মঙলবাৰে প্ৰধানমন্ত্ৰী নৰেন্দ্ৰ মোদীয়ে কয় যে, অপাৰেচন সিন্দূৰৰ সময়ত ভাৰতীয় বায়ুসেনাৰ প্ৰদৰ্শিত বীৰত্ব আগন্তুক কেইবা দশকলৈ স্মৰণীয় হৈ থাকিব। তেওঁ এই অভিযানৰ জৰিয়তে পাকিস্তানৰ পাৰমাণৱিক ভীতিৰ মিছা প্ৰমাণ কৰাৰ বাবে বায়ুসেনাৰ প্ৰশংসা কৰে।
পঞ্জাৱৰ আদমপুৰ বায়ু ঘাটিলৈ মঙলবাৰে পুৱা কৰা ভ্ৰমণৰ সময়ত বায়ুসেনাৰ জোৱানসকলৰ উদ্দেশ্যে ভাষণত প্ৰধানমন্ত্ৰীয়ে এই মন্তব্য কৰে। তেওঁৰ পিছফালে ৰাছিয়া নিৰ্মিত এছ-৪০০ বায়ু প্ৰতিৰক্ষা মিছাইল আৰু মিগ-২৯ যুঁজাৰু বিমান স্পষ্টভাৱে দৃশ্যমান আছিল।
প্ৰধানমন্ত্ৰীয়ে কয়, “যেতিয়া আমাৰ ড্ৰ’নে শত্ৰুৰ দুৰ্গৰ দেৱাল ধ্বংস কৰে, যেতিয়া আমাৰ মিছাইলে টাৰ্গেটত আঘাত হানে, তেতিয়া শত্ৰুৱে শুনিবলৈ পায় ‘ভাৰত মাতা কি জয়’। যেতিয়া আমি ৰাতিও সূৰ্যৰ পোহৰ জ্বলাওঁ, তেতিয়া শত্ৰুৱে দেখে ‘ভাৰত মাতা কি জয়’। যেতিয়া আমাৰ সেনাই পাৰমাণৱিক ভীতিৰ ধমক নিঃশেষ কৰে, তেতিয়া আকাশত কেৱল ‘ভাৰত মাতা কি জয়’ৰ ধ্বনিহে গুঞ্জৰিত হয়। আপোনালোকে লাখ লাখ ভাৰতীয়ক গৌৰৱান্বিত কৰিছে, প্ৰতিজন ভাৰতীয়ৰ মাতৃক গৌৰৱান্বিত কৰিছে। আপোনালোকে ইতিহাস সৃষ্টি কৰিছে, আৰু মই আজি পুৱা আপোনালোকৰ মাজত উপস্থিত হৈছোঁ।”
অপাৰেচন সিন্দূৰৰ অংশ হিচাপে ভাৰতীয় বায়ুসেনা আৰু স্থলসেনাই ৯টা সন্ত্ৰাসবাদী শিবিৰ ধ্বংস কৰি ১০০ৰো অধিক সন্ত্ৰাসবাদীক হত্যা কৰে। ইয়াৰ প্ৰতিক্ৰিয়াত পাকিস্তানৰ সামৰিক বাহিনীয়ে আদমপুৰ বায়ু ঘাটিৰ লগতে ভাৰতৰ কেইবাখনো চহৰত প্ৰতিশোধমূলক আক্ৰমণ চলাবলৈ চেষ্টা কৰে যদিও বিফল হয়।
প্ৰধানমন্ত্ৰীয়ে পাকিস্তানৰ আদমপুৰ বায়ু ঘাটিত কৰা আক্ৰমণৰ কথা উল্লেখ কৰি কয় যে, পাকিস্তানৰ কুটিল পৰিকল্পনা প্ৰতিবাৰেই বিফল হৈছে। তেওঁ কয়, “অপাৰেচন সিন্দূৰৰ ফলত হতভম্ভ হৈ পাকিস্তানে এই বায়ু ঘাটি আৰু আমাৰ আন কেইবাটাও বায়ু ঘাটিত বাৰে বাৰে আক্ৰমণৰ চেষ্টা কৰিছিল। কিন্তু তেওঁলোকৰ কুটিল পৰিকল্পনা প্ৰতিবাৰেই বিফল হৈছে।”
প্ৰধানমন্ত্ৰীয়ে আৰু কয় যে, ভাৰতৰ সক্ষম বায়ু প্ৰতিৰক্ষা ব্যৱস্থাই পাকিস্তানৰ ড্ৰ’ন, ইউএভি, বিমান আৰু মিছাইলৰ আক্ৰমণক বিফল কৰিছে। তেওঁ কয়, “মই দেশৰ সকলো বায়ু ঘাটিৰ নেতৃত্ব আৰু ভাৰতীয় বায়ুসেনাৰ প্ৰতিজন বায়ু যোদ্ধাৰ প্ৰতি হৃদয়ৰ পৰা কৃতজ্ঞতা জনাইছোঁ। আপোনালোকে সঁচাকৈয়ে অসাধাৰণ কাম কৰিছে।” এই সময়ত বায়ুসেনাৰ জোৱানসকলে ‘ভাৰত মাতা কি জয়’ৰ শ্ল’গান দিয়ে।
প্ৰধানমন্ত্ৰীয়ে কয়, “পাকিস্তানে আমাৰ নতুন আৰু অত্যাধুনিক প্ৰযুক্তিৰ সৈতে প্ৰতিযোগিতা কৰিব নোৱাৰে। আমাৰ সকলো সেনাই বিশ্বৰ শ্ৰেষ্ঠ প্ৰযুক্তিৰে সজ্জিত, যিয়ে আমাৰ প্ৰত্যাহ্বানো বৃদ্ধি কৰে। আপোনালোকে জটিল ব্যৱস্থাসমূহ অতি দক্ষতাৰে পৰিচালনা কৰিছে। এয়া এক বিশেষ দক্ষতা। আপোনালোকে প্ৰমাণ কৰিছে যে এই খেলত আপোনালোক বিশ্বৰ শ্ৰেষ্ঠ।”
তেওঁ আৰু কয় যে, অপাৰেচন সিন্দূৰ কেৱল এক সাধাৰণ সামৰিক অভিযান নহয়, বৰঞ্চ ই ভাৰতৰ নীতি, উদ্দেশ্য আৰু সিদ্ধান্ত গ্ৰহণৰ ক্ষমতাৰ সংমিশ্ৰণ। তেওঁ কয়, “বিগত দশকত আমাৰ সেনাই বিশ্বৰ শ্ৰেষ্ঠ সঁজুলি অৰ্জন কৰিছে। আমি প্ৰযুক্তি আৰু কৌশলৰ সমন্বয়ৰ ক্ষমতা প্ৰমাণ কৰিছোঁ।”
প্ৰধানমন্ত্ৰীয়ে সোমবাৰে দেশবাসীৰ উদ্দেশ্যে দিয়া ভাষণত উল্লেখ কৰা তিনিটা মূল নীতিৰ কথা পুনৰ উল্লেখ কৰে আৰু কয় যে, অপাৰেচন সিন্দূৰে ভাৰতৰ ৰাষ্ট্ৰীয় নিৰাপত্তা নীতিত এক “নতুন স্বাভাৱিকতা” স্থাপন কৰিছে। তেওঁ কয় যে, ভাৰতে যিকোনো আঘাতৰ প্ৰত্যুত্তৰত উপযুক্ত আঘাত দিব, পাৰমাণৱিক ভীতিক সহ্য নকৰিব আৰু সন্ত্ৰাসবাদ আৰু ইয়াৰ পৃষ্ঠপোষকৰ মাজত কোনো পাৰ্থক্য নাৰাখিব।
