২০২৭ চনৰ এদিনীয়া বিশ্বকাপৰ পূৰ্বে ভাৰতীয় ক্ৰিকেট দলৰ মুখ্য নিৰ্বাচকক লৈ চৰ্চা তীব্ৰ হৈ পৰিছে। ইয়াৰ মাজতে ১৯৮৩ চনৰ বিশ্বকাপ বিজয়ী ভাৰতীয় দলৰ সদস্য তথা প্ৰাক্তন ক্ৰিকেটাৰ ক্ৰিছ শ্ৰীকান্তে মুখ্য নিৰ্বাচক পদ আৰু ভাৰতীয় দলৰ মুখ্য প্ৰশিক্ষক গৌতম গম্ভীৰক লৈ এক তাৎপৰ্যপূৰ্ণ মন্তব্য কৰিছে। বৰ্তমান ভাৰতীয় পুৰুষ ক্ৰিকেট দলৰ মুখ্য নিৰ্বাচক হিচাপে দায়িত্বত আছে অজিত আগৰকাৰ। প্ৰতিবেদন অনুসৰি, আগৰকাৰৰ বৰ্তমানৰ কাৰ্যকাল ২০২৬ চনৰ ৪ অক্টোবৰত অন্ত পৰিব। লগতে তেওঁ পুনৰ কাৰ্যকাল বৃদ্ধিৰ বাবে আগ্ৰহী নহয় বুলি BCCIক অৱগত কৰাৰ খবৰ প্ৰকাশ পাইছে।
এই পৰিস্থিতিত আগৰকাৰৰ পৰৱৰ্তী সময়ত কোনে ভাৰতীয় দলৰ মুখ্য নিৰ্বাচকৰ দায়িত্ব ল’ব, সেই লৈ ক্ৰিকেট মহলত চৰ্চা আৰম্ভ হৈছে। এনে সময়তে ক্ৰিছ শ্ৰীকান্তে কয় যে তেওঁ যদি ছিনিয়ৰ পুৰুষ নিৰ্বাচক সমিতিৰ অধ্যক্ষৰ দায়িত্ব লাভ কৰে, তেন্তে ভাৰতীয় দলৰ মুখ্য প্ৰশিক্ষক গৌতম গম্ভীৰৰ সৈতে মতানৈক্যৰ পৰিস্থিতি সৃষ্টি হ’ব পাৰে।শ্ৰীকান্তে গম্ভীৰক উদ্দেশ্য কৰি কৰা মন্তব্যত কয়, “মই যদি মুখ্য নিৰ্বাচক হওঁ, গম্ভীৰে আঁতৰি যাব।” তেওঁৰ এই মন্তব্যই ভাৰতীয় ক্ৰিকেটত নিৰ্বাচক আৰু মুখ্য প্ৰশিক্ষকৰ মাজৰ সম্পৰ্কক লৈ নতুন চৰ্চাৰ সৃষ্টি কৰিছে।
২০২৭ বিশ্বকাপৰ প্ৰস্তুতি ইতিমধ্যে ভাৰতীয় দলৰ বাবে অন্যতম গুৰুত্বপূৰ্ণ বিষয় হৈ পৰিছে। বিশ্বকাপৰ পূৰ্বে দল গঠন, খেলুৱৈ নিৰ্বাচন আৰু কৌশল নিৰ্ধাৰণৰ ক্ষেত্ৰত মুখ্য নিৰ্বাচক আৰু মুখ্য প্ৰশিক্ষকৰ ভূমিকা যথেষ্ট গুৰুত্বপূৰ্ণ। সেয়েহে আগৰকাৰৰ সম্ভাব্য উত্তৰাধিকাৰী কোন হ’ব আৰু নতুন নিৰ্বাচক সমিতিৰ সৈতে গৌতম গম্ভীৰৰ সমন্বয় কেনেধৰণৰ হ’ব, সেই বিষয়টো এতিয়া ভাৰতীয় ক্ৰিকেট মহলত বিশেষ চৰ্চাৰ বিষয় হৈ পৰিছে।
