চাকৰি বিচাৰি থকাসকলৰ বাবে এইবাৰ আহিছে এক ব্যতিক্ৰমী সুযোগ। দিনটোৰ অধিকাংশ সময় ইনষ্টাগ্ৰামত ৰীলছ চাই কটাব লাগিব, লগতে কোনটো ভিডিঅ’ ভাইৰেল হৈছে আৰু কি নতুন ট্ৰেণ্ড চলিছে সেই বিষয়ে তথ্য সংগ্ৰহ কৰিব লাগিব। এনে এক অগতানুগতিক চাকৰিৰ প্ৰস্তাৱ আগবঢ়াইছে ৰাজস্থানৰ উদয়পুৰস্থিত Influish নামৰ এটা কোম্পানীয়ে।
দেৱালীৰ সময়তে কোম্পানীটোৱে এই বিশেষ চাকৰিৰ খবৰ ছ’চিয়েল মিডিয়াত প্ৰকাশ কৰিছে। কোম্পানীটোৰ মতে, যিসকলে ইনষ্টাগ্ৰাম ব্যৱহাৰ কৰি ভাল পায় আৰু ঘণ্টাৰ পিছত ঘণ্টা ৰীলছ চাই সময় কটাব পাৰে, তেওঁলোকৰ বাবে এয়া এক উপযুক্ত কৰ্মসংস্থাপনৰ সুযোগ।
চাকৰিটোৰ বিষয়ে কোম্পানীটোৰ কৰ্মচাৰীসকলে ছ’চিয়েল মিডিয়াত এটা ভিডিঅ’ শ্বেয়াৰ কৰি পদটোৰ দায়িত্ব আৰু আবেদন প্ৰক্ৰিয়াৰ বিষয়ে জনাইছে।
ভিডিঅ’টোত এজন ব্যক্তিয়ে কয় যে ইনষ্টাগ্ৰাম ব্যৱহাৰ কৰি ভাল পোৱা লোকসকলক তেওঁলোকে এই কামৰ বাবে ধন দিবলৈ সাজু।
তেওঁ কয়, “যদি আপুনি সঁচাকৈয়ে ইনষ্টাগ্ৰাম ব্যৱহাৰ কৰি ভাল পায়, তেন্তে আমি আপোনাক ইয়াৰ বাবে ধন দিম। আমি এনে এজন Doomscroller বিচাৰিছোঁ, যিয়ে গোটেই দিনটো বহি ৰীলছ চাই থাকিব আৰু ইনষ্টাগ্ৰামত কি কি ভাইৰেল হৈছে সেই বিষয়ে আমাক জনাব।”
ইয়াৰ উপৰি, এই চাকৰিটোৰ প্ৰতি আগ্ৰহী প্ৰাৰ্থীসকলক ভিডিঅ’টোৰ কমেণ্ট বক্সত ‘Hi’ লিখি মন্তব্য কৰিবলৈ আহ্বান জনোৱা হৈছে। উদয়পুৰৰ বাসিন্দাসকলক কোম্পানীটোৱে পোনপটীয়াকৈ মেছেজৰ জৰিয়তে আবেদন কৰাৰ লিংক প্ৰেৰণ কৰিব বুলি জনাইছে।
এই চাকৰিৰ বাবে আবেদন কৰিবলৈ আগ্ৰহীসকলে Instagram-ৰ ‘gangsofstartup’ নামৰ একাউণ্টটো চাব পাৰে। একাউণ্টটোৰ বায়’ত আবেদন কৰাৰ বাবে Google Form-ৰ লিংক উপলব্ধ আছে।
আবেদনকাৰীসকলে প্ৰ-পত্ৰখনত নিজৰ নাম, ম’বাইল নম্বৰ আৰু ঠিকনা উল্লেখ কৰিব লাগিব। ইয়াৰ লগতে তেওঁলোকে পূৰ্ণকালীন চাকৰি নে ইণ্টাৰ্নশ্বিপৰ বাবে আবেদন কৰিছে, কোনটো পদত কাম কৰিবলৈ আগ্ৰহী আৰু বৰ্তমানৰ দৰমহা তথা আশা কৰা দৰমহাৰ বিষয়েও তথ্য দিব লাগিব।
প্ৰ-পত্ৰ জমা দিয়াৰ পূৰ্বে নিজৰ ৰিজিউমে (Resume) আপলোড কৰাটোও বাধ্যতামূলক। কোম্পানীটোৰ মতে, প্ৰাথমিকভাৱে নিৰ্বাচিত প্ৰাৰ্থীসকলৰ সৈতে পৰৱৰ্তী সময়ত যোগাযোগ কৰা হ’ব।
নৱেম্বৰ মাহৰ ৪ তাৰিখে ইনষ্টাগ্ৰামত প্ৰকাশ পোৱা এই ভিডিঅ’টোৱে ইতিমধ্যে ৩ লাখৰো অধিক ভিউ লাভ কৰিছে। কোম্পানীটোৱে জনোৱা অনুসৰি, এতিয়ালৈকে ১১ হাজাৰৰো অধিক লোকে আবেদন প্ৰ-পত্ৰৰ বাবে অনুৰোধ জনাইছে।
চাকৰিটোৰ অগতানুগতিক ধৰণে ছ’চিয়েল মিডিয়া ব্যৱহাৰকাৰীসকলৰ মাজত ব্যাপক চৰ্চাৰ সৃষ্টি কৰিছে। বহুতে এই চাকৰিক নিজৰ সপোনৰ চাকৰি বুলি অভিহিত কৰিছে।
এজন ব্যৱহাৰকাৰীয়ে ইয়াক ‘Perfect Job’ বুলি মন্তব্য কৰাৰ বিপৰীতে আন এজনে কয় যে তেওঁ বহুদিনৰ পৰাই এনে এটা সুযোগৰ অপেক্ষাত আছিল। আন একাংশই ইয়াক ‘Dream Job’ বুলিও অভিহিত কৰিছে।
আন এজন ব্যৱহাৰকাৰীয়ে ধেমেলীয়া সুৰত কোম্পানীটোক তেওঁক নিযুক্তি দিবলৈ আহ্বান জনাই কয় যে সুযোগ পালে তেওঁ ‘Best Performer’ বঁটাও লাভ কৰিবলৈ সক্ষম হ’ব।
সামগ্ৰিকভাৱে, ইনষ্টাগ্ৰামত ৰীলছ চাই সময় কটোৱাটোক উপাৰ্জনৰ সুযোগলৈ ৰূপান্তৰিত কৰা এই ব্যতিক্ৰমী চাকৰিৰ বিজ্ঞাপনে এতিয়া ইণ্টাৰনেটত বিশেষ চৰ্চা লাভ কৰিছে।
