ডিমৌত সৰ্প দংশনৰ ফলত এগৰাকী মহিলাৰ মৃত্যু। মৃত মহিলাগৰাকী খোৱাং সমষ্টিৰ পথালিবাম কোমলদৈ বঙালী গাঁৱৰ ৰূপামণি ঘাটোৱাৰ।
বৃহস্পতিবাৰে নিশা ঘৰৰ মজিয়াত শুই থকা অৱস্থাত বিষাক্ত সাপে দংশন কৰিছিল দুই সন্তানৰ মাতৃ ৰূপামণি ঘাটোৱাৰক। নিশা প্ৰায় ১১:৩০ বজাত সংকটজনক অৱস্থাত তেওঁক ডিমৌ আদৰ্শ চিকিৎসালয়ত ভৰ্তি কৰোৱা হয়। চিকিৎসাধীন হৈ থকাৰ মাজতে আজি পুৱতি নিশা মহিলাগৰাকীয়ে শেষ নিশ্বাস ত্যাগ কৰে।
দেশত সৰ্প দংশন এতিয়াও এক গুৰুত্বপূৰ্ণ জনস্বাস্থ্যজনিত সমস্যা। WHOৰ এক অধ্যয়ন অনুসৰি ২০০০ৰ পৰা ২০১৯ চনৰ ভিতৰত ভাৰতত সৰ্প দংশনৰ ফলত আনুমানিক ১২ লাখ লোকৰ মৃত্যু হৈছিল, অৰ্থাৎ বছৰি গড়ে প্ৰায় ৫৮ হাজাৰ লোকৰ মৃত্যু হৈছিল। অসমতো প্ৰতিবছৰে বহু লোক সৰ্প দংশনৰ বলি হয়, বিশেষকৈ গ্ৰামাঞ্চলত এই সমস্যাৰ প্ৰভাৱ অধিক দেখা যায়।
বিশেষজ্ঞসকলে সৰ্প দংশনৰ পৰা সাৱধান হ’বলৈ নিশা বাহিৰলৈ ওলোৱাৰ সময়ত টৰ্চ বা পোহৰ ব্যৱহাৰ কৰা আৰু ঘৰৰ চৌহদ পৰিষ্কাৰ কৰি ৰখাৰ পৰামৰ্শ দিয়ে। মাটিত শোৱাৰ পৰিৱৰ্তে সম্ভৱ হ’লে ওখ বিছনাত শোৱা আৰু ঘৰৰ ওচৰত জাবৰ-জোঁথৰ, কাঠৰ দম বা জোপোহা জমা হ’বলৈ নিদিয়াটোও গুৰুত্বপূৰ্ণ।
সাপে দংশন কৰিলে আতংকিত নহৈ আক্ৰান্ত ব্যক্তিজনক শান্ত কৰি দংশন কৰা অংগটো লৰচৰ নকৰাকৈ যিমান পাৰি সোনকালে চিকিৎসালয়লৈ লৈ যোৱাটো অতি জৰুৰী। দংশন কৰা স্থান কাটি দিয়া, বিষ চুহি উলিওৱা, টানকৈ বান্ধি দিয়া বা কোনো ধৰণৰ বনৌষধি প্ৰয়োগ কৰা উচিত নহয়। সময়মতে চিকিৎসালয়ত চিকিৎসা আৰু প্ৰয়োজন অনুসৰি এণ্টিভেনম প্ৰদান কৰিলে সৰ্প দংশনৰ ফলত হোৱা মৃত্যুৰ আশংকা যথেষ্ট হ্ৰাস কৰিব পাৰি।
