ম্যানমাৰত জনগোষ্ঠীয় সশস্ত্ৰ গোটক প্ৰশিক্ষণ দিয়াৰ অভিযোগত গ্ৰেপ্তাৰ হোৱা ছয়গৰাকী ইউক্ৰেইনৰ নাগৰিকক বুধবাৰে ডিফল্ট জামিন প্ৰদান কৰে দিল্লীৰ এখন বিশেষ আদালতে। প্ৰতিগৰাকী অভিযুক্তই এক লাখ টকাৰ ব্যক্তিগত নগদ জৰিমনা ভৰাৰ বিনিময়ত জামিন লাভ কৰে।
ইয়াৰ লগতে Immigration and Foreigners Act, 2025-ৰ অধীনত তেওঁলোকৰ বিৰুদ্ধে থকা অভিযোগসমূহৰ পৰাও আদালতে ৰেহাই দিয়ে। ইয়াৰ পূৰ্বে বিদেশী আঞ্চলিক পঞ্জীয়ন বিষয়াই (FRRO) আইনখনৰ ২১ আৰু ২৩নং ধাৰাৰ অধীনত থকা অপৰাধসমূহ নিষ্পত্তি কৰিছিল। ভিছাৰ চৰ্ত উলংঘা কৰি আৰু প্ৰয়োজনীয় Restricted Area Permit অবিহনে ম্যানমাৰত প্ৰৱেশ কৰাৰ অভিযোগত প্ৰতিগৰাকী বিদেশী নাগৰিকৰ ওপৰত ৫.৫ লাখ টকাকৈ জৰিমনা আৰোপ কৰা হৈছিল।
উল্লেখ্য যে, মাৰ্চ মাহত ৰাষ্ট্ৰীয় অনুসন্ধান সংস্থা (NIA)-ই বিভিন্ন বিমানবন্দৰ আৰু স্থানৰ পৰা গ্ৰেপ্তাৰ কৰিছিল ইউক্ৰেইনৰ ছয়গৰাকী নাগৰিক—হুৰবা পেট্ৰ’, ছ্লিভিয়াক টাৰাছ, ইভান ছুকমানভস্কি, ষ্টেফানকিভ মাৰিয়ান, হনচাৰুক মাক্সিম আৰু কামিনস্কি ভিক্টৰক।
এই গোচৰত গ্ৰেপ্তাৰ হোৱা আমেৰিকাৰ নাগৰিক মেথিউ ভেনডাইকে যোৱা সপ্তাহতে জামিন লাভ কৰিছিল। তেওঁৰ জামিন আবেদনৰ শুনানিৰ সময়ত বিশেষ ন্যায়াধীশ প্ৰশান্ত শৰ্মাই উল্লেখ কৰিছিল যে একে আইনী অৱস্থাত থকা আন অভিযুক্তসকলেও আবেদন দাখিল কৰিলে ডিফল্ট জামিন লাভৰ অধিকাৰী হ’ব পাৰে।
আনহাতে, NIA-ই প্ৰথমে সাতগৰাকী বিদেশী নাগৰিকৰ বিৰুদ্ধে Unlawful Activities (Prevention) Act, 1967-ৰ অধীনত গোচৰ ৰুজু কৰিছিল। কিন্তু চলিত মাহৰ আৰম্ভণিতে দাখিল কৰা অভিযোগনামাত এই আইনখনৰ ধাৰা অন্তৰ্ভুক্ত কৰা হোৱা নাছিল। তেওঁলোকৰ বিৰুদ্ধে কেৱল Immigration and Foreigners Act-ৰ ২১ আৰু ২৩নং ধাৰাত অভিযোগ অনা হৈছিল।
অৱশ্যে গোচৰটোৰ তদন্ত এতিয়াও সম্পূৰ্ণ হোৱা নাই। NIA-ৰ বিশেষ ৰাজহুৱা অধিবক্তা ৰাহুল ত্যাগীয়ে আদালতক জনোৱা অনুসৰি, সন্ত্ৰাসবাদ সম্পৰ্কীয় অভিযোগৰ তদন্ত অব্যাহত আছে আৰু পৰৱৰ্তী পৰ্যায়ত পৰিপূৰক অভিযোগনামা দাখিল কৰা হ’ব পাৰে।
