তালিবান চৰকাৰে আফগানিস্তানত দবা খেলৰ ওপৰত পৰৱৰ্তী নিৰ্দেশ নোহোৱালৈকে নিষেধাজ্ঞা জাৰি কৰিছে। তেওঁলোকে দাবী কৰিছে যে এই খেল জুৱাৰ সৈতে জড়িত, যিটো তেওঁলোকৰ কঠোৰ ইছলামিক শ্বৰীয়ত আইনৰ অধীনত নিষিদ্ধ। তালিবানৰ ক্ৰীড়া সঞ্চালকৰ মুখপাত্ৰ আতাল মাশ্বৱানীয়ে ১১ মে’ তাৰিখে এই সিদ্ধান্তৰ কথা নিশ্চিত কৰিছে। তেওঁ কয়, “শ্বৰীয়ত আইনৰ মতে দবা জুৱাৰ এক প্ৰকাৰ হিচাপে গণ্য হয়, যিটো বিগত বছৰত ঘোষিত ‘পুণ্যৰ প্ৰচাৰ আৰু অপকৰ্মৰ নিবাৰণ’ আইনৰ দ্বাৰা নিষিদ্ধ।” তেওঁ আৰু কয় যে, দবাৰ ধৰ্মীয় দিশৰ বিষয়ে পৰ্যালোচনা নোহোৱালৈকে এই নিষেধাজ্ঞা বলৱৎ থাকিব।
২০২১ চনত ক্ষমতা দখলৰ পিছৰে পৰা তালিবানে কঠোৰ ইছলামিক আইন জাৰি কৰি আহিছে। দবাৰ এই নিষেধাজ্ঞা তেওঁলোকৰ এনে সিদ্ধান্তৰ শেহতীয়া উদাহৰণ। মাশ্বৱানীয়ে জানিবলৈ দিছে যে জাতীয় দবা সংস্থাটোৱে প্ৰায় দুবছৰ ধৰি কোনো আনুষ্ঠানিক অনুষ্ঠান আয়োজন কৰা নাই আৰু নেতৃত্বৰ কিছু সমস্যাৰ সন্মুখীন হৈছে।
কাবুলৰ এগৰাকী কেফে স্বত্বাধিকাৰী আজিজুল্লাহ গুলজাদাই তেওঁৰ কেফেত শেহতীয়া বছৰবোৰত অনানুষ্ঠানিক দবা প্ৰতিযোগিতা আয়োজন কৰিছিল। তেওঁ জুৱাৰ অভিযোগ অস্বীকাৰ কৰি কয় যে অন্যান্য মুছলিম সংখ্যাগৰিষ্ঠ দেশতো দবা খেলা হয়। তেওঁ কয়, “অন্য ইছলামিক দেশৰ খেলুৱৈসকলে আন্তঃৰাষ্ট্ৰীয় পৰ্যায়ত অংশগ্ৰহণ কৰে।” তেওঁ এই নিষেধাজ্ঞাক মানি চলিব বুলি জনালেও কয় যে ই তেওঁৰ ব্যৱসায় আৰু খেলপ্ৰেমী যুৱক-যুৱতীৰ ওপৰত বিৰূপ প্ৰভাৱ পেলাব। তেওঁৰ মতে, “যুৱক-যুৱতীৰ বাবে এতিয়া বিনোদনৰ বিকল্প কম, তেওঁলোকে চাহৰ সৈতে দবা খেলি সময় কটাবলৈ আহিছিল।”
তালিবানে আগতেও কেইবাটাও ক্ৰীড়াৰ ওপৰত নিষেধাজ্ঞা জাৰি কৰিছে। বিগত বছৰ মিক্সড মাৰ্চিয়েল আৰ্টছ (এমএমএ)-ৰ দৰে প্ৰতিযোগিতাক “অত্যধিক হিংসাত্মক” আৰু শ্বৰীয়তৰ সৈতে “সংঘাতপূৰ্ণ” বুলি নিষিদ্ধ কৰিছিল। ইয়াৰ উপৰিও মহিলাসকলক ক্ৰীড়াৰ পৰা সম্পূৰ্ণৰূপে বঞ্চিত কৰা হৈছে, যাৰ বাবে আন্তঃৰাষ্ট্ৰীয় সমালোচনাৰ সৃষ্টি হৈছে।
এই নিষেধাজ্ঞাৰ ফলত আফগানিস্তানৰ সামাজিক আৰু সাংস্কৃতিক জীৱনত প্ৰভাৱ পৰিছে, কিয়নো দবা আছিল যুৱক-যুৱতীৰ বাবে এক গুৰুত্বপূৰ্ণ বিনোদনৰ মাধ্যম। বৰ্তমানলৈকে এই নিষেধাজ্ঞা কেতিয়া পৰ্যালোচনা কৰা হ’ব বা প্ৰত্যাহাৰ কৰা হ’ব, তাৰ কোনো নিৰ্দিষ্ট সময়সীমা ঘোষণা কৰা হোৱা নাই।
