কেৱল পাঠ্যপুথিৰ শিক্ষাই নহয়, জীৱনৰ শিক্ষাৰে ছাত্ৰ-ছাত্ৰীক মানুহ কৰাৰ প্ৰয়াস এখন বিদ্যালয়ৰ। বৰ্তমান সময়ত ছাত্ৰ-ছাত্ৰীক কেৱল পাঠ্যপুথিৰ জ্ঞানৰ মাজতে আৱদ্ধ কৰি ৰখা হয় বুলি সততে চৰ্চা চলি থকাৰ মাজতে এইবাৰ এখন বিদ্যালয়ে গ্ৰহণ কৰিছে অভিনৱ পদক্ষেপ।
থলুৱা শাক-পাচলিৰে খুবেই সাধাৰণ যেন লগা এখন বজাৰ। কিন্তু সাধাৰণ হৈও চৰ্চালৈ আহিছে এইখন বজাৰ।
বজাৰখনত বিক্ৰেতাৰ ৰূপত কণ কণ ছাত্ৰ-ছাত্ৰী। হাতত কিতাপ-বহী এৰি শিক্ষাৰ্থী ওলাইছে বজাৰলৈ। সন্মুখত উলিয়াই লৈছে বিভিন্ন ধৰণৰ শাক-পাচলি।
গোলকগঞ্জৰ উত্তৰ ৰায়পুৰ ৰঘুনাথ জনসেৱী প্ৰাথমিক বিদ্যালয়ৰ এই বজাৰখনে সম্প্ৰতি দৃষ্টি আকৰ্ষণ কৰিছে সকলোৰে। ছাত্ৰ-ছাত্ৰীক কেৱল কিতাপৰ জ্ঞানৰ মাজতেই আবদ্ধ নকৰি ‘বজাৰ’ৰ জৰিয়তে জীৱনমুখী শিক্ষা দিয়া বিদ্যালয় কৰ্তৃপক্ষৰ সলাগ লৈছে সকলোৱে।
গুণগত শিক্ষাৰ লগতে ব্যৱহাৰিক জ্ঞান বৃদ্ধিত গুৰুত্ব শিক্ষানুষ্ঠানখনৰ। ছাত্ৰ-ছাত্ৰীক বজাৰ আৰু হিচাপ সম্পৰ্কীয় জ্ঞান দিয়াৰ উদ্দেশ্যে বিদ্যালয়সমূহৰ উপ-পৰিদৰ্শকৰ উদ্যোগত আৰু বিদ্যালয় কৰ্তৃপক্ষৰ সহযোগত অনুষ্ঠিত হৈছে এই বজাৰ।
