বিশ্বৰ অন্যতম ধনকুবেৰ তথা প্ৰখ্যাত বিনিয়োগকাৰী ৱাৰেন বাফেটৰ খাদ্যাভ্যাসক লৈ শেহতীয়াকৈ চৰ্চা আৰম্ভ হৈছে। প্ৰায় ৪৮ বছৰ ধৰি তেওঁ পানী খোৱা নাই বুলি প্ৰকাশ পোৱা এক দাবীয়ে সকলোকে আচৰিত কৰি তুলিছে। পানীৰ সলনি তেওঁৰ পছন্দৰ পানীয় হৈছে ‘চেৰী কোক’ (Cherry Coke)।
শুনিবলৈ আচৰিত যেন লাগিলেও, বাফেটৰ এই বিশেষ অভ্যাসৰ বিষয়ে বহু বছৰ ধৰি চৰ্চা চলি আহিছে। তেওঁৰ পুত্ৰৰ মতে, এটা সময়ত তেওঁ পেপছিৰ প্ৰতি ইমানেই আসক্ত আছিল যে তেওঁক ‘পেপছি বাফেট’ বুলিও মতা হৈছিল। পৰৱৰ্তী সময়ত কোকা-কোলাৰ প্ৰতি তেওঁৰ আগ্ৰহ বাঢ়ে আৰু চেৰী কোক হৈ পৰে তেওঁৰ অন্যতম প্ৰিয় পানীয়।
কি থাকে চেৰী কোকত?
চেৰী কোক হৈছে কোকা-কোলাৰ এবিধ বিশেষ সোৱাদযুক্ত পানীয়। সাধাৰণ কোলাৰ সৈতে চেৰীৰ সোৱাদ মিহলাই এই পানীয় প্ৰস্তুত কৰা হয়। ইয়াৰ সোৱাদ মিঠা আৰু ফলৰ সুগন্ধযুক্ত। অৱশ্যে নামত চেৰী থাকিলেও ই চেৰীৰ ৰস নহয়।
ইয়াৰ মূল উপাদানসমূহ হৈছে কাৰ্বনযুক্ত পানী, চেনি, কেৰামেল, অম্লতা নিয়ন্ত্ৰণ কৰা উপাদান আৰু কেফেইন।
কোকা-কোলাৰ আমেৰিকাৰ ৱেবছাইটত প্ৰকাশিত তথ্য অনুসৰি, ৩৫৫ মিলিলিটাৰ সাধাৰণ চেৰী কোকত প্ৰায় ১৫০ কেলৰি, ৪২ গ্ৰাম চেনি আৰু ৩৪ মিলিগ্ৰাম কেফেইন থাকে।
স্বাস্থ্যৰ বাবে কিমান নিৰাপদ চেৰী কোক?
মাজে-সময়ে পৰিমিত পৰিমাণে চেৰী কোক পান কৰিলে অধিকাংশ সুস্থ প্ৰাপ্তবয়স্কৰ ক্ষেত্ৰত সাধাৰণতে বিশেষ সমস্যা নহ’বও পাৰে। কিন্তু নিয়মীয়াকৈ অধিক পৰিমাণে এই পানীয় সেৱন কৰিলে শৰীৰত অতিৰিক্ত চেনি আৰু কেলৰিৰ পৰিমাণ বৃদ্ধি পায়।
ইয়াৰ ফলত ওজন বৃদ্ধি, দাঁতৰ ক্ষয় আৰু টাইপ-২ ডায়েবেটিছৰ আশংকা বৃদ্ধি পাব পাৰে। আনহাতে, ইয়াত থকা কেফেইনে কিছুমান লোকৰ টোপনিৰ সমস্যাও সৃষ্টি কৰিব পাৰে।
সঁচাকৈয়ে ৪৮ বছৰ পানী খোৱা নাই নেকি বাফেটে?
২০২৬ চনৰ অক্টোবৰ মাহত ‘Equity Mates Investing’ নামৰ এটা পডকাষ্টত আমেৰিকাৰ বিনিয়োগকাৰী বিল একমেনে এই বিষয়ে এটা কথা প্ৰকাশ কৰিছিল। তেওঁৰ দাবী অনুসৰি, এবাৰ নিশাৰ আহাৰৰ সময়ত তেওঁ ৱাৰেন বাফেটক পানী খাবলৈ অনুৰোধ কৰিছিল। তেতিয়া বাফেটে হেনো কৈছিল যে তেওঁ বিগত ৪৮ বছৰ ধৰি পানী খোৱা নাই, তাৰ পৰিৱৰ্তে চেৰী কোক পান কৰি আহিছে।
এই মন্তব্যৰ পাছতেই বিষয়টো ব্যাপক চৰ্চালৈ আহে।
আনহাতে, ২০১৫ চনত ‘Fortune’ আলোচনীক দিয়া এক সাক্ষাৎকাৰত বাফেটে কৈছিল যে তেওঁ প্ৰতিদিনে কমেও ১২ আউন্সৰ পাঁচটা কোক পান কৰে। অৱশ্যে বন্ধু-বান্ধৱী আৰু ওচৰ-চুবুৰীয়াৰ পৰামৰ্শৰ পাছত তেওঁ অত্যধিক কোক পান কৰাৰ অভ্যাস ত্যাগ কৰিছিল বুলি বিভিন্ন প্ৰতিবেদনত প্ৰকাশ পাইছিল।
উল্লেখ্য যে, ৪৮ বছৰ ধৰি পানী নোখোৱাৰ দাবীটো বিল একমেনৰ বক্তব্যৰ ওপৰত আধাৰিত। ৱাৰেন বাফেটে নিজে এই দাবীৰ সত্যতা নিশ্চিত কৰা নাই। বৰ্তমানো তেওঁ কিমান পৰিমাণে চেৰী কোক পান কৰে বা এই অভ্যাস অব্যাহত ৰাখিছে নে নাই, সেই সন্দৰ্ভত কোনো নিৰ্ভৰযোগ্য তথ্য প্ৰকাশ পোৱা নাই।
বিশেষজ্ঞসকলৰ পৰামৰ্শ অনুসৰি, কোনো ব্যক্তিৰ খাদ্যাভ্যাস বা পানীয় গ্ৰহণৰ অভ্যাস অন্ধভাৱে অনুসৰণ কৰা উচিত নহয়। শৰীৰ সুস্থ ৰাখিবলৈ পৰ্যাপ্ত পৰিমাণে বিশুদ্ধ পানী পান কৰাটো অতি প্ৰয়োজনীয়।
