ভাৰতৰ আক্ৰমণত পাকিস্তানৰ নুৰ খান বিমান ঘাটিত হোৱা ব্যাপক ক্ষতিৰ পিছত পাকিস্তানে সেনাৰ মুখ্য কাৰ্যালয় ৰাৱালপিণ্ডিৰ চাকলালাৰ পৰা ইছলামাবাদলৈ স্থানান্তৰৰ পৰিকল্পনা কৰিছে বুলি খবৰ পোৱা গৈছে।
ভাৰতৰ আক্ৰমণৰ পিছত উপগ্ৰহৰ ছবিৰ পৰা দেখা গৈছে যে, এই কৌশলগত বিমান ঘাটিত অন্ততঃ দুখন সামৰিক পৰিবহন বাহন ক্ষতিগ্ৰস্ত হৈছে। চীনৰ মিজাজভিছন আৰু ভাৰতৰ কাৱা স্পেচৰ উপগ্ৰহৰ ছবিত দেখা গৈছে যে, ঘাটিটোত ব্যাপক গাঁথনিগত ক্ষতি হৈছে, ইন্ধনৰ ট্ৰাক আৰু গুদামৰ চাল ধ্বংস হৈছে। ৰানৱেৰ ওচৰত ধ্বংসাৱশেষ পৰি থকা দেখা গৈছে।
প্ৰতিবেদনত কোৱা হৈছে যে নিখুঁত আক্ৰমণৰ পিছত শনিবাৰৰ পুৱা পাকিস্তানৰ সেনা প্ৰধান জেনেৰেল আছিম মুনিৰক ৰাৱালপিণ্ডিৰ জেনেৰেল কাৰ্যালয়ৰ ভিতৰত এটা সুৰক্ষিত বাংকাৰলৈ স্থানান্তৰিত কৰা হৈছিল।
নুৰ খান বিমান ঘাটি পাকিস্তানৰ ৰাজধানী ইছলামাবাদৰ পৰা মাত্ৰ ১০ কিলোমিটাৰ দূৰত অৱস্থিত আৰু ই এক অতি স্পৰ্শকাতৰ সামৰিক ঘাটি। ইয়াত একাধিক পৰিবহণ স্কোয়াড্ৰন, বায়ুত ইন্ধন ভৰোৱা ইউনিট আছে। লগতে ই বিমান বাহিনীৰ বাবে প্ৰশিক্ষণ কেন্দ্ৰ।
এই ঘাটি পাকিস্তানৰ কৌশলগত পৰিকল্পনা বিভাগৰ মুখ্যালয়ৰ সমীপত অৱস্থিত, যিয়ে দেশখনৰ পাৰমাণৱিক অস্ত্ৰাগাৰৰ তদাৰক আৰু সুৰক্ষাৰ দায়িত্ব পালন কৰে, যিটো এতিয়া প্ৰায় ১৭০ বা তাতকৈ অধিক ৱাৰহেডৰ হ’ব বুলি অনুমান কৰা হৈছে। এই ৱাৰহেডসমূহ দেশৰ বিভিন্ন স্থানত বিস্তাৰিত হৈ আছে।
ভাৰতে ব্ৰহ্মোস, হামাৰ আৰু স্কাল্প ক্ষেপণাস্ত্ৰৰ সহায়ত পাকিস্তানৰ ১১টা বিমান ঘাটিত আক্ৰমণ কৰাৰ বাবে প্ৰতিবেশী দেশখনত গুৰুতৰ উদ্বেগৰ সৃষ্টি কৰিছে।
নুৰ খান ঘাটিত হোৱা আক্ৰমণক দুয়োখন পাৰমাণৱিক অস্ত্ৰধাৰী দেশৰ মাজত তীব্ৰতৰ হোৱা সংঘাতৰ টাৰ্নিং পইণ্ট হিচাপে দেখা গৈছে।
