আহমেদাবাদত বিমান ভাঙি পৰাৰ আগতে এয়াৰ ট্ৰেফিক কণ্ট্ৰ’ল (ATC)লৈ বিপদ সংকেত (মে ডে কল) পঠিওৱা হৈছিল। ফ্লাইটৰাডাৰ২৪ৰ তথ্য অনুসৰি, পাইলটৰ পৰা বিপদ সংকেত পোৱাৰ পিছত ATCয়ে যোগাযোগৰ চেষ্টা কৰে। কিন্তু তাৰ পিছত আৰু যোগাযোগ সম্ভৱ নহ’ল। কিছু সময়ৰ পিছতেই বিমানখন ভাঙি পৰাৰ খবৰ পোৱা যায়।
বৃহস্পতিবাৰে দুপৰীয়া ১ বাজি ৩৯ মিনিটত চৰ্দাৰ বল্লভভাই পেটেল আন্তৰ্জাতিক বিমানবন্দৰৰ পৰা এআই-১৭১ বিমানখন উৰা মাৰে। বিমানখন ৰানৱে ২৩ৰ পৰা উৰাৰ এক মিনিটৰো কম সময়ৰ ভিতৰত ATCৰ সৈতে যোগাযোগ বিচ্ছিন্ন হৈ যায়। ফ্লাইটৰাডাৰ২৪ৰ তথ্য অনুসৰি, ভাঙি পৰাৰ আগতে বিমানখন মাটিৰ পৰা ৬২৫ ফুট উচ্চতাত আছিল। তাৰ পিছত দ্ৰুতগতিত তললৈ নামিবলৈ আৰম্ভ কৰে। তাৰ পিছতেই মেঘানিনগৰৰ ওচৰৰ বসতি এলেকাত বিমানখন ভাঙি পৰে।
দেশৰ অসামৰিক বিমান পৰিবহণ নিয়ন্ত্ৰক সংস্থা (DGCA)ই জনাইছে যে, ১ বাজি ৩৯ মিনিটত বিমানখন ৰানৱে’ৰ পৰা উৰাৰ পিছতেই পাইলটে ATCলৈ ‘মে ডে কল’ কৰে। কিন্তু বিমানৰ সৈতে যোগাযোগৰ চেষ্টা কৰিও আৰু কোনো সঁহাৰি নাপায়। ফ্লাইটৰাডাৰ২৪ৰ তথ্য অনুসৰি, ভাঙি পৰা বিমানখনৰ নম্বৰ আছিল ভিটি-এএনবি। বিমানখন সেইদিনা দিল্লীৰ পৰা আহমেদাবাদলৈ আহিছিল। তাৰ পিছত লণ্ডনৰ উদ্দেশ্যে ৰাওনা হৈছিল। কিন্তু তাৰ আগতেই দুৰ্ঘটনাৰ কবলত পৰে। বিমানখনত মুঠ ২৪২ জন আছিল, তাৰে ২৩২ জন যাত্ৰী আৰু ১০ জন ক্ৰু সদস্য।
‘মে ডে কল’ কি?
বিমান সেৱাৰ পৰিভাষাত ইয়াক ‘বিপদ সংকেত’ বুলি কোৱা হয়। জৰুৰী পৰিস্থিতিত পাইলটে কোনো বিপদৰ উমান পালে এই শব্দটো ব্যৱহাৰ কৰে। ফৰাচী শব্দ ‘মেইডাৰ’ৰ পৰা ‘মে ডে’ শব্দটোৰ উৎপত্তি, যাৰ অৰ্থ ‘মোক সহায় কৰক’। সাধাৰণতে ATC আৰু তাৰ অধীনৰ আকাশপথত থকা বিমানৰ মাজত ৰেডিঅ’ যোগাযোগক ‘মে ডে কল’ বুলি কোৱা হয়। এই শব্দৰ জৰিয়তে দ্ৰুত সহায়ৰ বাৰ্তা পঠিওৱা হয়।
কোন কোন ক্ষেত্ৰত ‘মে ডে কল’ পঠোৱা হয়?
বিমানৰ ইঞ্জিনত সমস্যা হ’লে, দুৰ্যোগপূৰ্ণ বতৰ, যান্ত্ৰিক বিজুতি হ’লে, বা উৰণৰ সময়ত বিমানৰ কোনো ব্যক্তি অসুস্থ হৈ জৰুৰী পৰিস্থিতিৰ সৃষ্টি হ’লে ‘মে ডে কল’ কৰা হয়।
