ইণ্ডিয়ান ইনষ্টিটিউট অৱ টেকন’লজি (আই আই টি) দিল্লীৰ এজন ছাত্ৰই বিশ্বৰ এখন আগশাৰী ক’ডিং প্ৰতিযোগিতাত জয়লাভ কৰিছে। ৮৭খন দেশৰ ১ লাখৰো অধিক ছাত্ৰ-ছাত্ৰীয়ে অংশগ্ৰহণ কৰা কম্পিউটাৰ প্ৰগ্ৰেমিং প্ৰতিযোগিতা টিচিএছ ক’ডভিটাৰ বিজয়ী হিচাপে ঘোষণা কৰা হয় কলশ গুপ্তাক।
কোডভিটাই বিশ্বৰ সৰ্ববৃহৎ কম্পিউটাৰ প্ৰগ্ৰেমিং প্ৰতিযোগিতা হিচাপে গিনিজ ৱৰ্ল্ড ৰেকৰ্ড খিতাপ দখল কৰিছে। টাটা কনচালটেন্সি চাৰ্ভিচেছ (টিচিএছ)য়ে এক প্ৰেছ বিজ্ঞপ্তিযোগে জনোৱা মতে, এই বছৰ ক’ডভিটাৰ দশম ছিজনত ৮৭খন দেশৰ পৰা এক লাখৰো অধিক ছাত্ৰ-ছাত্ৰীয়ে অংশগ্ৰহণ কৰিছিল।
প্ৰতিযোগিতাৰ বিজয়ী হিচাপে কলশ গুপ্তাই লাভ কৰিছে ১০ হাজাৰ ডলাৰৰ গ্ৰেণ্ড প্ৰাইজ। চিলি আৰু টাইৱানৰ ছাত্ৰ-ছাত্ৰীয়ে ক্ৰমে প্ৰথম আৰু দ্বিতীয় ৰানাৰ্ছ আপ খিতাপ অৰ্জন কৰে। চিলিৰ মৌৰিচিঅ’ আন্দ্ৰেছ কেৰী লিয়ালে প্ৰথম ৰানাৰ্ছ আপ হিচাপে ৭ হাজাৰ ডলাৰ লাভ কৰাৰ বিপৰীতে টাইৱানৰ জেফ্ৰি হোয়ে ৩ হাজাৰ ডলাৰ লাভ কৰে।
