পৃথিৱীৰ বাহিৰৰ জীৱ আৰু UFOক লৈ পুনৰ চৰ্চা! ৰহস্যৰ আঁৰত কি লুকাই আছে? পেণ্টাগনে প্ৰকাশ কৰিলে UFO তথা Unidentified Anomalous Phenomena (UAP) সম্পৰ্কীয় ৭১টা নতুন ফাইল। ১৯৫২ৰ পৰা ২০২৫ চনলৈকে বিস্তৃত এই নথিসমূহত আছে মহাকাশৰ অজ্ঞাত বস্তু, ৱাৰ্প ড্ৰাইভ, ৱৰ্মহ’ল আৰু ৰহস্যজনক তথ্য।
এই ফাইলসমূহৰ ভিতৰত ৩৭টা নথি আমেৰিকাৰ প্ৰতিৰক্ষা চোৰাংচোৱা সংস্থাৰ Advanced Aerospace Weapon System Applications Programৰ অধীনত প্ৰস্তুত কৰা হৈছিল। এই গোপনীয় কাৰ্যসূচী ২০০৮ চনত আৰম্ভ হৈছিল আৰু ২০১২ চনত সমাপ্ত হৈছিল। নথিসমূহত এণ্টি-গ্ৰেভিটি, অদৃশ্য হোৱাৰ প্ৰযুক্তি আৰু ঋণাত্মক ভৰৰ প্ৰপালচনৰ দৰে ধাৰণাৰ অধ্যয়ন কৰা হৈছিল। অৱশ্যে পেণ্টাগনে স্পষ্ট কৰিছে যে এই নথিসমূহক উক্ত প্ৰযুক্তিসমূহৰ বাস্তৱিক প্ৰমাণ বা বৈজ্ঞানিক স্বীকৃতি হিচাপে গণ্য কৰিব নোৱাৰি।
আটাইতকৈ শিহৰণকাৰী তথ্য আহিছে ২০১০ চনৰ এখন ৩৮ পৃষ্ঠাৰ প্ৰতিবেদনৰ পৰা। ইয়াত তিনিজন সুস্থ-সবল ব্যক্তিৰ অজ্ঞাত মহাকাশীয় ঘটনাৰ পাছত হোৱা স্বাস্থ্যজনিত সমস্যাৰ কথা উল্লেখ কৰা হৈছে। ছাল ৰঙা পৰা, চুলি সৰা আৰু বিকিৰণজনিত অসুস্থতাৰ লক্ষণৰ কথাও নথিখনত লিপিবদ্ধ কৰা হৈছে। অৱশ্যে এই আঘাতৰ প্ৰকৃত উৎস কি আছিল, সেয়া প্ৰতিবেদনখনে নিশ্চিত কৰা নাই।
ইয়াৰ উপৰি, মধ্যপ্ৰাচ্যত ২০২২ চনত দেখা পোৱা ৰহস্যজনক উৰণীয়া বস্তুৰ ভিডিঅ’ও প্ৰকাশ কৰা হৈছে। এখন প্ৰতিবেদন অনুসৰি, কেইবাটাও অজ্ঞাত বস্তুৱে ঘণ্টাত ৮০ৰ পৰা ১৮০ মাইল বেগত গতি কৰিছিল। আন এটা ভিডিঅ’ত ছটা সৰু গোলাকাৰ বস্তুৱে বাৰে বাৰে দিশ সলনি কৰি একেলগে উৰি থকা দেখা গৈছে। এই ঘটনাসমূহৰো কোনো নিশ্চিত ব্যাখ্যা পোৱা হোৱা নাই।
ক’লৰাডোৰ স্থানীয় আৰক্ষীয়ে ২০২৩ চনত ৰেকৰ্ড কৰা চাৰিটা ভিডিঅ’ও এইবাৰৰ প্ৰকাশিত নথিত অন্তৰ্ভুক্ত হৈছে। আৰক্ষীৰ এগৰাকী বিষয়াই এটা ঘটনাক নিৰৱ আৰু ৰঙা, নীলা তথা সেউজীয়া পোহৰ জিলিকি থকা পৰিঘটনা বুলি বৰ্ণনা কৰিছিল।
১৯৫২ চনৰ এটা ঐতিহাসিক অডিঅ’ ৰেকৰ্ডিঙতো আমেৰিকাৰ বায়ুসেনাৰ বিষয়া এডৱাৰ্ড ৰুপেল্টে প্ৰকাশ কৰিছিল যে তদন্ত কৰা প্ৰায় ৮০০টা UFO প্ৰতিবেদনৰ ২০ শতাংশৰ কোনো নিশ্চিত ব্যাখ্যা বিচাৰি পোৱা হোৱা নাছিল।
৭১টা ফাইলৰ অধিকাংশতে আছে গোপনীয় তথ্য। অজ্ঞাত উৰণীয়া বস্তুৰ ৰহস্যৰ উত্তৰ বিচাৰি চলা অনুসন্ধানৰ মাজতে পেণ্টাগনৰ এই নতুন প্ৰকাশে পুনৰ উত্থাপন কৰিছে একেই প্ৰশ্ন—আকাশত দেখা এই ৰহস্যময় বস্তুবোৰ আচলতে কি?
