নোবেল বঁটাৰ বাবে দৌৰত আছে গ্ৰেপ্তাৰ কৰা ‘সত্যানুসন্ধানকাৰী’ মহম্মদ জুবেইৰ। এইবাৰ মুঠ ৩৪৩ জন ব্যক্তি আৰু সংগঠনৰ নাম শান্তিৰ নোবেল বঁটাৰ বাবে মনোনীত হৈছে। ফেক্ট-চেকিং নিউজ ৱেবছাইট অল্ট নিউজৰ প্ৰতিষ্ঠাপক মহম্মদ জুবাইৰ আৰু প্ৰতীক সিনহাৰ নাম ২০২২ চনৰ শান্তিৰ নোবেল বঁটাৰ বাবে মনোনীত হৈছে। টাইম আলোচনীয়ে এই কথা সদৰি কৰিছে।
টাইম আলোচনীৰ সূত্ৰ অনুসৰি এইবাৰ ভাৰতীয় সাংবাদিক দুজন সম্ভাৱ্য নোবেল প্ৰাপকৰ ভিতৰত অন্যতম। নৰৱেৰ শান্তি গৱেষণা প্ৰতিষ্ঠান অচলোই প্ৰতি বছৰে ঘোষণা কৰে শান্তিৰ নোবেল বঁটাৰ নাম। বিভিন্ন ব্যক্তি আৰু প্ৰতিষ্ঠানে শান্তি গৱেষণা প্ৰতিষ্ঠানক নাম-পৰামৰ্শ দিয়ে। শান্তিৰ নোবেল বঁটাৰ বাবে জুবেইৰ আৰু সিনহাৰ নাম মনোনীত হোৱা খবৰটো নৰৱেৰ বিধায়িনী দলৰ সদস্যই প্ৰকাশ কৰিছে।
এইবাৰ পৃথিৱীৰ বিভিন্ন দেশৰ ৩৪৩ জন ব্যক্তি আৰু সংগঠনে শান্তিৰ নোবেল বঁটাৰ বাবে প্ৰতিদ্বন্দ্বিতা কৰিছে। কিন্তু সম্ভাৱ্য নোবেলৰ বাবে মনোনীতৰ নাম কেতিয়াও নোবেল কমিটীয়ে ৰাজহুৱা নকৰে। কিন্তু ৰয়টাৰ্ছ সংবাদগোষ্ঠীৰ সূত্ৰ অনুসৰি, এই বছৰ শান্তিৰ নোবেল বঁটা লাভৰ যুঁজত আছে জুবেইৰৰ উপৰিও প্ৰতীক, ঘোষক ডেভিদ এটেনব’ৰ’, পৰিৱেশ আন্দোলনৰ প্ৰতি সঁহাৰি জনোৱা গ্ৰেটা থানবাৰ্গ, পোপ ফ্ৰান্সিছ, টুভালুৰ বৈদেশিক মন্ত্ৰী চাইমন কফি, ইউক্ৰেইনৰ ৰাষ্ট্ৰপতি জেলেনস্কি। নৰৱেত স্থানীয় সময় অনুসৰি ৭ অক্টোবৰৰ পুৱা ১১ বজাত ঘোষণা কৰা হ’ব শান্তিৰ নোবেল বঁটাপ্ৰাপকৰ নাম।
