আজি পৱিত্ৰ অশোকাষ্টমী। লাখ লাখ ভক্তৰ সমাগমেৰে যোগীঘোপাত বাট নেদেখা পৰিবেশ। অশোকাষ্টমী উপলক্ষে আয়োজন কৰা মেলা উপভোগ কৰিবলৈ দুৰ দুৰণিৰ লাখ লাখ লোকে কৰিছে ভিৰ। প্ৰবাদ অনুসৰি আজিৰ দিনটোতে গংগাৰ পৰশ পায় ব্ৰহ্মপুত্ৰ নদীয়ে। যাৰফলত ব্ৰহ্মপুত্ৰৰ পানী হৈ পৰে পৱিত্ৰ। বিভিন্নজনে মৃতকৰ পিণ্ডদান তথা অস্থি বিসৰ্জনৰ বাবে উপস্থিত হোৱা পৰিলক্ষিত হৈছে।
আনহাতে, মেলাথলিত যাতে কোনোধৰণৰ অপ্ৰীতিকৰ ঘটনা সংঘটিত নহয় তাৰবাবে আয়োজক সমিতিৰ লগতে জিলা প্ৰশাসনো সাজু হৈ থকা পৰিলক্ষিত হৈছে। বিগত দুবছৰে ক’ভিডসৃষ্ট পৰিবেশৰ বাবে যোগীঘোপাত আয়োজন কৰা হোৱা নাছিল অশোকাষ্টমী মেলা।
এইবেলি তিনিদিনীয়াকৈ আয়োজন কৰা অষ্টমী মেলা পুৱাৰ ভাগত প্ৰতিকুল বতৰৰ বাবে সেৰেঙা হৈছিল যদিও বতৰ অনুকল হোৱাত ক্ৰমান্বয়ে যথেষ্ট সংখ্যক ৰাইজৰ উপস্থিতি পৰিলক্ষিত হৈছে। উল্লেখ্য যে, যোগীঘোপা অশোকাষ্টমী মেলা বছৰৰ পিছত ধৰি হিন্দু মুছলমান সকলোৱে মিলাপ্ৰীতিৰে আয়োজন কৰি সম্প্ৰীতিৰ এক অপুৰ্ব নিদৰ্শন দাঙি ধৰি আহিছে।
