বিশ্বজুৰি চলি থকা ভূ-ৰাজনৈতিক অস্থিৰতা আৰু অৰ্থনৈতিক মন্দাৱস্থাৰ মাজতো ভাৰতৰ শক্তিশালী তথা স্থিতিস্থাপক অৰ্থনৈতিক বিকাশক ভূয়সী প্ৰশংসা কৰিছে বিশ্ব বেংকৰ মুৰব্বী অজয় বাংগাই। বিশ্বৰ বহু আগশাৰীৰ দেশ কঠিন প্ৰত্যাহ্বানৰ সন্মুখীন হোৱাৰ সময়তো ভাৰতে নিজৰ সবল ঘৰুৱা চাহিদা, নিয়ন্ত্ৰিত মুদ্ৰাস্ফীতি আৰু সময়োপযোগী চৰকাৰী নীতিৰ ফলত উল্লেখনীয় বিকাশৰ হাৰ ধৰি ৰাখিবলৈ সক্ষম হৈছে বুলি তেওঁ মন্তব্য কৰে। ভাৰতৰ এই অৰ্থনৈতিক দৃঢ়তাই সমগ্ৰ বিশ্বৰ বাবেই এক ইতিবাচক বাৰ্তা কঢ়িয়াই আনিছে বুলিও তেওঁ উল্লেখ কৰে।
বাংগাই বিশেষভাৱে ভাৰতৰ ডিজিটেল ৰাজহুৱা আন্তঃগাঁথনি (DPI), বিত্তীয় অন্তৰ্ভুক্তিকৰণ আৰু উৎপাদনমুখী সংস্কাৰসমূহৰ শলাগ লয়। দেশখনত ক্ষিপ্ৰতাৰে সম্প্ৰসাৰিত হোৱা ডিজিটেল লেনদেন ব্যৱস্থা আৰু আন্তঃগাঁথনিৰ উন্নয়নে সাধাৰণ নাগৰিকৰ জীৱনধাৰণ সহজ কৰাৰ লগতে ব্যৱসায়িক পৰিৱেশ অধিক অনুকূল কৰি তুলিছে বুলি তেওঁ কয়। বিশ্বব্যাপী যোগান শৃংখলৰ পুনৰ্গঠনৰ এই সময়ছোৱাত ভাৰতৰ বাবে নতুন নতুন সুযোগ সৃষ্টি হৈছে বুলি দোহাৰি তেওঁ কয় যে দেশখনে কৰ্মসংস্থাপন সৃষ্টি আৰু বহনক্ষম উন্নয়নৰ গতি ত্বৰান্বিত কৰিলে আগন্তুক দিনত বিশ্ব অৰ্থনীতিৰ অন্যতম প্ৰধান চালিকা শক্তি হিচাপে নিজৰ স্থান অধিক সুদৃঢ় কৰিব পাৰিব।
