দেশৰ বৈদেশিক মুদ্ৰাৰ ভাণ্ডাৰক সুৰক্ষিত কৰাৰ বাবে প্ৰধানমন্ত্ৰী নৰেন্দ্ৰ মোদীয়ে দেশবাসীক এবছৰৰ বাবে সোণ কিনাৰ পৰা বিৰত থাকিবলৈ আহ্বান জনাইছে।
প্ৰধানমন্ত্ৰীয়ে কৈছে, “যিকোনো অনুষ্ঠানতেই হওক, আগন্তুক এবছৰ সোণৰ গহনা নিকিনিব। এয়া দেশৰ স্বাৰ্থত আমাৰ সকলোৰে দায়িত্ব।” তেওঁ লগতে কৈছে যে সোণ কিনাৰ বাবে বিপুল পৰিমাণৰ বৈদেশিক মুদ্ৰা খৰচ হয়।
কিয় এই আহ্বান?
ভাৰত পৃথিৱীৰ অন্যতম বৃহৎ সোণৰ আমদানিকাৰী দেশ। প্ৰতিবছৰে ভাৰতত ৭০০-৮০০ টন সোণৰ প্ৰয়োজন হয়, কিন্তু দেশত উৎপাদন হয় মাত্ৰ ১-২ টন। অৰ্থাৎ প্ৰয়োজনীয়তাৰ প্ৰায় ৯০ শতাংশ সোণ বিদেশৰ পৰা আমদানি কৰিব লাগে।
সম্প্ৰতি পশ্চিম এছিয়াত সংঘাতৰ ফলত তেলৰ দাম বৃদ্ধি পাইছে আৰু আমদানিৰ খৰচ বাঢ়িছে। ইয়াৰ লগে লগে সোণৰ আমদানি খৰচো বৃদ্ধি পাইছে। এপ্ৰিল মাহত ভাৰতৰ বৈদেশিক মুদ্ৰা ভাণ্ডাৰ ৭৭৯ কোটি ডলাৰ হ্ৰাস পাইছে।
প্ৰধানমন্ত্ৰীয়ে কয় যে সোণ কিনাৰ পৰা বিৰত থাকিলে দেশৰ বৈদেশিক মুদ্ৰা ভাণ্ডাৰত চাপ কমিব আৰু অৰ্থনীতি সুস্থিৰ হ’ব।
এই আহ্বানক বৰ্তমানৰ অৰ্থনৈতিক পৰিস্থিতিত অত্যন্ত তাৎপৰ্যপূৰ্ণ বুলি গণ্য কৰা হৈছে।
