ঈদৰ পূৰ্বে বাংলাদেশলৈ ড্ৰাগছ সৰবৰাহৰ ব্যৰ্থচেষ্টা, এইবাৰ নাৱত চলিল আৰক্ষীৰ অভিযান
এইবাৰ যাত্ৰীবাহী নাৱত আৰক্ষীৰ অভিযান। দক্ষিণ শালমাৰাৰ বালাপাৰাত ব্ৰহ্মপুত্ৰ নদীৰ মাজত যাত্ৰীবাহী নাৱত অভিযান আৰক্ষীৰ। বৃহৎ পৰিমাণৰ নিচাযুক্ত টেবলেট, কফ চিৰাপসহ গ্ৰেপ্তাৰ দুই ড্ৰাগছ ব্যৱসায়ীক।
ধৃত ড্ৰাগছ ব্যৱসায়ী দুটা মানকাচৰৰ হামিদুৰ ইছলাম আৰু জিয়াৰুল ইছলাম। কোচবিহাৰৰ পৰা ধুবুৰী হৈ যাত্ৰীবাহী নাৱেৰে মানকাচৰলৈ গৈছিল দুয়ো। আৰক্ষীয়ে গোপন সূত্ৰৰ ভিত্তিত খবৰ পাই নাৱত অভিযান চলাই ড্ৰাগছখিনি জব্দ কৰি দুয়োক কৰায়ত্ত কৰে। জিলা উপ আৰক্ষী অধীক্ষক এছ চাংচানৰ নেতৃত্বত দক্ষিণ শালমাৰা থানাৰ এ এছ আই দাৰুল ইছলামে চলাইছিল এই অভিযান। ড্ৰাগছখিনি ঈদৰ পূৰ্বে বাংলাদেশলৈ সৰবৰাহ কৰিবলৈ অনা হৈছিল বুলি সদৰি কৰিছে আৰক্ষীয়ে।