পথত কোনো ডিভাইডাৰ নাই। দুয়োপিনে গছৰ শাৰী। কিন্তু গছবোৰ কেৱল পথৰ দুয়ো পাৰে নহয়, পথৰ মাজতো আছে। আৰু তাতেই বিপত্তি! যাৰ বাবে প্ৰায়েই নিতৌ দুৰ্ঘটনা ঘটি আছে। এনে পথ আছে বিহাৰত। ৰাজধানী পাটনাৰ পৰা ৫০ কিলোমিটাৰ দূৰৈত জেহানাবাদত। ১০০ কোটি টকা খৰচ কৰি ৰাজ্য চৰকাৰে পাটনা-গয়া পথ সম্প্ৰসাৰণৰ উদ্যোগ লৈছিল। কিন্তু সম্প্ৰসাৰণ হ’লেও সেই পথ মানুহৰ কামত অহা নাই বুলি অভিযোগ উঠিছে।
দীৰ্ঘদিন ধৰি জেহানাবাদৰ স্থানীয় লোকে এই পাটনা-গয়া পথ সম্প্ৰসাৰণৰ দাবী তুলিছিল। সেই অনুসৰি জিলা প্ৰশাসনে ১০০ কোটি টকাৰ প্ৰকল্পৰ কাম আৰম্ভ কৰিছিল। পথৰ কাষৰ গছ কটাৰ বাবে তেওঁলোকে বন বিভাগৰ দ্বাৰস্থ হৈছিল। বন বিভাগে চৰ্ত দিছিল যে, নতুন বনভূমি সৃষ্টিৰ বাবে ১৪ হেক্টৰ মাটি প্ৰদান কৰিব লাগিব। জিলা প্ৰশাসনে সেয়া দিব নোৱাৰিলে। ফলত বন বিভাগেও গছ কটাৰ অনুমতি নিদিলে।
কিন্তু তাৰ বাবে বিহাৰ প্ৰশাসনেও হাৰ নামানিলে। তেওঁলোকে গছ ৰাখিয়েই পথ নিৰ্মাণ কৰিলে। ৭.৪৮ কিলোমিটাৰ পথ সম্প্ৰসাৰণ কৰা হ’ল। কিন্তু তাৰ মাজত গছবোৰ থাকি গ’ল। সেই গছত খুন্দা খাই এই পথত ইতিমধ্যে বহু দুৰ্ঘটনা সংঘটিত হৈছে। প্ৰশ্ন উঠিছে, এনেকৈয়ে জানো পথ বনাব পাৰি? ডাঙৰ দুৰ্ঘটনা হ’লে তাৰ দায়িত্ব কোনে ল’ব?
