দিল্লীৰ হায়দৰাবাদ হাউছত হোৱা আলোচনাৰ অন্তত প্ৰধানমন্ত্ৰী নৰেন্দ্ৰ মোদী আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনে এক যুটীয়া সংবাদ মেলত অংশ লয়। ৰাছিয়াৰ ৰাষ্ট্ৰপতি ভ্লাদিমিৰ পুটিনে অস্ত্ৰ-শস্ত্ৰৰ পৰা আৰম্ভ কৰি তেল আৰু সন্ত্ৰাসবাদৰ ওপৰত আলোচনা কৰে। ইয়াৰ পূৰ্বে দিল্লীৰ হায়দৰাবাদ হাউছত ৰাছিয়াৰ ৰাষ্ট্ৰপতি ভ্লাদিমিৰ পুটিন আৰু প্ৰধানমন্ত্ৰী নৰেন্দ্ৰ মোদীৰ উচ্চ পৰ্যায়ৰ বৈঠকৰ সামৰণি পৰে। ইয়াৰ পিছতে দুয়োজনে যৌথ সংবাদমেলত ভাষণ দিয়ে।
ৰাছিয়াৰ ৰাষ্ট্ৰপতি ভ্লাদিমিৰ পুটিনে কয় যে, ভাৰতৰ ক্ৰমবৰ্ধমান অৰ্থনীতিলৈ নিৰৱচ্ছিন্নভাৱে ইন্ধনৰ যোগান অব্যাহত ৰাখিবলৈ আমি সাজু। ৰাষ্ট্ৰপতি পুটিনৰ ভাষণৰ পৰা ১০টা মূল কথা জানো আহক।
- ৰাষ্ট্ৰপতি পুটিনে ভাষণত উল্লেখ কৰে যে, তেওঁ আৰু প্ৰধানমন্ত্ৰী মোদীয়ে ৰাছিয়া আৰু ভাৰতৰ উন্নয়নৰ বাবে নিৰাপত্তাৰ পৰা আৰম্ভ কৰি অৰ্থনৈতিক উন্নয়নলৈকে অসংখ্য চুক্তিত উপনীত হৈছে।
- পুটিনে লগতে কয় যে, ২০৩০ চনৰ ভিতৰত ভাৰত আৰু ৰাছিয়াৰ মাজত বাণিজ্যই নিশ্চিতভাৱে ১০০ বিলিয়ন ডলাৰৰ সীমাত উপনীত হ’ব।
- তেওঁ লগতে উল্লেখ কৰে যে, প্ৰধানমন্ত্ৰী মোদীয়ে তেওঁক পাৰস্পৰিক বাণিজ্যৰ সন্মুখীন হোৱা সমস্যাসমূহৰ এক বিস্তৃত তালিকা দিছে। তেওঁ সেই সমস্যা সমূহ সমাধান কৰিব বুলি উল্লেখ কৰে।
- ৰাছিয়াই ভাৰতক ক্ষুদ্ৰ পৰ্টেবল পাৰমাণৱিক প্ৰযুক্তি প্ৰদান কৰিব।
- কৌশলগত আলোচনাৰ গুৰুত্বৰ কথা উল্লেখ কৰি পুটিনে মোদীক ধন্যবাদ জ্ঞাপন কৰে। তেওঁলোকৰ মাজত থকা শক্তিশালী সম্পৰ্কৰ কথা উল্লেখ কৰি ৰাষ্ট্ৰপতি পুটিনে কয় যে, তেওঁ নিয়মিতভাৱে প্ৰধানমন্ত্ৰী মোদীৰ সৈতে ফোনযোগে কথা পাতে আৰু মূল বিষয়সমূহৰ ওপৰত অহৰহ যোগাযোগ বজাই ৰাখে।
- প্ৰধানমন্ত্ৰী নৰেন্দ্ৰ মোদীয়েও এই যৌথ বিবৃতিত সন্ত্ৰাসবাদক সম্বোধন কৰে। তেওঁ কয়, “ভাৰত আৰু ৰাছিয়াই দীৰ্ঘদিন ধৰি সন্ত্ৰাসবাদৰ বিৰুদ্ধে কান্ধত কান্ধ মিলাই থিয় দিছে। পেহেলগামত হোৱা সন্ত্ৰাসবাদী আক্ৰমণেই হওক বা ক্ৰকাছ চিটি হলৰ আক্ৰমণেই হওক, এই সকলোবোৰ কাণ্ডৰ মূল কাৰণ একেই।”
- আলোচনাৰ সময়ত নেতাদ্বয়ে তেওঁলোকৰ বহুমুখী সহযোগিতাৰ সমগ্ৰ বিষয় বিতংভাৱে পৰীক্ষা কৰে।
- পুটিনে এই ফলাফলক ৰাছিয়া-ভাৰতৰ সহযোগিতাৰ বিস্তৃতি প্ৰতিফলিত কৰা চুক্তিৰ এক কঠিন পেকেজ বুলি অভিহিত কৰে।
- মস্কো আৰু নতুন দিল্লীৰ মাজত স্বাক্ষৰিত চুক্তিসমূহৰ লক্ষ্য হৈছে অৰ্থনৈতিক সহযোগিতাৰ সম্প্ৰসাৰণ।
- ৰাষ্ট্ৰপতি পুটিনে তেওঁক আৰু ৰাছিয়াৰ প্ৰতিনিধি দলটোক উষ্ম আদৰণি জনোৱাৰ বাবে ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোদী আৰু অন্যান্য ভাৰতীয় বিষয়াসকলকো ধন্যবাদ জ্ঞাপন কৰে। বৃহস্পতিবাৰে নিশা প্ৰধানমন্ত্ৰী মোদীয়ে ব্যক্তিগতভাৱে নৈশ আহাৰৰো আয়োজন কৰে। এই নৈশ ভোজ আয়োজন কৰাৰ বাবে পুটিনে প্ৰধানমন্ত্ৰী মোদীক প্ৰশংসা কৰে।
