ৰাছিয়া-ইউক্ৰেইন যুদ্ধ বন্ধ কৰাৰ বাবে ৰাছিয়াৰ পৰা তেল ক্ৰয় বন্ধ কৰিবলৈ ইউৰোপৰ দেশসমূহক ‘আহ্বান’ জনাইছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। ইয়াৰ সৈতে চীনৰ ওপৰতো অৰ্থনৈতিক চাপ সৃষ্টি কৰাৰ নিৰ্দেশ দিছে তেওঁ।
বৃহস্পতিবাৰে ইউক্ৰেইনৰ ৰাষ্ট্ৰপতি ভলোদিমিৰ জেলেনস্কি আৰু ইউৰোপৰ নেতাসকলৰ সৈতে ভাৰ্চুৱেল বৈঠকত ট্ৰাম্পে দাবী কৰিছে যে, ইউৰোপৰ দেশসমূহে ৰাছিয়াৰ পৰা তেল নিকিনিলে যুদ্ধৰ অৱসান ঘটিব। কাৰণ, ইন্ধন বিক্ৰীৰ ধনেৰে মস্কোৱে যুদ্ধৰ বাবে মূলধন সংগ্ৰহ কৰিছে। ট্ৰাম্পৰ দাবী অনুসৰি, মাত্ৰ এবছৰত ইউৰোপত ইন্ধন (তেল আৰু গেছ) বিক্ৰী কৰি ৰাছিয়াই প্ৰায় ১১০ কোটি ইউৰো উপাৰ্জন কৰিছে।
জানিব পৰা গৈছে যে, ২০২২ চনত ইউক্ৰেইনৰ ওপৰত ৰাছিয়াৰ আক্ৰমণৰ পিছৰে পৰা ইউৰোপে ৰাছিয়াৰ পৰা ইন্ধন আমদানি বন্ধ কৰাৰ সিদ্ধান্ত লৈছে। ২০২৮ চনৰ ১ জানুৱাৰীৰ ভিতৰত পৰ্যায়ক্ৰমে এই আমদানি সম্পূৰ্ণৰূপে বন্ধ কৰাৰ পৰিকল্পনা কৰা হৈছে। ইউৰোপৰ তৰফৰ পৰা এই বিষয়ে আইন প্ৰণয়নৰ প্ৰস্তাৱো গ্ৰহণ কৰা হৈছে।
সংবাদ সংস্থা ৰয়টাৰ্ছৰ তথ্য অনুসৰি, ট্ৰাম্পে কেৱল ৰাছিয়াক অৰ্থনৈতিকভাৱে দুৰ্বল কৰাৰ কথাই কোৱা নাই, চীনৰ ওপৰতো অৰ্থনৈতিক চাপ সৃষ্টিৰ বাবে ইউৰোপৰ নেতাসকলক আহ্বান জনাইছে। মাৰ্কিন ৰাষ্ট্ৰপতিৰ দাবী, ইউক্ৰেইনৰ বিৰুদ্ধে যুদ্ধ চলোৱাৰ বাবে ৰাছিয়াক চীনে ‘বিশেষ ইন্ধন’ যোগান ধৰিছে।
নিউয়ৰ্কৰ আদালতে শেহতীয়াকৈ জনাইছিল যে, ট্ৰাম্পে বিভিন্ন দেশৰ ওপৰত আৰোপ কৰা শুল্কৰ অধিকাংশই বেআইনী। এই ৰায়ৰ বিৰুদ্ধে ট্ৰাম্প প্ৰশাসনে দেশৰ শীৰ্ষ আদালতত আবেদন কৰিছিল। নিজৰ সিদ্ধান্তৰ যুক্তি প্ৰদৰ্শন কৰিবলৈ ভাৰতৰ ওপৰত আৰোপিত শুল্কৰ প্ৰসঙ্গ উত্থাপন কৰা হৈছিল। মাৰ্কিন প্ৰশাসনৰ দাবী, আন্তৰ্জাতিক জৰুৰী অৰ্থনৈতিক ক্ষমতা আইন প্ৰয়োগ কৰি ভাৰতৰ ওপৰত শুল্ক আৰোপ কৰা হৈছে, কাৰণ ভাৰতে ৰাছিয়াৰ পৰা ইন্ধন ক্ৰয় কৰিছে। ৰাছিয়া-ইউক্ৰেইন যুদ্ধৰ ফলত সৃষ্ট জৰুৰী পৰিস্থিতি নিয়ন্ত্ৰণৰ বাবেই ট্ৰাম্পে এনে সিদ্ধান্ত লৈছে। এই পদক্ষেপ আচলতে শান্তি পুনৰুদ্ধাৰৰ কৌশল।
ৰাছিয়া-ইউক্ৰেইন যুদ্ধৰ বাবে ভাৰত ‘দায়ী’ বুলি আমেৰিকাৰ দাবীৰ প্ৰতিবাদত ইউৰোপীয় কমিছনৰ ৰাষ্ট্ৰপতি উৰ্চুলা ফন ডাৰ লেনে জনাইছে যে, যুদ্ধ বন্ধ কৰাত ভাৰতৰ প্ৰধানমন্ত্ৰী নৰেন্দ্ৰ মোদীয়ে সক্ৰিয় ভূমিকা গ্ৰহণ কৰিছে। তেওঁ কৈছে, “ৰাছিয়াৰ আগ্ৰাসী ভূমিকা ৰোধ কৰি শান্তি প্ৰতিষ্ঠাত ভাৰতৰ গুৰুত্বপূৰ্ণ ভূমিকা আছে।”
