এছিয়াৰ আটাইতকৈ চাফ-চিকুণ গাঁৱত শচীন। ক্ৰিকেটৰ ভগৱান শচীন তেণ্ডুলকাৰৰ শেহতীয়া অসম আৰু মেঘালয় ভ্ৰমণৰ কথা সম্ভৱতঃ কোনেও পাহৰা নাই। পাহৰিবই বা কিয়? স্বপ্নৰ তাৰকাক কায়িকভাৱে লগ পোৱাৰ স্বপ্নৰ মুহূৰ্ত সেয়া। ডাৱৰৰ দেশৰ দিহিঙ দিপাঙে ফুৰি দুটা নিশা কাজিৰঙাতো পৰিয়ালসহ কটাই গৈছিল শচীন তেণ্ডুলকাৰে। শচীনক কাষত পোৱাৰ, শচীনৰ সৈতে এখন ফটো উঠাৰ মুহূৰ্তবোৰ এতিয়াও আনন্দমনে সুঁৱৰি আছে প্ৰতিজন লোকে।
স্মৃতিবোৰ সজীৱ কৰি মঙলবাৰে শচীনে সামাজিক মাধ্যমৰ একাউন্টত আপলোড কৰিলে মাওলিনং ভ্ৰমণৰ দৃশ্য।
এছিয়াৰ সবাতোকৈ চাফ-চিকুণ গাঁও এই মাওলিনং। মাওলিনঙলৈ আদৰণি বুলি লিখি হোৰ্ডিঙৰ সন্মুখত হাঁহিমুখেৰে ফটোৰ বাবে শচীন ৰমেশ তেণ্ডুলকাৰৰ।
গাঁওখনৰ অলিয়ে গলিয়ে ঘূৰি-ফুৰি স্থানীয় লোকসকলৰ সৈতে মত বিনিময় কৰিছিল শচীনে। মাষ্টাৰ ব্লাষ্টাৰ গৰাকীক এই ভ্ৰমণত সংগ দিছিল পত্নী অঞ্জলী আৰু ছাৰা তেণ্ডুলকাৰে। শচীনে নিজ মুখেৰেও ক’লে- ডিস্ক’ভাৰি চেনেলে অনুষ্ঠান কৰিছিল এছিয়াৰ সবাতোকৈ চাফ-চিকুণ এই মাওলিনঙক লৈ।
ভ্ৰমণকালত মাওলিনঙৰ স্থানীয় কণ কণ শিশুসকলৰ সৈতেও মত বিনিময় ক্ৰিকেট ভগৱানৰ। শচীনক মাজত লৈ কণ কণ শিশুসকলে আকৌ এবাৰ চিঞৰি উঠিল শচীন.. শচীন.. বুলি।
