আহমেদাবাদৰ পৰা লণ্ডনৰ গেটউইক বিমানবন্দৰৰ উদ্দেশ্যে ৰাওনা হৈছিল এয়াৰ ইণ্ডিয়াৰ এআই১৭১ বিমান। উৰণৰ পাঁচ মিনিটৰ ভিতৰতেই বিমানখন ভাঙি পৰে। বিমানখনত যাত্ৰী আৰু বিমানকৰ্মী মিলি মুঠ ২৪২জন আছিল। তাৰে ১৬৯ জন আছিল ভাৰতীয়। ইয়াৰ উপৰি ৫৩জন ব্ৰিটিছ নাগৰিক এয়াৰ ইণ্ডিয়াৰ বিমানখনত আছিল। বিমান সংস্থাৰ তৰফৰ পৰা এটা বিবৃতি জাৰি কৰি এই সন্দৰ্ভত বিশদ তথ্য জনোৱা হৈছে। বিমানখনত যাত্ৰী আছিল ২৩০জন। বাকী ১২ জন আছিল বিমানকৰ্মী, তাৰে দুজন পাইলট।
বৃহস্পতিবাৰে বিয়লি ৩ বাজি ১৯ মিনিটত এয়াৰ ইণ্ডিয়াই জনাইছে যে এআই১৭১ বিমানখন দুপৰীয়া ১ বাজি ৩৮ মিনিটত আহমেদাবাদ বিমানবন্দৰৰ পৰা উৰা মাৰে। বোয়িং সংস্থাৰ ৭৮৭-৮ বিমানখনত যাত্ৰী আৰু বিমানকৰ্মী মিলি ১৬৯ জন ভাৰতীয় নাগৰিক আছিল। ইয়াৰ উপৰি ৫৩ জন ব্ৰিটিছ, এজন কানাডিয়ান আৰু সাতজন পৰ্তুগিজ নাগৰিক দুৰ্ঘটনাগ্ৰস্ত বিমানখনত আছিল। ঘটনাস্থলীৰ পৰা আহতসকলক উদ্ধাৰ কৰি ওচৰৰ হাস্পতাললৈ নিয়া হৈছে। এই সন্দৰ্ভত অধিক তথ্যৰ বাবে এয়াৰ ইণ্ডিয়াই এটা হটলাইন নম্বৰ মুকলি কৰিছে। ১৮০০৫৬৯১৪৪৪ নম্বৰত যোগাযোগ কৰি তথ্য জানিব পাৰি। দুৰ্ঘটনাৰ কাৰণ জানিবলৈ তদন্ত আৰম্ভ হৈছে। এয়াৰ ইণ্ডিয়াই জনাইছে যে তেওঁলোকে কৰ্তৃপক্ষক তদন্তত সম্পূৰ্ণ সহযোগিতা কৰি আছে।
দুৰ্ঘটনাগ্ৰস্ত এয়াৰ ইণ্ডিয়াৰ বিমানখনত আছিল গুজৰাটৰ প্ৰাক্তন মুখ্যমন্ত্ৰী তথা বিজেপিৰ বৰ্ষীয়ান নেতা বিজয় ৰূপাণী। তেওঁ লণ্ডনলৈ যাত্ৰা কৰি আছিল। তেওঁৰ কোনো খবৰ এতিয়াও পোৱা নাই।
বিমানখন ভাঙি পৰাৰ পিছতেই বিমানখনত জুই লাগি যায়। ক’লা ধোঁৱাই চাৰিওফাল ঢাকি পেলায়।
