ডিব্ৰুগড়ৰ আলুবাৰীত সংঘটিত হল চাঞ্চল্যকৰ হত্যাকাণ্ড। পুৰণি আখেজৰ বাবে ১২ জনীয়া এটা দলে আক্ৰমণ কৰিলে টম্লু সোণাৰ নামৰ যুৱকক। বুধবাৰে নিশা ঘটিছিল সেই ঘটনা। সন্ধিয়া কামৰ পৰা উভতি অহা নাছিল টম্লু সোণাৰ। ঘৰৰ পৰা ওলাই গৈ পত্নীয়ে দেখিলে এঠাইত বহি আছে যুৱকজন। সেই ঠাইৰ পৰা লৈ আনিলে ঘৰলৈ। ঘৰত খাবলৈ দিলে ৰুটী। ৰুটী খাওঁতেই তেজ বমি হয় যুৱকজনৰ।
বেয়াকৈ প্ৰহাৰ কৰা হৈছিল যুৱকজনক। দীপজ্যোতি ৰাজবংশী নামৰ এজন যুৱকে লগত আৰু এঘাৰজন যুৱকক লৈ এটা কোঠাত আবদ্ধ কৰি টম্লুক প্ৰহাৰ কৰাৰ অভিযোগ। গুৰুতৰভাবে অসুস্থ হৈ পৰা যুৱকজনক ভৰ্তি কৰোৱা হৈছিল অসম মেডিকেল কলেজত। তাতেই যুৱকজনৰ মৃত্যু হল। ইয়াৰ পাছতে আৰক্ষীয়ে অভিযান চলাই গ্ৰেপ্তাৰ কৰিলে অভিযুক্ত দীপজ্যোতি ৰাজংবশীক। লগত থকা আন ১১জন যুৱককো গ্ৰেপ্তাৰ কৰি শাস্তি প্ৰদানৰ দাবী সকলোৰে।
