কৰিছে সঞ্চালক প্ৰধান জ্ঞানেন্দ্ৰ প্ৰতাপ সিঙে।
