২০২৫ বৰ্ষৰ IPL মহেন্দ্ৰ সিং ধোনীৰ জীৱনৰ অন্তিমখন IPL আছিল নেকি? আগন্তুক IPLৰ আগতেই তেওঁ অৱসৰ ঘোষণা কৰিব নেকি? ধোনীয়ে নিজে এই বিষয়ে একো কোৱা নাই। কিন্তু চেন্নাই ছুপাৰ কিংছৰ এটা পদক্ষেপক কেন্দ্ৰ কৰি জল্পনা-কল্পনাৰ সৃষ্টি হৈছে।
আগন্তুক IPLৰ পূৰ্বেই চেন্নাই ছুপাৰ কিংছৰ কৰ্তৃপক্ষই সঞ্জু ছেমচনক দলত অন্তৰ্ভুক্ত কৰিবলৈ বিচাৰিছে। এখন সৰ্বভাৰতীয় সংবাদমাধ্যমৰ প্ৰতিবেদন অনুসৰি, ৰাজস্থান ৰয়েলছৰ অধিনায়কক পাবলৈ চেন্নাইয়ে সকলো প্ৰকাৰ চেষ্টা চলাব। চেন্নাইৰ টীম মেনেজমেণ্টে জনাইছে যে তেওঁলোকে ধোনীৰ পৰিৱৰ্তে এজন খেলুৱৈ বিচাৰিছে। তেওঁ কৈছে, “আমি সঞ্জুক দলত ল’বলৈ আগ্ৰহী। তেওঁ ভাৰতীয় ক্ৰিকেটাৰ, আক্ৰমণাত্মক বেটছমেন, উইকেটৰক্ষক হিচাপে ভাল, আৰু অপেনাৰ হিচাপেও খেলিব পাৰে। তেওঁক পোৱাৰ সুযোগ থাকিলে আমি সকলো প্ৰকাৰ চেষ্টা চলাম। তেওঁক দলত ল’বলৈ সম্ভাৱ্য উপায়বোৰ বিচাৰি চাব লাগিব। কাৰ পৰিৱৰ্তে সঞ্জুক ল’ম, সেয়া এতিয়াও নিৰ্ধাৰণ হোৱা নাই। বিষয়টো এতিয়াও সিমান আগবঢ়া নাই। তথাপি নীতিগতভাৱে আমি সঞ্জুক পাবলৈ আগ্ৰহী।”
ৰাজস্থানৰ কৰ্তৃপক্ষই সৰ্বোচ্চ ১৮ কোটি টকাৰে সঞ্জুক ধৰি ৰাখিছিল। ফলত, সঞ্জুক পাবলৈ চেন্নাইৰ কৰ্তৃপক্ষই অতিকমেও ১৮ কোটি টকা খৰচ কৰিব লাগিব। ৰুতুৰাজ গায়কোৱাৰক লৈও জল্পনা-কল্পনা চলিছে। চেন্নাইৰ প্ৰশিক্ষক ষ্টিফেন ফ্লেমিঙে দলৰ নতুন অধিনায়কৰ প্ৰতি বিশেষ সন্তুষ্ট নহয়। ৰুতুৰাজকো চেন্নাইয়ে ১৮ কোটি টকাৰে ধৰি ৰাখিছে। সেয়েহে ধাৰণা কৰা হৈছে যে, ৰুতুৰাজৰ সৈতে সঞ্জুৰ বদলা-বদলি হ’ব পাৰে। যদিও এই বিষয়ত চেন্নাইৰ তৰফৰ পৰা এনে কোনো মন্তব্য কৰা হোৱা নাই। তথাপি, যদি ধোনীয়ে আগন্তুক বছৰো উইকেটৰক্ষক হিচাপে খেলে, তেন্তে সঞ্জুক কেৱল বেটছমেন হিচাপেও খেলোৱাটো সম্ভৱ। বিগত IPLৰ সময়ত ৰাজস্থানৰ কৰ্তৃপক্ষৰ সৈতে সঞ্জুৰ কিছু দূৰত্বৰ সৃষ্টি হৈছিল। ঘনিষ্ঠ মহলত তেওঁ ৰাজস্থান এৰাৰ ইংগিত দিছিল। এই সুযোগকেই সম্ভৱতঃ কামত লগাবলৈ বিচাৰিছে চেন্নাইৰ কৰ্তৃপক্ষই।
বিগত IPLৰ সময়ত ধোনীয়ে কৈছিল যে, প্ৰতিযোগিতাৰ পিছত অৱসৰৰ বিষয়ে চিন্তা কৰাৰ যথেষ্ট সময় তেওঁ পাব। সকলো বিষয় বিবেচনা কৰি তেওঁ সঠিক সময়ত সিদ্ধান্ত ল’ব। ধোনীয়ে কিমান দিন খেলিব, সেয়া কেৱল তেওঁ নিজেই জানে। ৪৩ বছৰীয়া মাহিয়ে যদি খেলিবলৈ বিচাৰে, তেন্তে চেন্নাইৰ পক্ষে তেওঁক ‘না’ কোৱা সম্ভৱ নহয়। সেয়েহে চেন্নাইয়ে এনে এজন ক্ৰিকেটাৰ বিচাৰিছে, যি ধোনী আৰু ৰুতুৰাজ দুয়োৰে বিকল্প হ’ব পাৰে আৰু নেতৃত্বও দিব পাৰে। সেই কাৰণেই তেওঁলোকৰ প্ৰথম পছন্দ হৈছে সঞ্জু।
