বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানকোঠত অসমৰ লগতে উত্তৰ-পূৰ্বাঞ্চলৰ পৰম্পৰা আৰু ঐতিহ্যক সদায় আগস্থান দি অহা হৈছে। বিগত বৰ্ষসমূহৰ দৰে, এইবাৰো বাপুতি-সাহোন মাঘ বিহুৰ উপলক্ষে দুটাকৈ মেজিঘৰ সাজি উলিওৱা হৈছে। মেজিঘৰ দুটা ক্ৰমান্বয়ে যাত্ৰীৰ আগমন কক্ষ আৰু প্ৰস্থান কক্ষত আটকধুনীয়াকৈ সাজি প্ৰদৰ্শন কৰা হৈছে। দেশ-বিদেশৰ পৰা অহা বহু যাত্ৰীয়ে মেজিঘৰৰ কাষত ৰৈ ছেলফি লোৱা পৰিলক্ষিত হৈছে।
উল্লেখযোগ্য যে, মেজিঘৰ দুটা সম্পূৰ্ণ পাৰম্পৰিক পদ্ধতিৰে বাঁহ, ধান-খেৰেৰে প্ৰস্তুত কৰা হৈছে। মেজিৰ কাষতে ডলা-চালনীৰে আটকধুনীয়াকৈ এখন শৰাইত তিলপিঠা, তিলৰ লাডু, নাৰিকলৰ লাডু, বৰপিঠা ইত্যাদিও প্ৰদৰ্শন কৰা হৈছে।
