ইতিহাস সৃষ্টি কৰি কিদাম্বি শ্ৰীকান্তে বিশ্ব বেডমিণ্টন চেম্পিয়নশ্বিপৰ ফাইনেলত প্ৰৱেশ কৰিছে। মেগা প্ৰতিযোগিতাখনৰ ফাইনেলত উপনীত হোৱা প্ৰথম ভাৰতীয় পুৰুষ খেলুৱৈ ৰূপে পৰিগণিত হৈছে শ্ৰীকান্ত। শনিবাৰে খেলা ছেমি ফাইনেলত ভাৰতৰে যুৱ খেলুৱৈ লক্ষ্য সেনক ১৭-২১, ২১-১৪, ২১-১৭ ছেটত পৰাস্ত কৰে। স্পেইনত অনুষ্ঠিত বেডমিণ্টন বিশ্ব চেম্পিয়নশ্বিপ ২০২১ৰ ফাইনেলত প্ৰৱেশ কৰিছে ভাৰতৰ তাৰকা খেলুৱৈজনে।
এই জয়ৰ লগে লগে শ্ৰীকান্ত বিশ্ব চেম্পিয়নশ্বিপৰ ফাইনেলত উপনীত হোৱা প্ৰথম ভাৰতীয় পুৰুষ খেলুৱৈ হিচাপে পৰিগণিত হৈছে। ২৮ বছৰীয়া শ্ৰীকান্তৰ পূৰ্বে চাইনা নেহৱাল আৰু পি ভি সিন্ধুৱে বিশ্ব চেম্পিয়নশ্বিপৰ ফাইনেলত উপনীত হ’বলৈ সক্ষম হৈছিল। এই ক্ষেত্ৰত তৃতীয়গৰাকী ভাৰতীয় ৰূপে সোণালী আখৰেৰে নিজৰ নাম লিপিবদ্ধ কৰিলে শ্ৰীকান্তে।
তাৰকা মহিলা বেডমিণ্টন খেলুৱৈ পি ভি সিন্ধুৱে ২০১৯ চনত বেডমিণ্টন বিশ্ব চেম্পিয়নশ্বিপ জয় কৰা প্ৰথম ভাৰতীয় হিচাপে পৰিগণিত হৈছিল। বিশ্ব চেম্পিয়নশ্বিপৰ খিতাপ জয় কৰা প্ৰথম ভাৰতীয় পুৰুষ খেলুৱৈ হোৱাৰ সুবৰ্ণ সুযোগ আছে শ্ৰীকান্তৰ হাতত। শ্ৰীকান্তৰ সোণৰ পদক জয়ৰ সুন্দৰ সুযোগ আছে।
কিদাম্বি শ্ৰীকান্তৰ লগতে এইবাৰ ভাৰতলৈ আহিব দুটাকৈ পদক। ভাৰতীয় পুৰুষ খেলুৱৈয়ে প্ৰথমবাৰৰ বাবে স্বদেশলৈ একেলগে দুটা পদক আনিব। ভাৰতীয় পুৰুষ খেলুৱৈসকলে প্ৰতিযোগিতাখনত দুটা পদক জিকিছে। ছেমি ফাইনেলত পৰাস্ত হৈ চলিত প্ৰতিযোগিতাখনত ২০ বছৰীয়া লক্ষ্য সেনে ব্ৰঞ্জৰ পদক অৰ্জন কৰিছে। প্ৰথমবাৰৰ বাবে লক্ষ্য সেনে বিশ্ব চেম্পিয়নশ্বিপৰ পৰা ব্ৰঞ্জৰ পদক লাভ কৰি স্বদেশলৈ উভতি আহিব।
ইয়াৰ পূৰ্বে ১৯৮৩ চনত ভাৰতৰ প্ৰকাশ পাডুকন আৰু ২০১৯ চনত বি চাই প্ৰনীতে বিশ্ব চেম্পিয়নশ্বিপত ব্ৰঞ্জৰ পদক অৰ্জন কৰিছিল।
