দ্বিতীয়বাৰ আমেৰিকাৰ ৰাষ্ট্ৰপতি হোৱাৰ পিছতেই ড’নাল্ড ট্ৰাম্পে গাজাত যুদ্ধবিৰতিৰ বাবে ইজৰাইলৰ ওপৰত চাপ সৃষ্টি কৰিছিল। কিন্তু ইৰাণৰ পৰমাণু কাৰ্যসূচীক কেন্দ্ৰ কৰি সংঘাতৰ পৰিস্থিতিৰ সৃষ্টিৰ ফলত পশ্চিম এছিয়াৰ পৰিস্থিতি সলনি হৈ গৈছে। মঙলবাৰে আমেৰিকাৰ বিদেশ মন্ত্ৰণালয়ে ইজৰাইলক ৫১ কোটি ডলাৰৰ (প্ৰায় ৪৩৬৫ কোটি টকা) অস্ত্ৰ আৰু সামৰিক সঁজুলি বিক্ৰীৰ সিদ্ধান্তক অনুমোদন জনাই এই বাৰ্তা প্ৰেৰণ কৰিছে।
মাৰ্কিন ‘প্ৰতিৰক্ষা নিৰাপত্তা সহযোগিতা সংস্থা’ (ডিএছচিএ)-এ এক বিবৃতিত কৈছে, “এই পদক্ষেপে ইজৰাইলক বৰ্তমান আৰু ভৱিষ্যতৰ আক্ৰমণৰ মোকাবিলা কৰাত সহায় কৰিব। ইয়াৰ জৰিয়তে তেওঁলোকে নিজৰ সীমান্ত, গুৰুত্বপূৰ্ণ পৰিকাঠামো আৰু জনবসতি অধিক ভালদৰে সুৰক্ষিত কৰিব পাৰিব।” তথাপি, এই বিষয়ত এতিয়ালৈকে ট্ৰাম্প চৰকাৰে মাৰ্কিন কংগ্ৰেছৰ কোনো অনুমোদন লোৱা নাই।
প্ৰকাশিত কেইবাটাও বাতৰিত দাবী কৰা হৈছে যে ৱাশ্বিংটনৰ তৰফৰ পৰা টেল আভিভলৈ যি সামৰিক সঁজুলি প্ৰদান কৰা হ’ব, তাৰ ভিতৰত আছে প্ৰায় সাত হাজাৰ ‘বম্ব গাইডেন্স কিট’। এই কিটৰ সহায়ত নিৰ্দিষ্ট লক্ষ্যত নিখুঁতভাৱে গাইডেড বোমাৰ আক্ৰমণ চলোৱা সম্ভৱ। সামৰিক পৰিভাষাত এই অস্ত্ৰৰ নাম ‘জয়েন্ট ডাইৰেক্ট এটাক মিউনিশ্যন’ (জেডিএএম)।
১৩ জুনত ইৰাণৰ পৰমাণু আৰু সামৰিক কেন্দ্ৰত ইজৰাইলৰ বিমান আক্ৰমণৰ পিছত এসপ্তাহতকৈ অধিক সময় ধৰি দুয়োপক্ষৰ মাজত সংঘৰ্ষ চলিছিল। শেষত ইৰাণত মাৰ্কিন আক্ৰমণৰ পিছত সংঘৰ্ষবিৰতি হ’লেও ধাৰাবাহিক আক্ৰমণৰ ফলত ইজৰাইলৰ বোমা আৰু ক্ষেপণাস্ত্ৰৰ ভাণ্ডাৰত ‘কঠিনতা আহিছে’ বুলি কিছুমান সামৰিক পৰ্যবেক্ষকে মত প্ৰকাশ কৰিছে। তেওঁলোকৰ মতে, সেই ঘাটি পূৰণৰ উদ্দেশ্যেই আমেৰিকাই ততাতৈয়াকৈ টেল আভিভলৈ অস্ত্ৰ সৰবৰাহৰ সিদ্ধান্ত লৈছে। ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ চৰকাৰে মাৰ্কিন অস্ত্ৰৰ সহায়ত পশ্চিম এছিয়াৰ আৰু কিছু ‘পূৰ্বনিৰ্দিষ্ট লক্ষ্যত’ নতুনকৈ আক্ৰমণ চলোৱাৰ চিন্তা-চৰ্চা কৰিছে।
